ထိုၚ်ဝါန်၊ ဨပရဴ (၈)
ဍုၚ်ကြုက်ဝွံ ဒဒှ်ကၟာတ်လဒဵုထောံ အမာတ်ကလုတ်ထိုၚ်ဝါန် စပ်ကဵုဍုၚ်အမေရိကာန် ကေုာံ ဂြောဝ်ဂတာညး နူကဵုလုပ်စိုပ် ၝောံဍုၚ်ကြုက်၊ ဟံၚ်ကံၚ် ကေုာံ မကာအဵုတံဂှ်ရောၚ် ပ္ဍဲဂိတုဨပရဴ (၇) တေံ မဳဒဳယာကၟိန်ဍုၚ်ပိုၚ် ထ္မံက်ထ္ၜးလဝ်ရ။
ပ္ဍဲကဵုပရေၚ်တပ်ဒဏ်ကၟာတ်လဒဵု နူကဵုရုၚ်ဍုၚ်ကြုက် ကေၚ်ကာထိုၚ်ဝါန် မလလောၚ်ပ္တိတ်လဝ်ဂှ် ညံၚ်ဟွံဂွံကၠောန်သ္ပ ပွပံၚ်တောဲရေၚ်တၠုၚ် ကုမၞိဟ်ပူဂဵု၊ ကုဂကောံဗော်သွးၝောံဍုၚ်ကြုက်ဂှ် တာဒၞါလဝ် ရဲဓလိုက်တမ်ရိုဟ်ဍေံကဵု ကမ္ပဏဳဂမၠိုၚ်ရောၚ် မဒှ်ရ။
သမ္မတထိုၚ်ဝါန် သာၚ်အေန်ဝါန် အခိၚ်ဇူတဴဒၟံၚ်တရဴ ပ္ဍဲအမေရိကာန် အပ္ဍဲသတ္တာဟဏံမွဲလစုတ်တုဲ ကြဴနူဆဵုဂဗလဝ်ကဵု ဥက္ကဌကၠတ်ထဝ်သၟဝ် အမေရိကာန် ဂဴဝေန် မက္ကာတဳတုဲဂှ် တၚ်လလောၚ်တြးဏံ မံက်တိတ်ကၠုၚ်ရ။
ညးဝွံ နဒဒှ်မကလေၚ်ခၠေဝ်ပလန် ကုတၚ်လလောၚ်တြးဂှ်တုဲ ချူပ္တိုန်လဝ် လ္တူတွေတ်တာ “PRC (ဍုၚ်ကြုက်) ထပ်တပ်ဒဏ်ကၟာတ်လဒဵုထောံအဲ အလန်ဒုတိယပၠန်ယျ” မဒှ်ရ။
သ္အာၚ်နူဂှ်ပၠန် ဍုၚ်ကြုက်ဝွံ ကေၚ်ဖျေံစၟတ်လဝ် ပရေၚ်တပ်ဒဏ်ကၟာတ်လဒဵု လအာတုပ်သာ်ဏံ ကု The Prospect Foundation နူကဵုဝန်ဇၞော်တြေံကာဍုၚ်သ္အာၚ်ထိုၚ်ဝါန် မသ္ကိုပ်သ္ကဂှ်ကီုရ။
ဂကောံဗော်သွး မသၠုၚ်ပ္တိုန်ဒၟံၚ် တၚ်ဒုၚ်ဂိုၚ်ကေတ် “ပရေၚ်ဗၠးၜးထိုၚ်ဝါန်” ပ္ဍဲကဵုဍုၚ်သ္အာၚ်တံဂှ် ဒဒှ်ရရုၚ်ကေၚ်ကာတိုၚ်ပေကြုက် စောဲစပ်လဝ်ဂှ် မဳဒဳယာကၟိန်ဍုၚ်ပိုၚ် ထ္မံက်ထ္ၜးလဝ်ရ။
တုဲကၠုၚ် ပ္ဍဲဂိတုအဝ်ဂါတ်တေံ ကြဴနူဥက္ကဌကၠတ်ထဝ်သၟဝ် အမေရိကာန်တြေံ နာန်ဇြဳပဳလောဇြဳ အာစိုပ်ဂေတ်ဝေၚ်ထိုၚ်ဝါန်တုဲဂှ် နူကဵုဍုၚ်ကြုက် နဒဒှ်ဖျေံကဝုဗျိပၠုတ်တုဲ သီုကဵုညးကီု သၞာဲဒဴထိုၚ်ဝါန်တံကဵု အမာတ်ခၞံသၞောဝ် ထပှ်တၠတံဂှ် ကေၚ်ဖျေံစၟတ်လဝ် ပရေၚ်တပ်ဒဏ်ကၟာတ်လဒဵု သီုကဵုပါလုပ် ကၟာတ်လဒဵုအခေါၚ်လုပ်ဍုၚ်တံရ။
ဍုၚ်ကြုက်ဝွံ စၟတ်လဝ် ထိုၚ်ဝါန် နဒဒှ်တိဍာ်အပိုၚ်ဇကုတုဲ ဍုၚ်တၞဟ်ခြာမွဲဟွံသေၚ်ပုဟ်ဂးကီုလေဝ် အလဵုအသဳထိုၚ်ဝါန်ဂှ် ကယျာန်ပါဲလဝ် ဂလာန်ဍုၚ်ကြုက်ဝွံရ။
သၞာဲဒဴကဆံၚ်လ္တူ ထိုၚ်ဝါန်တံဂှ် ပ္ဍဲထိုၚ်ဝါန်ဂှ် ရုၚ်သၞောဝ်ဓဝ်ကြုက်တံ အခေါၚ်စဳရေၚ်ဟွံမွဲကီုလေဝ် ပရေၚ်ကၟာတ်လဒဵုတပ်ဒဏ်ကြုက်ဂှ်ဝွံ ဖဵုအဆက် မစှ်ေကဵုနတဲ ညိညဓဝ်ဟေၚ် နွံဏောၚ်ဂှ် သ္ဂးလဝ်ရ။
အမာတ် DPP ချံၚ်တိုၚ်အေန်ဂှ် ပရေၚ်ကြုက် တပ်ဒဏ်ကၟာတ်လဒဵု ကုညးစၞးထိုၚ်ဝါန်ဂှ်ဝွံ အဓိပ္ပာယ်ဟွံမွဲ ဟီုဂးလဝ်တုဲ “ညအ်ဂှ် အရာမဇီုကပိုက်လ္တူညး ဟွံမွဲပုဟ်” ဂှ် ဟီုဂးလဝ်ကဵု အ္စာပရိုၚ်တံ ပ္ဍဲကဵုကၠတ်ထဝ်ရ။
Ref: CNA