“နကဵုအဲ မိက်ဂွံအာတ်မိက် ညးဍုၚ်ကွာန်တအ်ဂှ် သၞာံ ၂၀၂၃ ဏံ ပရံၚ်လဝ်စိုတ်ညိ မိက်ဂွံအာတ်မိက်ဏာရ။ သၞာံဏံမွဲသၞာံဂှ် နလညာတ်အဲညးမွဲတှ်ေ သၞာံ ၂၀၂၃ ဏံ သွဟ် မံက်ကၠုၚ်ခိုဟ်ဟ်ဏောၚ် ညာတ်ကေတ်ရ”

တၚ်ဆက်စၠောံသၟာန်သွဟ်လဝ်ကဵု ဗိုလ်ပျာန်လွှာ က္ဍိုပ်သ္ကိုပ်ဒပ်လ္ပာ်ပျာန်လွှာ ညးမဒှ် ဒု-သ္ကိုပ်ဒပ်လ္ပာ်၊ ဒပ်လ္ပာ်ကျာဖျူ – ၃၊ ကရောၚ်ပၞာန်ကျာဖျူ။

ဒပ်ပျာန်လွှာဂှ် ဒှ်ဒပ်ရပ်ကေတ်လွဟ် ၜိုတ်ဒှ်ကဵုဒှ်တုဲ ပၠန်ဂတးဒၟံၚ်ကဵု သၞောတ်တၠအဝဵုပၞာန် မွဲဂကောံတုဲ ချဳဒရာၚ်ဒၟံၚ်ပရေၚ်ပၞာန် ပ္ဍဲတွဵုရးကရေၚ် ခရိုၚ်ကအ်ကြိက်ရ။ အခိၚ်လၟုဟ်ဏံ ဒပ်ပျာန်လွှာဂှ် ညံၚ်တၠအဝဵုပၞာန်ဂွံပြဟ်ဒတုံစှ်ေ ပံၚ်တောဲကဵုဂကောံမိတ်တအ်တုဲ လုပ်ဒၟံၚ်ပေါဲဗတိုက်ရ။ ဟိုတ်ဂှ် အကာဲအရာဟိုတ်ဂွံဖျေံကၠုၚ်သ္ဂုတ်သွာတ် သွက်ဂွံပၠန်ဂတးရပ်လွဟ်ကီု၊ အခက်ခုဲဒးဒုၚ်ဆေၚ်ဒၟံၚ်မုက်ကီု သီုကဵုဂလာန် မုမိက်ဂွံဟီုဗ္ကန်ကဵု ညးဍုၚ်ကွာန်တအ်ရော။ စပ်ကဵုအကာဲအရာဏံတုဲ ဆက်စၠောံသၟာန်သွဟ်လဝ်ကဵု က္ဍိုပ်သ္ကိုပ်ဒပ်လ္ပာ်ပျာန်လွှာ ညးမဒှ် ဒု-သ္ကိုပ်ဒပ်လ္ပာ်။ ဒပ်လ္ပာ်ကျာဖျူ – ၃၊ ကရောၚ်ပၞာန်ကျာဖျူ ဗိုလ်ပျာန်လွှာရ။

-ကိုပ်ကၠာအိုတ်ဏံ နကဵုတၚ်ရန်တၟံဗီုလဵု ဗိုလ်ပျာန်လွှာ ဂွံပါလုပ်ကၠုၚ် ပ္ဍဲပရေၚ်ပၠန်ဂတးဏံရော။

