ကျာ်ထဝ်၊ မာတ်ချ် (၃၁)
ပ္ဍဲလ္တူဒဵုကျာ်ဣသိယဵု ဒၞါဲဒတန်ကျာ်စေတဳဓာတ်သော် ကျာ်ဣသိယဵုနွံ၊ ပွိုၚ်ဍုၚ်ကျာ်ထဝ်၊ တွဵုရးဍုၚ်မန်ဂှ် ဒပ်ကံၚ်ဇြဳပၞာန် သၠဲပ္တိုန်ဇြဟတ်ဒပ်တုဲ ကၠုၚ်စိုပ်ဗ္ဂပ်စွံလဝ် လွဟ်ဇၞော်တံရောၚ်ဂှ် ညးတာလျိုၚ် PDF ခရိုၚ်သဓီု ဟီုကဵု ဌာန်ပရိုၚ်သြၚ်လောန်တိုၚ်(မ်) ရ။
ဒပ်ကံၚ်ဇြဳပၞာန်ဝွံ အပ္ဍဲဂိတုမာတ်ချ် သတ္တာဟလက္ကရဴအိုတ်ဏံ ပ္ဍဲပွဳပွူဒဵုဣသိ၊ ခဠာတ်က္ၜၚ်ကျာသၞေၚ်ဝဲ ကျာ်ဣသိယဵုဂှ် ကၠောန်သ္ပလဝ် ဒၞါဲပန်ပှော်လွဟ်ဇၞော် ၁၂၀ မမ တံမာန်ဂှ်တုဲ ဇြဟတ်ဒပ် (၁၀၀) ပြၚ် သၠဲပ္တိုန်လဝ်ရ။
ညးတာလျိုၚ် PDF ခရိုၚ်သဓီု ကိုဝ်အေမေန်ထောန်ဂှ် ပွမဗ္ဂပ်စုတ် လွဟ်ဇၞော်တံဂှ်ဝွံ ယဝ်ရဗ္ဒိုပ်ဍေံတံ ဒးဒုၚ်ဗ္တိုက်မ္ဂး သွက်ဂွံကလေၚ်ဗ္တိုက်ဂှ်ကဵု ယဝ်ရပေါဲဗ္တိုက်က္တဵုဒှ်မ္ဂး ပန်ပှော်လွဟ်ဇၞော် အပ္ဍဲကွာန်တံ ဒှ်မာန်ရောၚ်ဂှ် သ္ဂးရ။
ဟိုတ်ဂှ်ရ နကဵုညးဒေသ မသ္ပဒတဴဒၟံၚ် ပ္ဍဲကဵုဇိုၚ်ဒဵုကျာ်ဣသိယဵုဂေတ်ကၠောံတံဂှ် စွံသတိဗွဲတၟေၚ်တုဲ သွက်ဂွံအာကၠုၚ်အိုတ်ဂှ်ကဵု ဟွံဒေါအ်ဟွံဂွံ သွက်ဂွံဒ္ဂေတ်ဗက်ကဵု စေဝ်ပၞောန်တံဏံဂှ် ဖ္တိုက်ဖ္အောဝ်လဝ်ရ။
ညးဒေသကျာ်ဣသိယဵုမွဲတၠဂှ်လေဝ် ပ္ဍဲကဵုဒေသကျာ်ဣသိယဵု တိဍာ်ပရေၚ်ပၞာန်ဟွံသေၚ်တံဂှ် ဒပ်ကံၚ်ဇြဳပၞာန် ကၠုၚ်စိုပ်ဖျေံဒပ်ဂှ် ဒဒှ်ရဒှ်ဟွံထေက်ဂှ်ကဵု ပ္ဍဲကဵုညးဍုၚ်ကွာန်ဒေသတံဂှ်လေဝ် ပရေၚ်ဒးဂွိၚ်ဂွါဲတံ သၠုၚ်တိုန်ဒၟံၚ်ရောၚ်ဂှ် ဟီုကဵု ဌာန်ပရိုၚ်သြၚ်လောန်တိုၚ်(မ်) ရ။
အခိၚ်လၟုဟ်ဂှ် ဒပ်ကံၚ်ဇြဳပၞာန်ဝွံ ပ္ဍဲကဵုဇိုၚ်ဒဵုဗ္ဒိုပ်ဂြိုပ်ကပေါဝ်တံ၊ လ္ပာ်ခဠာတ်က္ၜၚ်ကျာသၞေၚ်ဝဲ၊ (ကျီးကန်းပါးစပ်) ကေုာံ လ္တူဒဵုကျာ်ဣသိယဵု၊ ပွဳပွူဒဵုရသိတံဂှ် ဖျေံဒၟံၚ်ဒပ်ရောၚ် ဂွံတီကေတ် ဇရေၚ်ညးဒေသတံရ။
ပ္ဍဲကဵုပွဳပွူ ဗ္ဒါဲကျာ်ဣသိယဵု ညးလ္ၚောဝ်ကျာ် အပ္ဍဲဍုၚ်၊ မ္ၚးဍုၚ် ဂၠိုၚ်ကဵုပြကောဋိကိုဋ်ဂှ် လ္တူပွဒပ်ကံၚ်ဇြဳပၞာန် ဖျေံဒပ်တံကဵု လုပ်စိုပ်ချဳဒရာၚ်ဒၟံၚ်ပရေၚ်ပၞာန်တံဂှ် ပရေၚ်ပါ်ပါဲတံလေဝ် နွံဒၟံၚ်ရ။
ပရိုၚ်−သြၚ်လောန်တိုၚ်(မ်)
ဗီုဓာတ် -EPA