ဖျုၚ်ယာန်၊ မာတ်ချ် (၃၁)
ကိုဝ်ရဳယျာသၟဝ်ကျာ ကောပ်မှေတ်ဂစိုတ်လဝ် မၞိဟ်သုၚ်စောဲဂဥုဲၜူမာဲတံကီု သီုကဵုမၞိဟ်ဗဵု ပါ်ပရအ်လဝ် ရုပ်ဂမျိုၚ်ယေန်သၞာၚ်ကိုဝ်ရဳယျာသၟဝ်ကျာတံ မအုပ်ဓလီုလဝ်တံရောၚ်ဂှ် ကိုဝ်ရဳယျာသၠုၚ်ကျာ ပ္တိတ်လဝ်လိက်ဒုၚ်စဳရေၚ်မွဲရ။
ကိုဝ်ရဳယျာသၟဝ်ကျာဝွံ ဖံက်ပ္ကဝ်ထိၚ်ဒက်ဒၟံၚ် အခေါၚ်ဗၠးၜး ကေုာံ အခေါၚ်အရာမၞိဟ် ကောန်ဍုၚ်တံရောၚ်ဂှ်လေဝ် ထ္မံက်ထ္ၜးလဝ် ပ္ဍဲလိက်ဒုၚ်စဳရေၚ်ဂှ်ရ။
ဌာနဝန်ဇၞော်ကိုဝ်ရဳယျာသၠုၚ်ကျာ မရပ်စပ်ဒၟံၚ် ပရေၚ်ကိုဝ်ရဳယျာၜါဍုၚ် သွက်ဂွံကလေၚ်ပံၚ်ကောံပၠန်ဂှ်ဝွံ ဒုၚ်လဝ်သ္ဇိုၚ်ကဵု လိက်ဒုၚ်စဳရေၚ်သာဓက မုက်လိက် (၄၅၀) ပါ မကံက်လဝ် နူသၞာံ ၂၀၁၇ စဵုကဵု သၞာံ ၂၀၂၂ နူကဵုကောန်ဍုၚ်ကိုဝ်ရဳယျာသၟဝ်ကျာ (၅၀၀) ပြၚ် မဂြိပ်တိတ်ကၠုၚ်လဝ် နူကဵုဇာတိဌာန်တိုပ်သုက်ညးတံဂှ် ဂွံတီကေတ်ရ။
“ ရံၚ်ကေတ် ဘပဠဒၟံၚ် အခေါၚ်ဂျိုၚ်တဴလမျီု ကောန်ဍုၚ်ကိုဝ်ရဳယျာသၟဝ်ကျာတံ ဇၞော်ကဵုဇြဟတ်ရောၚ်” ဂှ် ထ္မံက်ထ္ၜးလဝ် ပ္ဍဲလိက်ဒုၚ်စဳရေၚ် ဌာနဝန်ဇၞော်ဂှ်ရ။
ပရေၚ်ဂစိုတ်ကောပ်မှေတ် သွက်အမှုရာဇဝတ်ဂဥုဲၜူမာဲတံကီု၊ ပရေၚ်တြးဝဳဒဳယောကိုဝ်ရဳယျာသၠုၚ်ကျာတံကီု၊ ပရေၚ်ဘာသာ ကေုာံ ပွမစိုပ်တၞုၚ်တၞးတံ သီုကဵုပါလုပ် ပြဝဟွံကိတ်ညဳကဵု ဒဏ်ဂစိုတ်တံဂှ်လေဝ် ကၠောန်ၜိုတ်ဒၟံၚ် ညံၚ်ကဵုစပုၚ် သုၚ်ဍာ်ရောၚ်ဂှ် ထ္မံက်ထ္ၜးလဝ် ပ္ဍဲလိက်ဒုၚ်စဳရေၚ်ဂှ်ရ။
တၚ်နၚ်အလဵုအသဳကိုဝ်ရဳယျာသၠုၚ်ကျာ မလ္ၚတ်ဂွံဆဵုကေတ်လဝ်တံဂှ် ၜိုန်ရသ္ပဒတန်တၞဟ်ခြာဟွံမာန်ဏီကီုလေဝ် တၚ်နၚ်တံဏံဝွံ ကိတ်ညဳဒၟံၚ်ကဵု လိက်ဒုၚ်စဳရေၚ် ဂကောံအလဵုအသဳဟွံသေၚ်တံ ကေုာံ ကုပရေၚ်ဂၠိုက်ဂၠါဲစၟဳတ် ကုလသမဂ္ဂတံရောၚ်ဂှ် ထ္မံက်ထ္ၜးလဝ် ပ္ဍဲဌာန်ပရိုၚ်ရာ်တာရ။
ပ္ဍဲကဵုလိက်ဒုၚ်စဳရေၚ်ဂှ် နကဵုအလဵုအသဳကိုဝ်ရဳယျာသၟဝ်ကျာ ပွမကောပ်မှေတ် အပ္ဍဲမုက်မၞိဟ်၊ ပွမဍဵုဍိုက်ပျဲပျာံ ကေုာံ ပွမရပ်ဒက်ဟွံဗဗွဲကဵုသၞောဝ်တံကီု သီုကဵုပရူပရာ မဝးပ္ကဝ်လဝ်အခေါၚ်အရာမၞိဟ် မကလိလောန်လဝ် ပ္ဍဲကဵုဗွိုၚ်မၞိဟ်၊ ဗ္ဒိုပ်ထံၚ်စာတ်တံ၊ ဒၞါဲတၞဟ်သ္အာၚ်တံဂှ် ထ္မံက်ထ္ၜးလဝ် ဗွဲလစှ်ေရ။
