ကံၚ်ဇြဳပၞာန် စရပ်စပ်စကာကၠုၚ် ပရေၚ်ဗ္တိုက်တရဴကျာ ပ္ဍဲပွိုၚ်ဍုၚ်ရေဝ်၊ တွဵုရးဍုၚ်မန်

ရေဝ်၊ မေ (၁၀)

ပပ္တံနူဂိတုမေဏံတုဲ နူကဵုဒပ်ကံၚ်ဇြဳပၞာန်တံ စကၠောန်သ္ပကၠုၚ် ပရေၚ်ဗ္တိုက်တရဴကျာ ပ္ဍဲကဵုပွိုၚ်ဍုၚ်ရေဝ်၊ တွဵုရးဍုၚ်မန် ဒေသမလလောၚ်လဝ် ပရေၚ်အုပ်ဓုပ်ပၞာန်ဂှ်ယျဂှ် ညးဒေသတံ ကေုာံ ညးဒုၚ်တာလျိုၚ် ဂကောံဒပ်စဵုဒၞါညးဍုၚ်ကွာန် PDF တံ ဟီုကဵု ဌာန်ပရိုၚ်သြၚ်လောန်တိုၚ်(မ်) ရ။

ဒပ်ကံၚ်ဇြဳပၞာန်ဝွံ တုဲကၠုၚ် ပ္ဍဲဂိတုမေ(၇) အခိၚ်ဗ္တံၜိုတ် (၁၁) နာဍဳဂှ် ထောံမခတိုဟ်ဗ္တိုက်လဝ် ဗ္ဒိုပ် PDF ပွိုၚ်ဍုၚ်ရေဝ်သၟဝ်ကျာမွဲ နူကဵုက္ၜၚ်ကျာတုဲ တ္ၚဲယးဂတ ပယျာံဂယး ၜိုတ် (၁၁) နာဍဳဂှ်လေဝ် ထပ်ဂြာတ်လဝ်မခတိုဟ် ဗ္တိုက်လဝ်နကဵုက္ၜၚ်ကျာ ကုကွာန်(ဝါပသဲ) ဂကောံကွာန်(ဘဲလမု) ပွိုၚ်ဍုၚ်ရေဝ်သၟဝ်ကျာဂှ်ရ။

ဟိုတ်နူပရေၚ်ဗ္တိုက်တရဴကျာ ဒပ်ကံၚ်ဇြဳပၞာန်တုဲ သ္ၚိဒၟံၚ်ညးဒေသ မၞုံကွာန်(ဝါပသဲ) ကေုာံ ပိုန်ဒြပ်အရပ်ရာလ္ၚဵုတံ ပၟတ်တူလီုလာ်ဆောံလေၚ်အာလဝ်တုဲ ကောန်အရာပ်မွဲတၠ ဇီုကပိုက်ကလိဂွံလဝ်ဝပ်ရောၚ် ဂွံတီကေတ် ဇရေၚ်ညးဒေသတံရ။

ပ္ဍဲကဵုပရေၚ်ဗ္တိုက်ဂြာတ်ဗုမ် ဗ္ဒိုပ် PDF ဂှ် ကောန်ဒပ် PDF (၃) တၠ ချိုတ်တုဲ (၄) တၠ ကလိဂွံလဝ်ဝပ်ရောၚ် ညးဒုၚ်တာလျိုၚ် PDF ရေဝ်သၟဝ်ကျာ ဗိုလ်ယာန်နာၚ် ဟီုရ။

