ကအ်ကြိက်၊ မေ(၁၀)
ပွိုၚ်ဍုၚ်ကအ်ကြိက် တိဍာ်ဗော်သွးကောန်ဂကူကရေၚ် KNU ဒပ်မဟာ(၆) ဂှ် မွဲၜါတ္ၚဲဏံ ဟိုတ်နူကောန်ဒပ်ကံၚ်ဇြဳပၞာန် ပန်ဖျေံလွဟ်ဇၞော်တုဲ ကောန်အရာပ်ညးဍုၚ်ကွာန် ဒးချိုတ်လဝ် (၁)တၠတုဲ ဒးလဝ်ဝပ် (၈) တၠရဂှ် ဂွံတီကေတ်နူတမ်ရိုဟ်တၚ်ဂၞၚ်ပရိုၚ်ဒေသဂှ်ရ။
ဒပ်ကံၚ်ဇြဳပၞာန် ပန်ဖျေံဒၟံၚ်လွဟ်ဇၞော် ပ္ဍဲကွာန်မၞုံပွိုၚ်ဍုၚ်ကအ်ကြိက်တအ် အရိုဟ်ဒဒှ်တ္ၚဲတုဲ ဂိတုမေ ပ္ဍဲစၟတ်တ္ၚဲ (၅) တုဲကၠုၚ်ဏံဂှ် ဒၟာနူလွဟ်ဇၞော် ဒတုမ်ပြဟ်ခတိုဟ်လဝ် ပ္ဍဲကွာန်ကမိုၚ်ကုမ် မၞုံဗ္ဒာဲဍုၚ်ကအ်ကြိက်တုဲ ညးဗြဴကောန်ဒေသဂှ် (၂) တၠ ဇီုကပိုက် ဒးလဝ်ဝပ်ရဂှ် ညးဒေသတအ် ဟီုကဵု ဌာန်ပရိုၚ်သြၚ်လောန်တိုၚ်ရ။
သ္အာၚ်နူဂှ်ပၠန် ပ္ဍဲဂိတုမေ စၟတ်တ္ၚဲ (၆)ဂှ်လေဝ် ဟိုတ်နူပရေၚ်ဒပ်ကံၚ်ဇြဳပၞာန် ပန်ဖျေံလွဟ်ဇၞော် ဒတုမ်စှ်ေပါ်ခတိုဟ်လဝ် ပ္ဍဲကွာန်တတာန်ကူ(တတန်းကူ) ညးတြုံကောန်ဒေသမွဲတၠ ဒးချိုတ်လဝ်တုဲ ညးဍုၚ်ကွာန် ကောန်ဒေသ (၅) တၠ ပါလုပ်သီုညးဗြဴမွဲတၠ ဇီုကပိုက် ဒးလဝ်ဘဲဝပ်ရ။
ဂိတုမေ စၟတ်တ္ၚဲ (၇)တေံလေဝ် ဟိုတ်နူဒပ်ကံၚ်ဇြဳပၞာန် ထပ်ပန်ဖျေံလဝ်လွဟ်ဇၞော် ပ္ဍဲကွာန်တတာန်ကူ ပါ်ခတိုဟ်အာလဝ်တုဲ ညးတြုံ ကောန်ဒေသမွဲတၠ ဇီုကပိုက်ဒးလဝ်ဝပ်ရဂှ် ညးဒေသတအ် ဟီုသ္ဂးလဝ်ရ။
ပ္တဝ်လဝ်ကဵုကောန်အရာပ်တုဲ ဟိုတ်နူကောန်ဒပ်ကံၚ်ဇြဳပၞာန် ပန်ဖျေံလွဟ်ဇၞော်ဂှ်ရ သ္ၚိဒၟံၚ် စမြိုၚ်ကပေါတ်ကညောတ် ညးဍုၚ်ကွာန် ပ္ဍဲကွာန်တတာန်ကူကဵု ကွာန်ကမိုၚ်ကုမ် ဒးဇီုကပိုက်လီုလာ်လဝ်ကီု၊ ပရေၚ်တိရစ္ဆာလွဳ ဒးဇီုကပိုက်လဝ် နွံဒၟံၚ်ရဂှ် ဂွံတီကေတ်ရ။
ပ္ဍဲပွိုၚ်ဍုၚ်ကအ်ကြိက် တွဵုရးကရေၚ် လလောၚ်တြးလဝ်ပရေၚ်အုပ်ဓုပ်ပၞာန်ဂှ် ပရေၚ်ဒပ်ကံၚ်ဇြဳပၞာန် ကလိလောန်ဖံက်ပ္ကဝ်ဒၟံၚ် အခေါၚ်အရာမၞိဟ် နွံဗွဲမွဲဂၠိုၚ်တုဲ ပရေၚ်ပန်ဖျေံလွဟ်ဇၞော်ကြာန်န်လေဝ် ကၠောန်သ္ပဒၟံၚ် ကြပ်ဒဒှ်အရိုဟ်တ္ၚဲကီု ကောန်ဒေသ ညးဍုၚ်ကွာန်ဂမၠိုၚ် ဒးဆဵုဂဗဒၟံၚ်ကဵု တၚ်ခက်ခုဲဝါတ်ဂါတ် ဗွဲမဂၠိုၚ်ရဂှ် ညးတာလျိုၚ်ဆဝ်ပ္ၚုဟ်စန္ဒက် ဂကောံအခေါၚ်အရာမၞိဟ်ကရေၚ် KHRG သဝ်နန္ဒဇြူ ဟီုသ္ဂးလဝ်ရ။
အတိုၚ်တၚ်လလောၚ်တြး ခရိုၚ်ဒူပလာယာ KNU လလောၚ်တြးလဝ်မ္ဂး ပ္ဍဲခရိုၚ်ဒူပလာယာ တိဍာ်ဒပ်မဟာ(၆) ပ္ဍဲပွိုၚ်ဂိတုဨဗြဴမွဲဂိတု လၟိဟ်ဒပ်ကံၚ်ဇြဳပၞာန် ကၠောန်သ္ပလဝ် ပရေၚ်ဗတိုက်ပန် နကဵုက္ၜၚ်ကျာ ၂၁၅ ဝါ ကၠောန်သ္ပလဝ်တုဲ ပံၚ်လၟိဟ်စမြိုၚ် ပါလုပ် သီုစမြိုၚ်ပရေၚ်ဘာသာ၊ ဗ္ဒမ်ကဵုဂဥုဲ၊ ဘာဗ္တောန်လိက် ကေုာံ သ္ၚိဒၟံၚ်တအ် ၄၀၇ မ ဇီုကပိုက်ဒးလီုလာ်လဝ်ကီု ညးဍုၚ်ကွာန်ကောန်ဒေသ ၂၃၀၀၀ တၠပြၚ် ဒးဂြိပ်ဒဴပါဲဒလေတ် ဒၟံၚ်ပ္ဍဲဒၞာဲဌာန်ဗၠးဘဲရဂှ် ဂွံတီကေတ်ရ။
ပရိုၚ်-သြၚ်လောန်တိုၚ်(မ်)
ဗီုရုပ် -KNU
sanlontai