လ္ဂုၚ်၊ ဨပရဴ (၈)
အလုံမွဲကၟိန်ဍုၚ် ပ္ဍဲဂိတုမာတ်ချ်တုဲကၠုၚ် မွဲဂိတုတေံ ညးဗြဴ (၂၉) တၠ ချိုတ်အာလဝ်တုဲ (၅၈) တၠ ဒးဒုၚ်ရပ်လဝ်ရောၚ် သာ်ဝွံ သမဂ္ဂညးဗြဴဍုၚ်ဗၟာ (Burmese Women’s Union) လလောၚ်ပ္တိတ်လဝ် ပ္ဍဲဂိတုဨပရဴ (၆) တေံရ။
ပ္ဍဲကဵုညးမချိုတ်အာတံဂှ် နူရးသက်ကိုၚ် ဒၞါဲပရေၚ်ပၠန်ဂတး ဇြဟတ်ခိုဟ်တံဂှ် ၁၇ တၠ၊ နူတွဵုရးချေၚ်ဂှ် ၄ တၠ၊ နူရးမဂွဵုဂှ် ၃ တၠ၊ နူတွဵုရးဍုၚ်မန်ဂှ် ၂ တၠ၊ နူတွဵုရးသေံ ကဵု တွဵုရးကရေၚ်ဂှ် ၁ တၠစၟအ်အ် ပါလုပ်ရ။
ပ္ဍဲကဵုညးဒးဒုၚ်ရပ်တံဂှ် နူရးသက်ကိုၚ် ၂၄ တၠ၊ နူရးတၞၚ်သဳ ၁၀ တၠ၊ နူရးလ္ဂုၚ် ၈ တၠ၊ နူရးဨရာဝတဳ ၄ တၠ၊ နူတွဵုရးကချေၚ် ၃ တၠ၊ နူရးမဂွဵု ၃ တၠ၊ နူတွဵုရးသေံ၊ ရးမာန္တလေဝ် ကေုာံ ရးဗဂေါတံဂှ် ၂ တၠ စၟအ်အ် ဒးဒုၚ်ရပ်လဝ်ရ။
ပ္ဍဲဍုၚ်ဗၟာ ဒပ်ပၞာန်သီအဝဵုတုဲ စဵုကဵုဂိတုမာတ်ချ် (၃၁) သၞာံဏံဂှ် မၞိဟ်ဗြဴ (၄၆၀) ပြၚ် ချိုတ်အာလဝ်တုဲ မၞိဟ်ဗြဴ (၃၀၀၀) ပြၚ်ဝွံ ဆက်ဒးဒုၚ်ရပ်လဝ်ရောၚ် ထ္မံက်ထ္ၜးလဝ် ပ္ဍဲတၚ်လလောၚ်တြးဂှ်ရ။
သမဂ္ဂညးဗြဴဍုၚ်ဗၟာဂှ် တၚ်နၚ်မလလောၚ်ပ္တိတ်လဝ်လၟုဟ်ဂှ်ဝွံ ဒှ်တၚ်နၚ် ကံက်နုက်ပ္တိတ်နူ ဂကောံပရိုၚ်မဳဒဳယာ ဗၠးၜးတံတုဲ ပ္ဍဲဗလးတိဏံ ဂၠိုၚ်နူဏံ တၟာဂလိုၚ်မာန်ဏောၚ်ဂှ် သ္ဂးရ။
အတိုၚ်ဂလာန် ဂကောံရီုဗၚ်မၚ်မွဲ ကောန်ထံၚ်ပရေၚ်ဍုၚ်ကွာန် (AAPP) တံဂှ်မ္ဂး အပ္ဍဲကာလဒပ်ပၞာန်သီအဝဵု ပွိုၚ် ၂ သၞာံ ညးဍုၚ်ကွာန်ကောန်အရာပ် ဒးဒုၚ်ဂစိုတ်လဝ်တံ နွံကၠုၚ် (၃၂၀၀) ပြၚ်ယျဂှ် ပ္ဍဲဂိတုဨပရဴ ၇ တေံ လလောၚ်ပ္တိတ်လဝ်ရ။
ပရိုၚ်−သြၚ်လောန်တိုၚ်(မ်)
ဗီုဓာတ်−KNU