ဟိုတ်နူပေါဲဗ္တိုက်ဂမၠိုၚ်တုဲ ညးပါဲဒဴဘဲပၞာန်ကရေၚ်တံ တၚ်နွံပၟိက် ဇွောံမစၞစ ကေုာံ ဂဥုဲဇဗတံ သာသၠုၚ်တိုန်ကၠုၚ်

ဗြဝတဳ၊ ဨပရဴ (၉)

ဟိုတ်နူအကာဲအရာပဋိပက္ခပရေၚ်ပၞာန် မက္တဵုဒှ်ဒၟံၚ် အပ္ဍဲတွဵုရးကရေၚ်တံ သာသ္ကာတ်မြဟ်ကၠုၚ်ဂှ်ရ သွက်ညးပါဲဒဴဘဲပၞာန်တံဂှ် နွံပၟိက်ဒၟံၚ်ကဵု အရီုဗၚ်ဇွောံမစၞစ၊ ဂဥုဲဇဗ အရီုဗၚ်ပရေၚ်ဗ္စာရဏာမၞိဟ်တံရောၚ်ဂှ် ဂကောံအခေါၚ်အရာမၞိဟ်ကရေၚ် KHRG ဟီုကဵု ဌာန်ပရိုၚ်သြၚ်လောန်တိုၚ်(မ်) ရ။

ပ္ဍဲကဵုတွဵုရးကရေၚ်၊ ပွိုၚ်ဍုၚ်ဗြဝတဳ၊ မွဲဒမြိပ်ဗ္ဒါဲဍုၚ်တၟိ ယှိုဲကုက္ကိုဝ်တံဂှ်ကဵု ပ္ဍဲမေဝ်ကနေဝ်၊ ဂၠံၚ်အာယှ၊ ကအ်ကြိက်၊ ပ္ဍဲဍုၚ်ကြုၚ်ဒဵုတံဂှ် အကြာဂကောံဒပ်ပံၚ်ကောံ BGF ကံၚ်ဇြဳပၞာန်တံကဵု ဂကောံဇြဟတ်ပၠန်ဂတး KNLA တံ မသ္ကိုပ်သ္ကတံဂှ် တုဲကၠုၚ်ကၞောတ်ဂိတုမာတ်ချ်တေံ ပေါဲဗ္တိုက်စက္တဵုဒှ်လဝ်တုဲ ဒဵုကဵုဂိတုဨပရဴ (၈) ဂှ် ပရေၚ်ပၞာန်ၜါလ္ပာ်တံ ဆက်ကြံၚ်မ္ၚိုဟ်ဒၟံၚ်ရ။

ဇၟာပ်ပေါဲဗ္တိုက် မက္တဵုဒှ်လဝ် အပ္ဍဲဒေသကရေၚ်တံဂှ် စွံလဝ်ပွန် လ္တူညးဍုၚ်ကွာန်ကောန်အရာပ်တံတုဲ ဟိုတ်နူဒပ်ကံၚ်ဇြဳပၞာန် ပန်ပှော်လဝ် လွဟ်ဇၞော် ကေုာံ နကဵုက္ၜၚ်ကျာတံဂှ်ရ ပွမဒးဂြိပ်ဒဴပါဲဒလေတ်ဘဲပၞာန်တံ သာဂၠိုၚ်ကၠုၚ်ရ။

အခိၚ်လၟုဟ် ပေါဲဗ္တိုက်တံ သာသ္ကာတ်မြဟ်ကၠုၚ်ဂှ်ရ တၚ်နွံပၟိက် အရီုဗၚ်ပရေၚ်ဗ္စာရဏာမၞိဟ်တံ သၠုၚ်တိုန်ဒၟံၚ်ရောၚ်ဂှ် ညးဒုၚ်တာလျိုၚ်ဆဝ်မ္ၚုဟ်စန်ဒက် ဂကောံအခေါၚ်အရာမၞိဟ်ကရေၚ် KHRG သဝ်နန္ဒသူ သ္ဂးရ။