“ပရိုၚ်ပြးအာ ဒှ်ဂွံဏောၚ်၊ အေဗ္တံဂှ် ဍေံတံကၠုၚ်ဂြာတ်ဏာမခတိုဟ် နကဵုက္ၜၚ်ကျာဏောၚ်။ ဇီုကပိုက်ဂှ်တှ်ေ ကောန်သ္ဂံၚ်ပိုယ်တံ (၃) တၠ ပြဟ်လလုဲအာတုဲ (၄) တၠ ကလိဂွံလဝ်ဝပ်ရ။ ကၠာပရူပရာဏံဂွိုအ်ဒှ်ၜါတ္ၚဲဂှ် ကၠုၚ်ပဝ်ယာန်လဝ်ကဵု က္ၜၚ်ကျာထံၚ်ပရိုၚ် အခိၚ်ဗွဲမလအ်လ။ တ္ၚဲယးဂတ (မေ ၈) ဂှ် ကၠုၚ်ဂြာတ်ဏာမခတိုဟ်။ တ္ၚဲဂတဂှ်ပၠန် ၜိုတ် (၁၁) နာဍဳ (၄၅) မိနေတ်ဂှ် ကၠုၚ်ဂြာတ်ဏာလဝ်ပၠန်ရ။ ညးဍုၚ်ကွာန်တံ ဒးအာလဝ်ရောၚ် ဂွံမိၚ်လဝ်ရ။ သွက်ဂွံစဵုဒၞါသၞတရဴကျာဂှ် ပ္ဍဲပိုယ်တံ ပြဟ်ဟ်ဏံ မုမှဟွံမွဲပုဟ်၊ ဆ္ဂး အဓိက သွက်ပရေၚ်ဂီုကၠီုဂှ် ဒးပလေဝ်ပလေတ်ဏောၚ်” သာ်ဝွံ ညးသ္ဂးရ။

ပွိုၚ်ဍုၚ်ရေဝ်ဝွံ ဒှ်တိဍာ် ဂကောံဒပ်ရပ်လွဟ် မပၠန်ဂတးဒစဵုဒစးဒၟံၚ် ကုသၞောတ်တၠအဝဵုပၞာန် ဗွဲမဂၠိုၚ်ဂၠေၚ် ချဳဒရာၚ်ဒၟံၚ်တုဲ သီုကဵုဒှ်ဒေသ ဒၞါဲဒတန်ဌာန်ဂအုပ်ဗဟဵု တိဍာ်ထိၚ်ဒဝ်ဗော်ဍုၚ်မန်တၟိ မရုဲစှ်လဝ် ဂၠံၚ်တရဴပရေၚ်သဳကၠဳဆဵုဂဗတံ တန်တဴကီုရ။ ဆဂှ်သၟးဟွံက သီုကဵုဒှ်တိဍာ် မၞုံတန်တဴဒၟံၚ် သၟဝ်ကောပ်ကာဲထိၚ်ဒဝ် ဗော်သွးကောန်ဂကူကရေၚ် KNU မပါလုပ်ဒၟံၚ် ပ္ဍဲပၠန်ဂတးက္ညၚ်ဂှ် မွဲဒကုတ်မွဲဒကဴကီုရ။

ညးဒုၚ်တာလျိုၚ်ပရေၚ်ပၞာန်−ဒုတိယ ဂကောံဇြဟတ်ပၠန်ဂတး ဖျေံသ္ဇိုၚ်တွဵုရးဍုၚ်မန် (MSRO) မွဲတၠဂှ်လေဝ် ဒပ်ကံၚ်ဇြဳပၞာန်ဝွံ လက္ကရဴဏံ သုၚ်စောဲလဝ် က္ၜၚ်ကျာထံၚ်ပရိုၚ် ကေုာံ ဒရုၚ်တံတုဲ ထံၚ်မံၚ်ပရိုၚ်တံ နွံဂှ် ဟီုကဵု ဌာန်ပရိုၚ်သြၚ်လောန်တိုၚ်(မ်) ရ။

“နူကဵုကံၚ်ဇြဳပၞာန်ဂှ် ကၠုၚ်စိုပ်ထံၚ်ပရိုၚ် ကုဂကောံပိုယ် နကဵုဒရုၚ်တံ၊ နကဵုက္ၜၚ်ကျာတံဂှ် နွံရ။ တန်တဴကဵုလၟေၚ်ဒဒှ် မက္တဵုဒှ်အာလၟုဟ်တုဲ နကဵုပိုယ်တံ သွက်ဂွံစဵုဒၞါအန္တရာယ်တရဴကျာမာန် ကၠောန်ဒၟံၚ်ပရေၚ်ပ္ကတ်ပ္ကေၚ်တံရ။ သီုကဵုၜံက်ခါဲဒၟံၚ် ကတိုၚ်ပါဲဗုမ်တံ မဒှ်ရ” သာ်ဝွံ ညးသ္ဂးရ။

