ဍာ်ဗု၊ ဨဗြဴ(၉)
ရးဒေသဇၞော်တၞၚ်သဳ၊ ခရိုၚ်ထဝါဲ၊ ပွိုၚ်ဍုၚ်ဍာ်ဗု၊ မၞိဟ်တြုံ ကောန်ကွာန်ဇြာဒဳမွဲတၠဂှ် ဒပ်ပၞာန်ဍာ်မောရဝတဳ ဖျေံသ္ဇိုၚ်ကာန်ပေါက် ပန်ဂစိုတ်လဝ် သီုကဵုဟိုတ်ဟၟဲမွဲသာ်ရဂှ် ညးဒေသတအ် ဟီုကဵု ဌာန်ပရိုၚ်သြၚ်လောန်တိုၚ်ရ။
ဂိတုဨဗြဴ တုဲကၠုၚ် စၟတ်တ္ၚဲ ၆ အခိၚ်ဗ္တံဂှ် ကိုဝ်အောၚ်ကိုဝ် အာယုက် (၂၇) သၞာံ ဃောကလေၚ်စဴကၠုၚ် နူကၠအ်ခၜိုတ် နွံဗ္ဒာဲကွာန်ဇြာဒဳဂှ် ဆဵုဂဗကဵု ကွဳစက်ပၞာန် နူဒပ်ဍာ်မောရဝတဳ (၃)ဖ္ဍိုက်တုဲ ဟိုတ်ဟၟဲမွဲသာ် ဒးဒုၚ်ပန်လဝ် နကဵုလွဟ်ရ။
ဒပ်ကံၚ်ဇြဳပၞာန်ဂှ် ကြဴနူပန်ဂစိုတ် ကိုဝ်အောၚ်ကိုဝ် ကဵုလွဟ်တုဲ ကွဳလိုန်ဓာတ်ကီု သီုကဵုဇွ ပ္ဍိုက်စုတ် လ္တူကွဳစက်တုဲ ကေတ်ဏာလဝ် ပ္ဍဲဒပ်ရ။
ကြဴနူဂှ် ပ္ဍဲဂိတုဨဗြဴ စၟတ်တ္ၚဲ (၇)ဂှ် ဟိုတ်နူကဵုနၚ်ပရိုၚ် ကုဂကောံကၟိန်အိန်ညး သွက်ဂွံကၠုၚ်ကေတ် ဇွကိုဝ်အောၚ်ကိုဝ်ဂှ်ရ အာကေတ်လဝ် နကဵုကွဳစက်ပ္ဍိုက်မၞိဟ်ယဲတုဲ စံၚ်လဝ်ဇွ ဂြးလဝ်ဇုတ် ပ္ဍဲသုသာန်ကွာန်ဇြာဒဳရဂှ် ညးဒေသတအ် ဟီုသ္ဂးလဝ်ရ။
ကိုဝ်အောၚ်ကိုဝ် ချိုတ်အာလဝ်ဂှ် ဒှ်ကောန်ကမၠောန်ကၠအ်ခၜိုတ်မွဲတၠတုဲ ကောန်ၚာ်သၟတ်အာယုက် (၄)သၞာံ မွဲတၠကီု သမ္ဘာညး သီုဒၟုၚ်ဒၠေၚ်မွဲတၠ သှ်ေသၟေဟ်ဒၟံၚ်ရဂှ် ဂွံတီကေတ်ရ။
အတိုၚ် Southern Monitor မဒှ်ဂကောံသုတေသနဂှ် ဟီုဂးလဝ်မ္ဂး ကြဴနူဒပ်ပၞာန်သီအဝဵုတုဲ ပ္ဍဲရးဒေသတၞၚ်သဳ ကောန်အရာပ်ညးဍုၚ်ကွာန် ၄၀၀ တၠပြၚ် ဒးဒုၚ်ပြိုက်ဂစိုတ်လဝ်ရဂှ် လလောၚ်တြးလဝ်ရ။
ပရိုၚ်-သြၚ်လောန်တိုၚ်(မ်)