ဗီုပြၚ်လဵု ဂွံပါလုပ်ကၠုၚ် ပ္ဍဲပရေၚ်ပၠန်ဂတးဏံရောတှ်ေ စတမ်ကၠုၚ်နူ ထ္ၜးဆန္ဒရ။ ပ္ဍဲဒေသပိုဲဂှ် CDM တအ် နွံဂၠိုၚ်ဒၟံၚ်။ ဃောစဵုဒၞာကဵုဒၟံၚ်၊ မၚ်မွဲရံၚ်စံၚ်ကဵုဒၟံၚ် CDM တအ်ဂှ် ပ္ဍဲဂိတုပန် စၟတ်တ္ၚဲ၁ ဂှ် နကဵုစိုတ်သမ္တီ ဒေါံဟွံဂွံ ဒးစဵုဒၞာကဵုညးတအ်ပေၚ်ပေၚ်ဏောၚ်ဂးတုဲ လုပ်ကၠုၚ် ပ္ဍဲပရေၚ်ပၠန်ဂတးဏံ ပေၚ်ပေၚ်ရ။ ကၠာနူဟွံဂွံလုပ်ကၠုၚ် ပ္ဍဲပၠန်ဂတးဏံဂှ် ဒှ်က္ဍိုပ်သ္ကိုပ်သၟတ် ပ္ဍဲကွာန်ပိုဲဂှ်၊ ဥက္ကဌသၟတ်ရ။ သွာၚ်လ္ပာ်သၟတ်တအ်ဂှ်တှ်ေ ကၠုၚ်ဂြဟ်ဒၟံၚ်ကဵုအဲရ။ သၟတ်တအ်ဂှ် ဒးစဵုဒၞာဏောၚ်လေဝ်။ ဃောစဵုဒၞာဒၟံၚ်ဂှ် ဒှ်ပါလုပ်ကၠုၚ် ပ္ဍဲပၠန်ဂတးရ။ တုဲပၠန် ကောန်ၚာ်တအ်ဂှ်လေဝ် ဟွံမိက်ဗလးပုဟ်။ ကောန်ၚာ်တအ်ဂှ်တှ်ေ ဍောတ်လောန်ဒၟံၚ်။ ပ္ဍဲကဵုတန်ဗ္တောန် KNU ဂိတုပန် စၟတ်တ္ၚဲ(၁)ဂှ် အဲ ဒှ်မၞိဟ်ဇၞော်အိုတ်ရ။

အဲဂွံအာယုက် ၄၃ သၞာံယျ။ ပဋိပက္ခပရေၚ်ဍုၚ်ကွာန် ပရေၚ်သီအဝဵုတအ်ရ။ ပိုဲဂှ် နကဵုလညာတ်ဇကုမွဲတၠဓဝ် ဟွံသေၚ် အခိၚ်ဂွံဆဵုကေတ် ကောန်ၚာ်တအ် ပ္ဍဲပရေၚ်ပၠန်ဂတးဏံ နဒဒှ်ဂကောံညးဒေသ ဒးဘိုၚ်ထိၚ်ဒဝ်အာဍေံတအ်ဏောၚ် နကဵု စိုတ်သမ္တီဗီုဏံရ။ မၞိဟ်ပိုဲတီ၊ ဒေံပိုဲ၊ ကောန်ပိုဲ ညံၚ်ဂွံစိုပ်ဂၠံၚ်တရဴဍာံမာန်ဂှ် ပ္ဍဲဒေသပိုဲ မုဒှ်စလေပ်။ မုနွံဒၟံၚ်ရောဟီုဂှ် ပိုဲ သာတုဲတီရ။ အတိုၚ်အကာဲအရာတိဍာ် အရာတအ်ဏံ ညံၚ်ဟွံဂွံမှာရာအာ ၜိုတ်သ္ပမာန် ညံၚ်ဂွံဘိုၚ်ထိၚ်ဒက်ကဵုတုဲ ပါလုပ်ကဵုလဝ်ရ။ မုဒှ်ဂွံပါလုပ်ကၠုၚ် ပ္ဍဲပရေၚ်ပၠန်ဂတးဏံပေၚ်ပေၚ်ရော ယဝ်ရဒးဟီုကၠးကၠးတှ်ေ ဟိုတ်နူကၠောန်လဝ် ဟွံဒးရ။ ဟွံဒးဟွံဍာံ အရာထေက်ကဵုကၠောန်ဟွံသေၚ်ဂှ် ကၠောန်ဏောၚ်တှ်ေ နကဵုညးဍုၚ်ကွာန်မွဲ ဗီုလဵုလေဝ် ဒုၚ်တဲဟွံမာန်ရ။ ရံၚ်ကဵုကောန်ၚာ်တအ်တုဲ သာတုဲ ဒုၚ်စသိုၚ်ဝါတ်ရ။ ပ္ဍဲအဲလေဝ် အိန်ထံၚ်နွံဒၟံၚ်။ ပရေၚ်ပိုန်ဒြပ်နွံဒၟံၚ်။ ဗလးထောံအရာတအ်ဏံတုဲ စဵုကဵုလၟုဟ် ပွိုၚ်ၜါသၞာံပေၚ်ၚ် ပ္တိတ်ဒၟံၚ်ဇြဟတ်ဖိုဟ်ရ။ စဵုကဵုအံၚ်ဇၞး တိုၚ်ပ္ကဴဂှ်လေဝ် စဵုကဵုစိုပ် သွက်ဂွံဆက်အာ ချပ်ဂၞန်ကဵု ကောၝဲဒေံတအ်သီုဖအိုတ်တုဲ  ဒှ်တက်ဒၟံၚ်ကျာ အရိုဟ်ရိုဟ်တ္ၚဲ ဒှ်ဒၟံၚ် ဗီုကောဒေံအရၚ်ရ။

