ညံၚ်အမှုရာဇဝတ်ပၞာန် ကံၚ်ဇြဳပၞာန်တံ ဂွံဒေါအ်ဒေၚ်အာ ဗွဲမပြဟ် သွက်ဂွံကေတ်ကဵုဒုဟ်ဗွဲမစိုပ်တရဴဂှ် CRPH အာတ်မိက်

လ္ဂုၚ်၊ မေ (၁၀)

နကဵုကုလသမဂ္ဂ၊ အာဇြဳယာန် ကေုာံ သီုကဵုဍုၚ်နာနာဂမၠိုၚ် ညံၚ်အမှုရာဇဝတ်ပၞာန် ကံၚ်ဇြဳပၞာန်သီအဝဵု မကလိလောန်ဒၟံၚ်တံ ဂွံဒေါအ်ဒေၚ်အာဗွဲမပြဟ် သွက်ဂွံကေတ်ကဵုဒုဟ် ဗွဲမစိုပ်တရဴ တၚ်သ္ဂုတ်သွာတ် မဖ္တိုက်ဖ္အောဝ်လဝ်ဏံဂှ် ဖျေံစၟတ်လဝ်ရောၚ် ကမ္မတဳသ္ပစၞးကၠတ်ထဝ်ကၟိန်ဍုၚ် (CRPH) လလောၚ်ပ္တိတ်လဝ်ရ။

တုဲကၠုၚ် ပ္ဍဲဂိတုမေ (၈) တေံ ပ္ဍဲကဵုကောံဓရီုတၟေၚ် ကၠတ်ထဝ်ညးဍုၚ်ကွာန် မကၠောန်ဗဒှ်လဝ်ဂှ် သွက်ဂွံဒေါအ်ဒေၚ်ကဵု အမှုရာဇဝတ်ပၞာန် ကံၚ်ဇြဳပၞာန် မကလိလောန်ဒၟံၚ်တံ၊ အမှုရာဇဝတ် မကလိလောန်ဒၟံၚ် လ္တူကောန်မၞိဟ်တံကီု သီုကဵုပရေၚ်ဗ္တိုက်တရဴကျာ လ္တူညးဍုၚ်ကွာန်ကောန်အရာပ်တံ ဗွဲမပြဟ်ဂှ်တုဲ ဖျေံစၟတ်လဝ်သာ်ဏံရောၚ်ဂှ် ဂွံတီကေတ်ရ။

ပ္ဍဲကောံဓရီုတၟေၚ် CRPH ဂှ် သ္ပဒတန်လဝ် တၚ် (၁၃) တၚ် မပ္တံကဵုညံၚ်ဟွံဂွံသွံတြး ကၠေၚ်က္ၜၚ်ကျာ၊ လွဟ်လက်နက်ပၞာန် ကေုာံ ကပေါတ်အရပ်စပ်ပၞာန် ကုကံၚ်ဇြဳပၞာန်ဂှ်ကီု၊ အမှုရာဇဝတ်ပၞာန် ကံၚ်ဇြဳပၞာန် မကလိလာန်လဝ်တံဂှ် သွက်ဂွံစဳရေၚ်ဂဗုတ် ပ္ဍဲရုၚ်သၞောဝ်ဓဝ်ဂၠးတိ ကေုာံ ရုၚ်သၞောဝ်ဓဝ်ရာဇဝတ် ဍုၚ်နာနာတံမာန် နကဵုဍုၚ်သ္အာၚ်တံ သွက်ဂွံပံၚ်တောဲရေၚ်တၠုၚ်ကဵုတံ မဒှ်ရ။

ဖျေံစၟတ်လဝ် တၚ်သ္ဂုတ်သွာတ်တံဏံဂှ်ဝွံ ပ္ဍဲအရာပ္တိတ်ဇြဟတ်ဂ္စါန် သွက်ဂွံဒက်ပ္တန်ဖေဝ်ဒရာဒဳမဝ်ကရေဇြဳမာန် ကေုာံ သွက်ဂွံဖအိုတ်ကၠေံသၞောတ်တၠအဝဵုပၞာန် ဍုၚ်ဗၟာဏံမာန်ဂှ်တုဲ ညံၚ်ဂွံဂွံအရီုဗၚ် မစှ်ေကဵုနတဲ နူကဵုဍုၚ်သ္အာၚ်တံဂှ် ဒှ်အရာပ္တိတ်ဇြဟတ် နကဵုနဲကဲကလုတ်တမာန်ရောၚ်ဂှ် ထ္မံက်ထ္ၜးလဝ် ပ္ဍဲတၚ်လလောၚ်တြးဂှ်ရ။

ကံၚ်ဇြဳပၞာန်ဝွံ ကလိလောန်ဒၟံၚ် ပရေၚ်ဗ္တိုက်ကွာန်ပဇြဳကျဳ၊ ပရေၚ်ဗ္တိုက်တရဴကျာ ကွာန်လက်ယက်ကုန် ကေုာံ ကွာန်အဏပါ မစွံပွန်ပ္တဝ်က္ဍိုပ်ကဵု ကောန်အရာပ်တံဂှ်သၟးဟွံက သီုကဵုကလိလောန်ဒၟံၚ် ပွစံၚ်ယတ်ဂစိုတ်ဂယိုၚ်ညးဍုၚ်ကွာန်တံကီုရောၚ်ဂှ် သ္ဂးလဝ်ရ။

သ္အာၚ်နူဂှ်ပၠန် ကြဴနူဒပ်ပၞာန်သီအဝဵုတုဲ သ္ၚိဌာန်ညးဍုၚ်ကွာန် (၇) ဠက်ပြၚ် ဒးဒုၚ်စံၚ်လဝ်တုဲ မၞိဟ်အာယုက်ဇၞော်ဇၞော်၊ မၞိဟ်အဝဲဟွံခိုၚ်ကၠိုက် ကေုာံ ကောန်ၚာ်သၟတ်တံ တူပၟတ်ချိုတ်အာတံ နွံလဝ်တုဲ ညးမဒးဂြိပ်ဒဴပါဲဒလေတ် ထောံလသာသ္ၚိဌာန်တံလေဝ် (၁ ဒဿမ ၇) ပြကောဋိကိုဋ်ပြၚ် နွံဒၟံၚ်ယျဂှ် ဂွံတီကေတ်ရ။

ပရိုၚ်−သြၚ်လောန်တိုၚ်(မ်)

ဗီုဓာတ်−CRPH