ပွမဒးချိုတ် ကေုာံ ပွမဍဵုဍိုက်ပျဲပျာံ ပ္ဍဲကဵုဗ္ဒိုပ်ပရေၚ်ထိၚ်ဒဝ်တံဂှ်ဝွံ လေပ်က္တဵုဒှ်တဴဓမ္မတာရတုဲ လ္ၚဵုတံဂှ် ဒးဒုၚ်ရပ် ဟိုတ်နူပွပ္တိတ်ဇြဟတ် သွက်ဂွံတတ်ကၠောံပယျဵုတုဲ ဒးဒုၚ်ကၠတ်ဂစိုတ်ထောံ သ္ၚိတ်တ်ရောၚ်ဂှ် ဌာနဝန်ဇၞော် ဟီုရ။
ကိုဝ်ရဳယျာသၟဝ်ကျာဝွံ သွက်ဂွံသၠုၚ်ပ္တိုန်လွဟ်လက်နက်ကမ်လှောဝ် ကေုာံ နျူကလဳယျာဍေံဂှ်ဟေၚ် ဂ္စါန်ကၠောန်ဒၟံၚ်ဂှ်ရ သွက်ဂွံကၠောန် ညံၚ်သ္ဇိုၚ်တၚ်နွံပၟိက်ကောန်ဍုၚ်တံ ဂွံတောတက်ခိုဟ်ဂေါဝ်တိုန် တာလျိုၚ်လီုလဝ်ဂှ် အခိၚ်ကိုဝ်ရဳယျာသၠုၚ်ကျာ ဂ္စါန်ဒၟံၚ် သွက်ဂွံစၞောန်ပျးစဳထ္ၜးအရာတံဏံဂှ် လိက်ဒုၚ်စဳရေၚ်ဏံ မိက်တိတ်ကၠုၚ်လဝ်ရ။
သမ္မတကိုဝ်ရဳယျာသၠုၚ်ကျာ ယောန်သက်ယောဂှ် ဒဒှ်ရ ပရူပရာကိုဝ်ရဳယျာသၟဝ်ကျာ မဍဵုဍိုက်လၞိန်ဗပိန်ဒၟံၚ် ဟွံလုပ်သၞောဝ် ပရေံပရေံဂှ် ထေက်ကဵုဒးကဵုသမ္တီ ကုဗွိုၚ်ဍုၚ်သ္အာၚ်တံ နူကဵုလိက်ဒုၚ်စဳရေၚ်ဏံ ခိုဟ်ဟ်ရောၚ်ဂှ် ဟီုဂးလဝ်ရ။
သွက်ဂွံခါတ်အကာဲ အကာဲအရာအခေါၚ်အရာ ကိုဝ်ရဳယျာသၟဝ်ကျာတံ လၟေၚ်သၞာံဂှ် လ္ဂောံကဵုသၞောဝ်မ္ဂး နွံပၟိက်ရောၚ်ဂှ် ဌာနဝန်ဇၞော် ပရေၚ်သ္ဂောံကလေၚ်ပံၚ်ကောံတံ သ္ဂးရ။
ပ္ဍဲကိုဝ်ရဳယျာသၠုၚ်ကျာဂှ် ၜိုန်ရကောန်ဍုၚ်ကိုဝ်ရဳယျာသၟဝ်ကျာ ဗ္ဒါဲ (၃၄၀၀၀) ဖျေံသ္ဇိုၚ်မံၚ်တန်တဴဒၟံၚ်ကီုလေဝ် ဟိုတ်နူပရေၚ်ဂီုကၠီုပယျဵု တေၚ်ဂြတ်တုဲ လၟိဟ်ဂၞန်ညးဂြိပ်တိတ်ကၠုၚ်တံ အောန်စှ်ေအာ တီတီဒှ်ဒှ်ဂှ် ဂွံတီကေတ်ရ။
ပ္ဍဲအကြာပရေၚ်ကၟာတ်လဒဵု ကဝ်ဝေဒ်−၁၉ ဂှ် မၞိဟ်မကၠုၚ်စိုပ် နူကဵုကိုဝ်ရဳယျာသၟဝ်ကျာဂှ်ဝွံ ပ္ဍဲသၞာံ ၂၀၂၁ ဂှ် (၆၃) တၠဓဝ်နွံလဝ်တုဲ ပ္ဍဲသၞာံ ၂၀၂၂ ဂှ် သၠုၚ်တိုန်ကၠုၚ်လဝ် စဵုကဵု (၆၇) တၠဂှ် ဂွံတီကေတ် အတိုၚ်တၚ်နၚ် ဌာနဝန်ဇၞော်တံရ။
Ref: CNA