-ကၠာတေံတှ်ေ နကဵုညးကၠောန်ဒၟံၚ် ကမၠောန်ပရဟိတမွဲတၠ မုဟိုတ်ဂွံဒှ်ရုဲစှ်လဝ် ဂၠံၚ်တရဴရပ်လွဟ်ရော။

ပထမဂှ်တှ်ေ ၜိုတ်စဵုဒၞာ ကွာန်ညိညဓဝ်ရ CDM ဇိုၚ်ကွာန်တအ်ဂှ်တှ်ေ သီုကဵုဟွံရပ်လွဟ်မွဲသာ် ယဝ်ရဒးဟီုတှ်ေ သွက်ဂွံထိၚ်ဒဝ်ကဵု နဲကဲခိုဟ်ဟ်ရ။ ဆ္ဂးဂှ် မွဲလ္ပာ်တေံ ဟွံဒုၚ်တဲပုဟ်။ ပိုဲဂှ် သွက်ဂွံရုဲစှ် လ္တူနူဏံ ဟၟဲရပုဟ်လေဝ်။ ကဵုတဲသၟးတှ်ေ ဒးသၠးထောံလမျီု ဗွဲမဂၠိုၚ်မာန်ဏောၚ်၊ ကဵုလေံတှ်ေ လေံကီု၊ မြတှ်ေ မြကီု၊ မုဍေံတအ်ရပ်ရောရ။ မဍေံတအ်ရပ်ဂှ် အခိၚ်ဒုၚ်ဒဝ်ဒၟံၚ် ဒှ်ရုဲစှ်လဝ် ဂၠံၚ်တရဴရပ်လွဟ်ဏံရ။

-တုဲပၠန်မွဲဂှ်တှ်ေ ဗိုလ်ပျာန်လွှာဂှ် ကမၠောန်ပရဟိတလေဝ်ကၠောန်ဒၟံၚ်။ အ္စာယှိုဲယေန်ကျဝ် မွဲတၠလေဝ်ဒှ်ဟီုတှ်ေ ဒးရပ်လွဟ်ဏံ အခက်ခုဲဗီုလဵု ဒးဆဵုဂဗလဝ်ရော။