“ဇၟာပ်ပေါဲဗ္တိုက်က္တဵုဒှ်ဂှ် လ္ပာ်ကံၚ်ဇြဳပၞာန်ဂှ်တှ်ေ ကၠောန်သ္ပပန်ပှော်ကဵုလွဟ်ဇၞော်တံ ပန်ပှော်ကြာန်န်တံဂှ် ကၠောန်ဒၟံၚ်လၟိုန်ရ။ ပရေၚ်ဇီုကပိုက်လီုလာ်တံဂှ် နွံတွဵုရဏောၚ်။ ဗွဲတၟေၚ် သ္ၚိဌာန်ကောန်ကွာန်တံ ဇီုကပိုက်လီုလာ်ဂှ် နွံဒၟံၚ်။ ကောန်ကွာန်တံဂှ်လေဝ် ဖေက်တုဲ ဒးဂြိပ်ဒဴပါဲဒလေတ်ဒၟံၚ်ရ။ ဒဵုကဵုအခိၚ်လၟုဟ် ပေါဲဗ္တိုက်တံ ဆက်က္တဵုဒှ်ဒၟံၚ်ရ။ ညးဒေသတံလေဝ် ဆက်တုဲ ဒးဂြိပ်ဒဴပါဲဒလေတ်ဒၟံၚ်ဂှ် ဗွဲတၟေၚ် နွံပၟိက်အရီုဗၚ်ပရေၚ်ဗ္စာရဏာမၞိဟ်တံဂှ် သာတုဲ ဂၠိုၚ်ကၠုၚ်ရ။ လ္တူပေါဲဗ္တိုက် မဆက်က္တဵုဒှ်ဒၟံၚ်ဂှ် ညးပါဲဒဴဘဲပၞာန် IDP မၞုံပ္ဍဲဒေသ ပရေၚ်ပၞာန်သ္ကာတ်မြဟ်ဒၟံၚ်ပြဟ်ဟ်ဏံ မွဲဒမြိပ်ဒေသဒၞါဲမေဝ်ကနေဝ်၊ ထဳမူထ၊ နအ်ဖိုဝ်၊ ကအ်ကြိက်၊ ကြုၚ်ဒဵု၊ ပွိုၚ်ဍုၚ်ကအ်ကြိက်တံဂှ်တှ်ေ နကဵုလၟိဟ်ဂၞန်မ္ဂး မုမှဟီုချိုတ်တ်ပၠိုတ်တ် ဟွံဂွံဏီပုဟ် ဟွံတီဏီပုဟ်” သာ်ဝွံ ညးဒုၚ်တာလျိုၚ်ပရေၚ်ဆဝ်မ္ၚုဟ်စန်ဒက် KHRG သဝ်နန္ဒသူ ဟီုရ။

ဟိုတ်နူပေါဲဗ္တိုက်တံ သ္ကာတ်မြဟ်ဒၟံၚ်ဂှ်ရ နကဵုညးဍုၚ်ကွာန်ကောန်အရာပ်ဂမၠိုၚ် ပပ္တံနူဂိတုဨပရဴ (၇) တေံတုဲ ပွမကၠောန်သ္ပတတ်ကၠောံအာကၠုၚ် ဂၠံၚ်ဇၞော်အာယှ ဗြဝတဳ−ကအ်ကြိက် တွဵုရးကရေၚ် မဒှ်ဂၠံၚ်တရဴ ပရေၚ်ကူသာန်သွံရာန်ပယျဵုတံဂှ် လ္ပကၠောန်သ္ပလးလးအိုတ်ဂှ် ဂကောံဒပ်ပံၚ်ကောံပၠန်ဂတးကရေၚ် ပ္တိတ်လဝ်လိက်ပၟိၚ်ပံၚ်တောဲရ။