ပ္ဍဲပွိုၚ်ဍုၚ်ရေဝ်ဂှ် အကြာဒပ်ကံၚ်ဇြဳပၞာန်ကဵု ဂကောံဒပ်စဵုဒၞါဒေသ PDF တံဂှ် ဒဵုကဵုတ္ၚဲဏံ ပေါဲဗ္တိုက်ဇၞော်ဇၞော် ဟွံက္တဵုဒှ်လဝ်ကီုလေဝ် PDF တံ လုပ်စိုပ်ဗ္တိုက် ဗ္ဒိုပ်ဗၠာဲသၟိၚ်တံ၊ ဗ္ဒိုပ်သၞေဟ်ကၚ်တံ သီုကဵုတမ်ဒပ်တံဂှ် နွံဒၟံၚ် ဗွဲမဂၠိုၚ်ဂၠေၚ်တုဲ အခါလၟုဟ်ဂှ် နူကဵုဒပ်ကံၚ်ဇြဳပၞာန်ဂှ် ကၠောန်လဝ် ပရေၚ်ဗ္တိုက်တရဴကျာ အလန်ကိုပ်ကၠာအိုတ်ရ။

သ္ပဟိုတ်ကဵု ပရေၚ်ဗ္တိုက်တရဴကျာ ဒပ်ကံၚ်ဇြဳပၞာန်တံ နွံကၠုၚ်ဒၟံၚ် သာ်ဏံဂှ်ရ နကဵုဂကောံဒပ်စဵုဒၞါဒေသ PDF  မချဳဒရာၚ်ဒၟံၚ် အပ္ဍဲပွိုၚ်ဍုၚ်ရေဝ်ဂမၠိုၚ် သၠုၚ်ပ္တိုန်လဝ် ပရေၚ်ပလေဝ်ပလေတ် ပ္ဍဲကဵုလ္ပာ်ပရေၚ်ဂီုကၠီု ကေုာံ ဒၞါဲဒတန်တံဂှ်ရောၚ် ညးဒုၚ်တာလျိုၚ် PDF ဂှ် သ္ဂးရ။

ညးမၞုံအခေါၚ်ဟီုဂး ဒပ်ပၠန်ဂတးတွဵုရးဍုၚ်မန် (MSRF) နာဲနဂါဂှ် “အဓိကဂှ်တှ်ေ နကဵုက္ၜၚ်ကျာထံၚ်ပရိုၚ် ကေုာံ ဒရုၚ်တံဂှ် ညံၚ်ဟွံဂွံညာတ်ကေတ် ဗ္ဒိုပ်ပိုယ်တံမာန် ညံၚ်ဂၠါဲ Spot Ground Target ဂွိုအ်မာန်ဂှ် ပလေဝ်ပလေတ်လဝ်နွံ။ မွဲပၠန်ဂှ် ညံၚ်ရဲကဵုပရိုၚ်တံ လုပ်ကၠုၚ်ဟွံဂွံ ပရေၚ်စၟဳစၟတ်တံ၊ ဒၞါဲဒေသတာဒၞါတံ အေဗီုတံဏံ ပိုယ်တံ ကၠောန်လဝ်နွံ။ သ္အာၚ်နူဂှ်ပၠန် ဖျေံလဝ်ဗ္ဒိုပ် မွဲဒၞါဲဓဝ်ဂှ် ဟွံကၠောန်လဝ်ပုဟ်၊ တြးတုဲ စွံလဝ်နွံရ။ ဆုဲပြံၚ်တုဲ ကၠောန်လဝ်နွံ။ လ္ပာ်ဒစးဒုၚ်ပလေဝ်ပလေတ်တံဏံဂှ်တှ်ေ ပိုယ်တံ ကၠောန်လဝ်နွံရ” သာ်ဝွံ ညးသ္ဂးရ။