အဲဂှ်ယဝ်ဒးဟီုတှ်ေ အ္စာဂိုဏ်မွဲရ။ အ္စာဂိုဏ်ယှိုဲယေန်ကျဝ်မွဲရ။ ကွးအဲ နွံဒၟံၚ်ၜိုတ် ၄၀၊ ၅၀၊ ၆၀ ရ။ နကဵုအ္စာမွဲ အခိၚ်ကၠောန်ဒၟံၚ်ပယောဂတအ်ကီု သီုကဵုစမြိုၚ်သာသနာ သာသနာညံၚ်ဂွံတန်ကြန် ၜိုတ်သ္ပမာန်ဂှ် သွက်ဂွံပၠန်ဂတးရပ်လွဟ် ဗီုဏံဟီုဂှ်လေဝ် မွဲလှ်ေမှ ဟွံကေၚ်ချပ်လဝ်ပုဟ်။ မွဲလ္ပာ်ပၠန်ဂှ်လေဝ် ကာကုသိုလ်တအ် ဂၠိုၚ်ဒၟံၚ်ကီု စပ်ကဵုဂိုဏ်တုဲ နကဵုအဲဒးပ္တိတ်လဝ် တံရိုဟ်သၞာံတၟာဂလိုၚ်တုဲ ရပ်လွဟ်တုဲ အခိၚ်ဒးကလေၚ်ပၠန်ဂတးဂှ် နကဵုအဲတှ်ေ ဗီုလဵုဂွံဟီုရောဂှ် ဟွံတီရ။ ဂၠံၚ်တရဴပရေၚ်ရပ်လွဟ်ကဵုပရဟိတဂှ် တၞဟ်ခြာဒၟံၚ် ဗီုတိကဵုအကးရ။ ပရဟိတပိုဲကၠောန်ဒၟံၚ်ဂှ် ဒးအာနကဵုဗီုပြၚ် ဗုအးလ္ဂူတပ်တးရ။ ဒးပြံၚ်သၠာဲလဝ် တၟာကလှ်ေရ။ ကောန်ၚာ်တအ်ဂှ် သတ္တာဟဏံ ပြဟ်လလုဲအာလဝ်ရ။ ကောန်ၚာ်အဲ ဒးပြဟ်လလုဲလဝ် အလန်ကၠာအိုတ်ရ။ ချိုတ်လဝ်ကၠာအိုတ်ရလေဝ် အရိုဟ်ဟ်ပေါဲဗတိုက် ၜိုတ်ဘဲဝပ်ရ ကေၚ်ဒးလဝ်။ ဗတိုက်လဝ် ထိၚ်ၚ်ဒဝ်ဝ်ရ။ လကြဴညံၚ် ဟွံဂွံဒးပြဟ်လလုဲဂှ် ပိုဲဒှ်ဒၟံၚ်ဗီုပြၚ် လကိုဟ် တက်ဗဗိုန်ယျ။ စိုတ်အရိုၚ်တအ်လေဝ် လုပ်ကၠုၚ် ပ္ဍဲအဲမွဲလစုတ်ဓဝ် ဟီုစဂွံရ။ ဒးပြံၚ်ကၠောံဂှ် ဝါတ်ဂါတ်ဒၟံၚ်။ အကြာပရဟိတကဵု ပရေၚ်ပၠန်ဂတးဂှ် ယဝ်ရဒးကလေၚ်ဟီုတှ်ေ ဒဵုကဵုဟီုဟွံဒး ဒးသၠးထောံလဝ် သီုဖအိုတ် ဒးဟီုရ။

-နကဵုဒပ်ပျာန်လွှာ ပြဟ်ဟ်ဏံ ဒးဆေၚ်ဒၟံၚ်မုက်ကဵု တၚ်အခက်ခုဲ ဗီုပြၚ်လဵုရော။ တုဲပၠန် အာဂတနူဏံ မုသွက်ဂွံရေၚ်တၠုၚ်အာ နွံရော။