ပ္ဍဲကဵုတိဍာ်အုပ်ဓုပ်ဗော်သွးကောန်ဂကူကရေၚ် KNU အိုဿီုဂှ် ဟိုတ်နူပေါဲဗ္တိုက်တံတုဲ ကၠာတေံ လၟိဟ်ညးဍုၚ်ကွာန်ပါဲဒဴဘဲပၞာန် နွံဒၟံၚ် ဗ္ဒါဲ (၅) ကိုဋ်ပြၚ်တုဲ ပြဟ်ဟ်ဏံဂှ် ဟိုတ်နူအကာဲအရာပေါဲဗ္တိုက် မက္တဵုဒှ်လဝ် မွဲဒမြိပ်ဂၠံၚ်ဇၞော်အာယှ ကေုာံ ဒေသယှိုဲကုက္ကိုဝ် တိဍာ်ဒပ်မဟာ (၇) တံဂှ်တုဲ ညးဍုၚ်ကွာန်ပါဲဒဴဘဲပၞာန် မ္ဒးဂြိပ်ဒဴပါဲဒလေတ်ဒၟံၚ် အပ္ဍဲတိဍာ် KNU တံဂှ်ဝွံ ဂၠိုၚ်တိုန်ကၠုၚ် စဵုကဵုဗ္ဒါဲ ၆ ကိုဋ်ရောၚ်ဂှ် သဝ်နန္ဒသူ ချိၚ်ခယျဟီုဂးလဝ်ရ။

“သီုကဵုဒပ်မဟာ(၇) ပရေၚ်ပၞာန် မသ္ကာတ်မြဟ်ကၠုၚ် ပြဟ်ဟ်ဏံဂှ်ကီု သီုဒပ်မဟာ (၇) ဒပ်တံဂှ်မ္ဂး ညးပါဲဒဴဘဲပၞာန်တံဂှ် ပြးထၞာန်ဒၟံၚ်ဟဂှ်ရ။ ချိၚ်ခယျကေတ်ဂှ်တှ်ေ ကၠာတေံဂှ် (၅) ကိုဋ်၊ လၟုဟ်ဂှ်တှ်ေ ၜိုတ် (၆) ကိုဋ်လ္ပာ်လ္တူ ချိၚ်ကေတ်ဂွံရ။ ၜိုန်ဂှ်ကီုလေဝ် လ္တူပရေၚ်ပၞာန်သ္ကာတ်မြဟ်ကၠုၚ်ဂှ်ကီု ဗွဲတၟေၚ် ပန်ပှော်လွဟ်ဇၞော်ကြာန်န် ဗ္တိုက်ကဵုက္ၜၚ်ကျာ စွံပွန်လ္တူညးဍုၚ်ကွာန်တံတုဲမှ ဗ္တိုက်ဒၟံၚ်တံ၊ ရပ်ဒက်ဂစိုတ်ဒၟံၚ် ဟွံမွဲကဵုသၞောဝ် လ္တူမကၠောန်ဒၟံၚ်တံဂှ် ဒှ်ပွဖံက်ပ္ကဝ်အခေါၚ်အရာမၞိဟ်တုဲ သီုကဵုဒှ်အမှုရာဇဝတ်ပၞာန်ရ။ သီုကဵုဖံက်ပ္ကဝ်ဒၟံၚ်သၞောဝ် ပရေၚ်ဗ္စာရဏာမၞိဟ်ဍုၚ်နာနာတံရ” သာ်ဝွံ သဝ်နန္ဒသူ သ္ဂးရ။

ဟိုတ်နူပေါဲဗ္တိုက် ဗ္ဒါဲဒေသယှိုဲကုက္ကိုဝ် မက္တဵုဒှ်လဝ် ပြဟ်ဟ်ဏံဂှ်တုဲ ပ္ဍဲကဵုညးဒေသ မ္ဒးဂြိပ်ဒဴပါဲဒလေတ်ဒၟံၚ် ဗ္ဒါဲ (၁၀၀၀၀) တံဂှ်လေဝ် လုပ်စိုပ်စ္စုဲစ္ၜော်ဒၟံၚ် လ္ပာ်ဒေသမေဝ်လမာတ် ကေုာံ ဒေသမာဲချံက် သ္ကုတ်ဍုၚ်သေံတံဂှ်တုဲ နွံပၟိက်ဒၟံၚ် သီုကဵုအရီုဗၚ်ပရေၚ်ဗ္စာရဏာမၞိဟ်တံရောၚ်ဂှ် ဂွံတီကေတ် နူကဵုဂကောံမှာဇန်ဗၟာ မရီုဗၚ်ရေၚ်တၠုၚ်ကဵုဒၟံၚ်တံဂှ်ရ။

ပရိုၚ်−သြၚ်လောန်တိုၚ်(မ်)

ဗီုဓာတ်−TLT