တၞၚ်သဳ၊ ဨဗြဴ(၉)
ရးဒေသဇၞော်တၞၚ်သဳ၊ ပွိုၚ်ဍုၚ်တၞၚ်သဳ၊ ပ္ဍဲဗ္ဒာဲကွာန်ချောၚ်ညဳနောၚ်ဂှ် ဂိတုဨဗြဴ စၟတ်တ္ၚဲ (၈) အခိၚ်နူဂယးဂှ် ရေၚ်ယာဉ်ကွဳစက်ဇွောံမ ကံၚ်ဇြဳပၞာန် ဒးဒုၚ်ဗတိုက်လဝ်ရဂှ် ညးတာလျိုၚ် ဒပ်စဵုဒၞာညးဍုၚ်ကွာန်တအ် ဟီုကဵု ဌာန်ပရိုၚ်သြၚ်လောန်တိုၚ်(မ်)ရ။
တ္ၚဲဂှ် အခိၚ်နူဂယး ၜိုတ် (၇)နာဍဳ ရေၚ်ကွဳစက်ဇွောံမ ကံၚ်ဇြဳပၞာန် (၄)ဖ္ဍိုက် နူပွိုၚ်ဍုၚ်ဗိက် စှ်ေကၠုၚ်လ္ပာ်ပွိုၚ်ဍုၚ်ဗုက်ပျေန်ဂှ် ဒပ်ပံၚ်ကောံ ဒပ်စဵုဒၞာဒေသတအ် ကြတ်ဗတိုက်လဝ်ရ။
ဟိုတ်နူကြတ်ဗတိုက်လဝ်ဂှ်ရ ပေါဲဗတိုက်ၜါလ္ပာ် က္တဵုဒှ်လဝ် ပွိုၚ်မွဲနာဍဳပြၚ်တုဲ လ္ပာ်ကံၚ်ဇြဳပၞာန် ဟွံအောန်နူ(၅)တၠ ဇီုကပိုက်ဒးလဝ် နွံမာန်ရဂှ် ဟီုသ္ဂးလဝ်ရ။
ရေၚ်ကွဳစက်ဇွောံမ ကံၚ်ဇြဳပၞာန် ဒးဒုၚ်ကြတ်ဗတိုက်လဝ်ဂှ် ကပှ်ပတိုန်လဝ် ကောန်ဒပ်ကံၚ်ဇြဳပၞာန် ညးဒးလဝ်ဝပ်တအ် လ္တူကွဳစက်တုဲ ၜိုန်ရဆက်တိတ်အာ လ္ပာ်ပွိုၚ်ဍုၚ်ဗုက်ပျေန်ကီုလေဝ် ကၠေံဒၟံၚ် ပ္ဍဲကဵုအကြာဂၠံၚ်ရဂှ် ညးတာလျိုၚ်ဒပ်စဵုဒၞာညးဍုၚ်ကွာန် ပွိုၚ်ဍုၚ်တၞၚ်သဳမွဲတၠ ဟီုသ္ဂးလဝ်ရ။
ဂိတုဨဗြဴ စၟတ်တ္ၚဲ (၇) တုဲကၠုၚ် အခိၚ်နူဂယးဂှ်လေဝ် ဒပ်ကံၚ်ဇြဳပၞာန် ဇြဟတ်မၞုံ (၄၀) ပြၚ် ထ္ပက်ကၠုၚ်ကရောၚ်ပၞာန်တိုက် လ္ပာ်ကွာန်တုၚ်ခေါန်(သိန်းခွန်) နူကဵုဍုၚ်တၞၚ်သဳဂှ် PDF တအ် ကြတ်ဗတိုက်လဝ် ပ္ဍဲဗ္ဒာဲကွာန်လေဝ်တောၚ်ယာတုဲ ကောန်ဒပ်ကံၚ်ဇြဳပၞာန် (၁)တၠ ဒးချိုတ်လဝ်တုဲ ဒးလဝ်ဝပ် (၁)တၠရဂှ် ဂွံတီကေတ်ရ။
ပ္ဍဲပွိုၚ်ဍုၚ်တၞၚ်သဳ သ္ပတံနူဂိတုမာတ်ချ် တုဲကၠုၚ်ဏံ ဟိုတ်နူဒပ်ကံၚ်ဇြဳပၞာန် ထ္ပက်စှ်ေဒၟံၚ်ပၞာန် ဇၞော်ကဵုဇြဟတ်ဂှ်ရ ပေါဲဗတိုက်တအ် ဆက်က္တဵဒှ်ဒၟံၚ် အရိုဟ်ဒဒှ်တ္ၚဲကီု ညးဒေသကဵုလ္ၚီ ဒးဂြိပ်ဒဴ ပါဲဓလေတ်ဒၟံၚ်ရ။
ဟိုတ်နူပေါဲဗတိုက် သာတုဲ သ္ကာတ်မြဟ်ကၠုၚ် မာန်ဒၟံၚ်ဂှ်ရ သွက်ဟွံဂွံတတ်ကၠောံ အာကၠုၚ် ဂၠံၚ်ဇၞော်ကၟိန်ဍုၚ် ဗိက်-ဗုက်ပျေန် ပွိုၚ်ဍုၚ်တၞၚ်သဳ ကေုာံ ဂၠံၚ်ကွဳစက် ထုမ်ခါ-မဝ်တောၚ်ဂှ် ဒပ်ပၞာန်စဵုဒၞာညးဍုၚ်ကွာန် (ခရိုၚ်ဗိက်) တံဒပ် လၟိဟ်(၂) လလောၚ်ပ္တိတ်လဝ် တၚ်ကဵုသတိ နဒဒှ်ကာတၟေၚ် ပ္ဍဲဂိတုဨဗြဴ စၟတ်တ္ၚဲ (၂) တုဲကၠုၚ်ဏံရ။
ပရိုၚ်- သြၚ်လောန်တိုၚ်(မ်)
ဗီုရုပ် – Dawei PDF