ဒပ်လ္ပာ်ပိုဲဂှ် ဒက်ပ္တန်လဝ်ကဵု ကောန်ဍုၚ်အရၚ်ညးဒေသတအ်ဂၠိုၚ်ရ။ ကၠုၚ်နူတွဵုရးတအ် အောန်ဒၟံၚ်။ ပိုဲဂှ် ဗီုရုပ်ဂမျိုၚ်တအ်၊ စၟတ်သမ္တီတအ် ဟွံဒှ်ပတိုန်လဝ် ဂၠိုၚ်ၚ်ပုဟ်။ ဂွိၚ်ဟွံသေၚ်။ ကဵုသၞမွဲလ္ပာ်တေံဂှ် ခြာကြုၚ်မွဲတၞုၚ်ဓဝ်ရ။ အခိၚ်ပိုဲဒးတိတ်မုက်ပၞာန်တှ်ေ ဂကောံကၟိန်အိန်ထံၚ်တအ်၊ ဟိုတ်နူတံၚ်ဂြဲလဝ် ညးတၠဒါန်တအ် အခိၚ်ပေၚ်ၚ်မာန်ဂှ်ရ ပ္ဍဲပွိုၚ် ၂ သၞာံ လုပ်ကၠုၚ်ပလာပ်ပထုဲပိုဲဂှ် ဟၟဲရ။ မံၚ်ဒၟံၚ်ထိၚ်ၚ်ဒက်က် ဂွံဒၟံၚ်ရ။  တၚ်ဍိုၚ်လျပိုဲဂှ် ညးတၠဒါန်တအ်နိမန်တုဲ ဟွံကော်ဘိက်ဂှ်ရ ခက်ခုဲဒၟံၚ် ဇၞော်ကဵုဇြဟတ်ရ။ ဒပ်လ္ပာ်ပျာန်လွှာပိုဲ စဒၟံၚ် သွသှ်ေသၟေဟ် ပ္ဍဲဘာလကျာ်ရ။ ဒဵုကဆံၚ်ဏံ ဝါဂါတ်ခက်ခုဲဒၟံၚ်ရ။ ဒးကၠောဝ်စၞစတုဲ ညံၚ်လွဟ်မကမ်ဂွံပေၚ် ပကောံပကေဝ်လဝ် မာန်ကၠုၚ်ရ။ ဟိုတ်နူဒုၚ်လဝ်ဒဒိုက်ဗီုဏံလေဝ် ယဝ်ရဗတိုက်ဏောၚ်တှ်ေ ဒှ်ဒၟံၚ်ဒတုဲရ။ ဆ္ဂး တၚ်နွံပၟိက်ဂှ် နွံဒၟံၚ် တၟာဂလိုၚ်ဏီရ။ သနိုက်ပါတအ် ခိုဟ်ဟ်ဟၟဲဏီပုဟ်။ မိက်ဂွံဂွံဒၟံၚ်ဂှ်တှ်ေ သနိုၚ်ပါတဲခိုဟ်မွဲဒကိုအ် မိက်ဂွံဂွံရ။ သနိုက်ပါ ပိုဲပန်ဒၟံၚ်လၟုဟ်တှ်ေ သနိုၚ်ပါညးတၞဟ်ပန်လဝ်တုဲတုဲတြေံတြေံဂှ်ရ ဟီုတှ်ေ ဗွိုၚ်ပန်လေဝ် ဟွံဍာံပုဟ်။ တၚ်ဍိုန်လျပိုဲ ဗီုဏံဂှ် နွံဒၟံၚ်ရ။ လွဟ်မကမ်ဂှ်ဟီုတှ်ေ ၜိုတ်သ္ပမာန် ဗပေၚ်ကဵုလဝ် သ္ဂံၚ်ပိုဲရ။ ညံၚ်ဂွံရုမ်ဂပ်လေဝ် ဖ္ဍိုက်ဗပေၚ်ကဵုလဝ်ရ။ ဗီုကဵုတၠဒါန်လၟေၚ်ၚ်ဂိတုတအ်ဂှ် ပ္ဍဲကဵုပိုဲ စဵုကဵုလၟုဟ် ဟၟဲဏီ။ ဒတူလာၚ်ကၠုၚ်ဒၟံၚ် အတိုၚ်ဏံရ။

-လကြဴအိုတ်ဏံမုမိက်ဂွံထပ်ဟီုဗပေၚ်ကဵုညးဍုၚ်ကွာန်တအ်နွံရော။

ပိုဲတအ်လေဝ် ညှာဒၟံၚ်စိုတ်ကဵု ညးဍုၚ်ကွာန်တအ် ဗွဲမလောန်ရ။ ညှာစိုတ်ဟီုဂှ် ပ္ဍဲပွိုၚ်၂ သၞာံဏံ ဇြဟတ်ညးဍုၚ်ကွာန်တအ် စိုပ်ကၠုၚ်ဒၟံၚ် အခိၚ်အိုတ်ဍာ်အှော်ယျ။ ဖျုန်ဆီ နွံဒၟံၚ်ပ္ဍဲညးတအ်သီုဖအိုတ်ဂှ် ပိုဲကၠိုဟ်ဒၟံၚ်ရ။ ပိုဲကၠးကေတ်ဒၟံၚ်ရ။ ပိုဲလေဝ် ချိၚ်ခယျကေတ် ဒးဒၟံၚ်ရ။ ပိုဲမိက်ဂွံအာတ်မိက် မွဲတၚ်ဂှ်တှ်ေ နကဵုအဲမိက်ဂွံအာတ်မိက် ညးဍုၚ်ကွာန်တအ်ဂှ် သၞာံ ၂၀၂၃ ဏံ ပရံၚ်လဝ်စိုတ်ညိ မိက်ဂွံအာတ်မိက်ဏာရ။ သၞာံဏံမွဲသၞာံ နကဵုလညာတ်အဲညးမွဲတှ်ေ သၞာံ ၂၀၂၃ ဏံ သွဟ်မံက်ကၠုၚ် ခိုဟ်ဟ်ဏောၚ် ညာတ်ကေတ်ရ