ပ္ဍဲဗုက်ပျေန် သၞေဟ်ကၚ်စၟဳစၟတ်ကံၚ်ဇြဳပၞာန် ဒးဒုၚ်ဗတိုက်လဝ်တုဲ ဒးချိုတ်လဝ် (၂) တၠ

ဗုက်ပျေန်၊ မေ (၁၀)

ရးဒေသဇၞော်တၞၚ်သြဳ၊ ပွိုၚ်ဍုၚ်ဗုက်ပျေန်၊ ဟိုတ်နူသၞေဟ်ကၚ်စၟဳစၟတ် လေညာ-ဗာန်ဂလာ ဗ္ဒာဲကွာန်ဗာန်ဂလာ ဒးဒုၚ်ဗတိုက်လဝ်တုဲ ကောန်ဒပ်ကံဇြဳပၞာန်(၂)တၠ ဒးချိုတ်လဝ်ရဂှ် ညးတာလျိုၚ်ပကဖ ပွိုၚ်ဍုၚ်ဗုက်ပျေန်တအ် ဟီုကဵု ဌာန်ပရိုၚ်သြၚ်လောန်တိုၚ်(မ်)ရ။ 

သၞေဟ်ကၚ်စၟဳစၟတ်ကံၚ်ဇြဳပၞာန် ဇြဟတ် ၂၀ ပြၚ် ဖျေံဗဒိုပ်မံၚ်တန်တဴဒၟံၚ်ဂှ် ဂိတုမေ စၟတ်တ္ၚဲ(၈) အခိၚ်ဗ္တံ ၜိုတ်(၈)နာဍဳဂှ် ဒပ်ပၞာန်စဵုဒၞာညးဍုၚ်ကွာန် ခရိုၚ်ကအ်သံၚ် တံဒပ်လၟိဟ်(၁) ကေုာံ ဒပ်ပံၚ်ကောံ ပကဖ ပါလုပ်သီု flying star Force တအ် အာစိုပ်ဗတိုက်လဝ်ရ။ 

ဟိုတ်နူပရေၚ်ပန်ဗတိုက်ဏံ ပရေၚ်ပန်ပှ်ောက္တဵုဒှ်လဝ် ဗ္ဒာဲပွိုၚ်မွဲနာဍဳတုဲ နူလ္ပာ်ကံၚ်ဇြဳပၞာန် ပန်ဖျေံနၚ်လွဟ်ဇၞော် အဆက်ဟွံပိုတ်သ္ကုတ်ရဂှ် ဂွံတီကေတ်ရ။ 

ပ္ဍဲပေါဲဗတိုက်ၜါလ္ပာ်ဂှ် လ္ပာ်ဒပ်စဵုဒၞာညးဍုၚ်ကွာန်တအ် ပရေၚ်ဇီုကပိုက်ဒးလဝ်ဟၟဲမွဲသာ် ကလေၚ်ဆုတ်တိတ်လဝ် ဗွဲမအံၚ်ဇၞးရဂှ် ညးတာလျိုၚ်ပကဖ ပွိုၚ်ဍုၚ်ဗုက်ပျေန်မွဲတၠ ဟီုသ္ဂးလဝ်ရ။

ကြဴနူပေါဲဗတိုက်က္တဵုဒှ်တုဲ နူလ္ပာ်ကံၚ်ဇြဳပၞာန် ကလေၚ်ထပ်ဗပေၚ်လဝ် ဇြဟတ်ဒပ် ၂၀ ပြၚ် ပတေၚ်ဂြတ်လဝ် ပရေၚ်ဂီုကၠီုကီု ပရေၚ်ကၟာတ်ဒၞာစၟဳစၟတ်လေဝ် ကၠောန်သ္ပဒၟံၚ်ရဂှ် ဂွံတီကေတ် နူညးဒေသတအ်ရ။ 

ပ္ဍဲဂိတုမေ တုဲကၠုၚ်စၟတ်တ္ၚဲ ၂ ဂှ်လေဝ် ရုၚ်ပရေၚ်ဂီုကၠီု သွာၚ်ပၞာန်ကံၚ်ဇြဳပၞာန် (စဖရ) မၞုံဍုၚ်ပျဳဂျဳမဏ္ဍိုၚ်ဂှ် ဒပ်ပံၚ်ကောံ PDF ဒေသတအ် လုပ်စိုပ်ဗတိုက်လဝ်တုဲ ပၞာန်ညးဍုၚ်ကွာန် ကေတ်ဒၟံၚ်တာလျိုၚ်ဂီုကၠီုမွဲတၠ ဒးချိုတ်အာလဝ်ရ။ 

ပရိုၚ်-သြၚ်လောန်တိုၚ်(မ်)

ဗီုရုပ် – CJ