ချေၚ်မာဲ၊ ဨပရဴ (၉)
ကျာကၠိခ္ဍက် ဟိုတ်နူသၠုၚ်တိုန်ကၠုၚ် ဒဵုကဵုဗ္ၜတ် မသ္ကဵုဒှ်ကၠေံဘဲအန္တရာယ်တံဂှ်ရ ညးဍုၚ်ကွာန် မၞုံဍုၚ်ချေၚ်မာဲ ဍုၚ်ဇၞော် သ္ကုတ်သၟဝ်ကျာဍုၚ်သေံတံ သွက်ဂွံမံၚ်ပ္ဍဲသ္ၚိအိုတ်ဂှ်ကဵု သွက်ဂွံကၠောန်ကလောန် နူကဵုသ္ၚိ Work from Home တံအိုတ်ဂှ် သၟိၚ်တၠအဝဵုတံ ပ္ဍဲဂိတုဨပရဴ (၇) တေံ အာတ်မိက်လဝ်ရ။
ယက် မတိတ်ကၠုၚ် နူကဵုပွစံၚ်ပၟတ်ဂြိုပ် စံၚ်ဂူယာဝါဗ္ၚတံဂှ်ဝွံ ဂြောပ်ဓလီုအာလဝ် ကျာဍုၚ်ချေၚ်မာဲ မဒှ်ဍုၚ်ဒယှ်တဴ အကြာညးအာတရဴတံဂှ်ရ။
အတိုၚ်ကဆံၚ်မစၟတ်လဝ် နူကဵု IQ Air ဝါပ်သာ်မၚ်ရံၚ်ကျာ အပ္ဍဲတ္ၚဲသိုက် ပယျာံနူဂယးဂှ်မ္ဂး ဍုၚ်ချေၚ်မာဲဝွံ လ္တူနူကဵုဍုၚ်ဒေလဳ၊ ဍုၚ်လာဟိုဝ် မဒှ်ဍုၚ်ကျာကၠိခ္ဍက် မက္တဵုဒှ်ဓမ္မတာတံဂှ် လ္တူဂၠးတိဏံ ဒှ်ကၠုၚ်ဍုၚ် ကျာကၠိခ္ဍက်ဂၠိုၚ်အိုတ်ရောၚ်ဂှ် ဂွံတီကေတ်ရ။
သၞာဲဒဴအုပ်ဓုပ် ခရိုၚ်ဒေသန္တရချေၚ်မာဲဂှ် နူကဵုအမှိက် PM 2.5 ဂှ် သွက်ဂွံစဵုဒၞါ ဇကုဇကုဂှ်ကီု၊ သွက်ဂွံဖအောန်ဖျေံ လလေၚ်ဖဵုမသ္ကဵုဒှ်တဴကုပရေၚ်ထတ်ယုက်တံဂှ်တုဲ မံၚ်စံၚ်ပ္ဍဲသ္ၚိတုဲ သွက်ဂွံကၠောန်ကလောန်နူကဵုသ္ၚိအိုတ်ဂှ် လလောၚ်ပ္တိတ်လဝ် တၚ်အာတ်မိက်ရ။
ဍုၚ်သေံဝွံ ပ္ဍဲကဵုသၞာံဏံစ နူတမ်တေံဂှ်ရ ကျာကၠိခ္ဍက်ဒၟံၚ်တုဲ ပွမစံၚ်ဂူယာ ဗက်ရာသဳတံဂှ်လေဝ် ပါလုပ်ဒၟံၚ် မွဲဒကုတ်မွဲဒကဴကီုရ။
အတိုၚ်တၚ်နၚ် ဌာနဝန်ဇၞော်ပရေၚ်ထတ်ယုက်ညးဍုၚ်ကွာန်တံဂှ်မ္ဂး အပ္ဍဲသၞာံ ၂၀၂၃ ဂှ် သွက်အကာဲအရာ စပ်ကဵုဂၠံၚ်ယွီု မက္တဵုဒှ်ဟိုတ်နူကျာကၠိခ္ဍက်ဂှ် မၞိဟ်ဗ္ဒါဲ (၂) မဳလျာန် ဒးတိုန်စိုပ်လဝ်ရုၚ်ဂဥုဲ ဒးလွဳလွတ်လဝ်ရောၚ်ဂှ်လေဝ် ဂွံတီကေတ်ရ။
ပၟတ်ဂြိုပ်တူတံဂှ်လေဝ် ဒှ်ဒၟံၚ်ဟိုတ်ပရူပရာ ကျာမ္ဒးကၠိခ္ဍက် အပ္ဍဲသ္ကုတ်ဨသာန်ချေၚ်မာဲတံကဵု ချေၚ်ရာဲတံကီုရ။
သ္အာၚ်နူဂှ်ပၠန် ဟိုတ်နူကျာကၠိခ္ဍက် အပ္ဍဲဍုၚ်ဇၞော် သ္ကုတ်သၟဝ်ကျာတံဂှ်ရ ကၟုဲအာတရဴလုပ်စိုပ်တံ အောန်စှ်ေကၠုၚ်တုဲ သဝ်စှ်ေအာလဝ် စဵုကဵု (၂၀) တၟံကၠံရောၚ်ဂှ် ဒုဥက္ကဌ ဂကောံပရေၚ်ပိုန်ဒြပ်ကမၠောန်အာတရဴချေၚ်မာဲ ဟီုဂးလဝ်ရ။
သွက်ပြသၞာကျာကၠိခ္ဍက်ဂှ် သ္ကိုပ်ဝန်ဇၞော်ပရာယုတ်ဝွံ ကၠောန်ဗဒှ်လဝ် ကောံဓရီုမွဲ နကဵုဗဳဒဳယောခဝ်လ် မွဲဟာန်ကေုာံ ဍုၚ်ဗၟာ၊ ဍုၚ်လာအိုဝ်တံဂှ်တုဲ ဇြိုဝ်နေတ်ဇြေ မိတ်လာအိုဝ် ကဵု က္ဍိုပ်သ္ကိုပ်ပၞာန်ဗၟာ မေန်အံၚ်လှာၚ်တံ တိုန်စိုပ်လဝ်ရောၚ် ရုၚ်ပရာယုတ် ဟီုဂးလဝ်ရ။
နကဵုပရာယုတ် ပ္ဍဲကဵုကောံဓရီုအာဇြဳယာန်အာဂတဏံ သဳကၠဳအာ ကိစ္စကျာကၠိခ္ဍက် မၜက်ကၠောံပယျဵုတံရောၚ်ဂှ်လေဝ် ဂွံတီကေတ်ရ။
ပ္ဍဲကဵုကောံဓရီု သ္ကိုပ်ဝန်ဇၞော်သေံ ပရာယုတ်၊ လာအိုဝ် သီုကဵုပါလုပ် က္ဍိုပ်သ္ကိုပ်ပၞာန် မေန်အံၚ်လှာၚ်ဂှ် သဳကၠဳလဝ် သွက်ဂွံထပိုတ်ကၠေံ သၟုဟ်ဓာတ် မတိတ်နူကမၠောန်ကွတ်စက် ကေုာံ ပရေၚ်တဵုလွဳတံဂှ်တုဲ တၚ်တုပ်စိုတ် ချိုတ်တ်ပၠိုတ်တ် သွက်ပရေၚ်သ္ဂောံရေၚ်တၠုၚ်မွဲမွဲတံ ဟွံပါလုပ်ဏီပုဟ်ဂှ် ဂွံတီကေတ်ရ။
Ref: Straits Times