ဒုက္ဍိုပ်သ္ကိုပ် ဂကောံဒပ်ဒမၠုက်ရေဝ် (YGF) ကိုဝ်ယျေဝ်မေန်ဂှ်လေဝ် သွက်ဂွံကလေၚ်ပၠန် ကုအန္တရာယ်သၞတရဴကျာ ကံၚ်ဇြဳပၞာန်ဂှ် အခက်အခုဲနွံဒၟံၚ်ဂှ်ရ သွက်ဂွံစဵုဒၞါဘဲသၞတရဴကျာတုဲ ဌာန်ဒတန်ဗ္ဒိုပ်တံဂှ် စွံလဝ် ဗွဲယာယဳဓဝ်ရဂှ် ဟီုကဵု ဌာန်ပရိုၚ်သြၚ်လောန်တိုၚ်(မ်) ရ။

“ဌာန်ဒတန်ဗ္ဒိုပ်ပိုယ်တံ မၞုံဒၟံၚ်လၟုဟ်တံဂှ် စွံလဝ်နဒဒှ်ယာယဳကီု၊ ဒၞါဲဒတန်လၟိုန်တံဂှ် ပါဲမံၚ်ကီု ပလေဝ်ပလေတ်လဝ် ဗီုဏံနွံရ။ သွက်ဂွံကလေၚ်တဝ်စၞေဟ်ဗ္တိုက်ဂှ် ပိုယ်တံဂှ် ဒဵုကဵုအခိၚ်လၟုဟ် အာဒၟံၚ် နဒဒှ် Local PDF ဖိုဟ်ဂှ်ရ ပရေၚ်ဆက်စၠောံ နူကဵု NUG တေံဂှ်လေဝ် ဟွံဂွံလဝ်ပုဟ်။ ဗီုကဵုကရောၚ်ပၞာန် PDF နူကဵုဍေံတံ မဖျေံလဝ်ကဵုတံဂှ်ရ။ ပ္ဍဲကဵုပိုယ်ဂှ်တှ်ေ ကရောၚ်ပၞာန်ကျာဖျူနွံဏောၚ်၊ ကရောၚ်ပၞာန်ဒံၚ်ညဵုနွံဏောၚ်။ ညအ်ရဂှ် ဇြဟတ်ဆက်စၠောံ နူကဵု NUG မဖျေံကဵုလဝ်တံဂှ် အောန်ဒၟံၚ်ဖိုဟ်တုဲ သွက်ဂွံကလေၚ်တဝ်စၞေဟ်ဂှ် နကဵု Local ပိုယ်တံ သာ်လဵုမှ ဟွံပြေပြံၚ်ပုဟ်” သာ်ဝွံ ညးသ္ဂးရ။

ဒပ်ကံၚ်ဇြဳပၞာန်ဝွံ ဟိုတ်နူကျကၠုၚ်ပရေၚ် ပ္ဍဲကဵုပေါဲဗ္တိုက်ဗလးတိတံဏံဂှ်ရ နူကဵုတရဴကျာတံမွဲကဆံၚ် ဗ္တိုက်ပန်ပှော် ကုကောန်အရာပ်တံ သီုကဵုဂကောံဒပ်စဵုဒၞါညးဍုၚ်ကွာန်တံဂှ် ကၠောန်ဒၟံၚ်အဆက်က်ရောၚ် ညးခါတ်အကာဲပရေၚ်ဍုၚ်ကွာန်တံ သ္ၚဳဂၠိပ်လဝ်အိုတ်ရ။

အတိုၚ်တၚ်နၚ် အလဵုအသဳညဳသၟဟ်ဂကူ (NUG) တံဂှ်မ္ဂး အပ္ဍဲဒပ်ပၞာန်သီအဝဵုပွိုၚ်ၜါသၞာံဏံ အလုံမွဲကၟိန်ဍုၚ် လၟိဟ်လ္တုန်ပရေၚ်ဗ္တိုက်တရဴကျာတံ နွံလဝ် စဵုကဵု (၆၅၀) ပြၚ်တုဲ ကောန်အရာပ် (၂၈၀) ပြၚ် ဒးချိုတ်အာလဝ်တုဲ ကောန်အရာပ် (၃၇၀) ပြၚ်ဝွံလေဝ် ဇီုကပိုက်ကလိဂွံလဝ်ဝပ်ရောၚ်ဂှ် လလောၚ်ပ္တိတ်လဝ်ရ။

ပရိုၚ်−သြၚ်လောန်တိုၚ်(မ်)

ဗီုဓာတ်−CJ