မတ်မလီု၊ မေ (၁၀)
သတ်ဆုသၞာံဇမၠိၚ် မတိတ်နူတွဵုရးဍုၚ်မန်ဂမၠိုၚ် မပ္တံကဵု သတ်ဒူရေန်၊ သတ်ခဗုၚ် ကေုာံ သတ်မၚ်ဂုတ်တံဝွံ ပ္ဍဲသၞာံဏံ ဒမြိပ်တိတ် အောန်စှ်ေကၠုၚ် တီတီတုဲ အပ္ဍဲဗွဝ်ဖျာ ၚုဟ်သတ်ဆု သၠုၚ်တိုန်ကၠုၚ် ဗ္ဒါဲၜါဆပြၚ်ဂှ် တၠကမၠောန်သွံရာန်သတ်ဆုတံကဵု တၠကၠအ်တံ ဟီုကဵု ဌာန်ပရိုၚ်သြၚ်လောန်တိုၚ်(မ်) ရ။
သတ်ဆုသၞာံဇမၠိၚ် ဗက်ကဵုရာသဳတုဲ တိတ်ဒၟံၚ်အပ္ဍဲဒေသတံဂှ်ဝွံ ဗီုသၞာံတုဲကၠုၚ်တေံဂှ် ဟွံတိတ်လၟေၚ်ၚ်ရတုဲ ယအ်စှ်ေကၠုၚ်တီတီကီု၊ အပ္ဍဲကာလမစၟတ်လဝ်ဂှ် ဟိုတ်နူဟွံတိတ်ဂှ်ရ သတ်ဆုအောန်စှ်ေတုဲ ၚုဟ်က္ဍၚ်ကၠုၚ် မဒှ်ရ။
သတ်ဆုသၞာံဇမၠိၚ် တိတ်ကဵုရာသဳတံဂှ်ဝွံ ဟိုတ်နူပရေၚ်ပၞာန်သီအဝဵုတုဲ ဖဵုအဆက်လက္ကရဴ မက္တဵုဒှ်ဒၟံၚ်ဂမၠိုၚ် မပ္တံကဵု ၚုဟ်ကပေါတ်တမ် က္ဍၚ်တိုန်ကၠုၚ် ကဵုဆကီု၊ ဟွံစုတ်ဝါဲတံကီု၊ ၚုဟ်ကၠေၚ်စက် သၠုၚ်တိုန်တံဂှ်တုဲ ပၠောပ်ဍာ်တဵုလွဳဟွံမာန်ဂှ်ရ ဒမြိပ်တိတ် အောန်စှ်ေကၠုၚ် တီတီရ။
တၠကမၠောန်သွံရာန်သတ်ဆုမွဲတၠဂှ် ဟိုတ်နူသတ်ဆုသၞာံဇမၠိၚ် တိတ်အလိုက်ရာသဳတံ တိတ်အောန်စှ်ေကၠုၚ်ဂှ်ရ ၚုဟ်ဍေံသၠုၚ်တိုန်အာ ၜါဆပြၚ်တုဲ သတ်ဆုလ္ၚဵုတံဟီုမ္ဂး ကၠာရာသဳဟွံဂွံအိုတ်ဂှ်ရ ဒဒှ်မပိုတ်အိုတ်တံ က္တဵုဒှ်ကၠုၚ်ရောၚ်ဂှ် ဟီုရ။
“ ဒမြိတ်သတ်ဒူရေန်တိတ်ဂှ် ပ္ဍဲကဵုမတ်မလီုဂှ်တှ်ေ အောန်ဒၟံၚ်။ အခိၚ်ဏံတှ်ေ သတ်ဍေံအိုတ်အာယျ။ လၟုဟ်ဂှ် ၚုဟ်ဍေံ က္ဍၚ်အာကွေံကွေံယျဏောၚ်။ ၚုဟ်သတ်ဒူရေန်ဂှ် သၠုၚ်ဒၟံၚ်နူတွဵုတွဵုဏီ။ ၚုဟ်ပိုယ်သွံသၞာံတုဲတုဲတေံ ဂွံစၜိုတ် (၃၅၀၀) မ္ဂး သၞာံဏံဂှ် ဂွံမံၚ်ၜိုတ် (၅၀၀၀) ။ နကဵုသတ်ဆုတၞဟ်ဟ် ယဝ်ရမၚ်ဂုတ်တှ်ေ ဟွံတိတ်ဟဂှ်ရ။ သတ်မၚ်ဂုတ်တိတ်အောန်အာ ကွေံကွေံ။ ၚုဟ်သတ်မၚ်ဂုတ်ဂှ် သၠုၚ်တိုန်အာ နူကဵုသၞာံတုဲတုဲကၠုၚ်တေံ ၜိုတ် (၂) ဆရ။ အရိုဟ်ဟ်သၞာံ (၃၀၀) မ္ဂး သၞာံဏံတှ်ေ ဂွံၜိုတ် (၇၀၀) ။ ၚုဟ်ရာန် ယဝ်ရၚုဟ်သွံပရးတှ်ေ ၜိုတ် (၈၀၀) (၉၀၀) နွံဏောၚ်။ အကာဲအရာသတ်ခဗုၚ်ဂှ်တှ်ေ သတ်အပ္ဍဲဒေသတံဂှ် တိတ်ဒၟံၚ်ရ။ ၚုဟ်ဂှ်ဂၠိုၚ်ဒၟံၚ်။ ၚုဟ်သတ်ခဗုၚ်မွဲမဂှ် ၜိုတ် (၁၀၀) နွံဏောၚ်။ အဓိကဂှ်တှ်ေ အကာဲအရာရာသဳဥတုသၞာံဏံဂှ် ၜိုတ်ဏံလေဝ် ဟွံပရေံပုဟ်။ ဒမြိပ်သတ်ဍေံတိတ်ရ အောန်အာ။ ဟိုတ်ၚုဟ်ဂွံတိုန်အာဂှ်တှ်ေ ဒၟါနူကဵုၚုဟ်တမ်ဂမၠိုၚ်ရ။ ကၠေၚ်တံမုတံဂှ် ၚုဟ်က္ဍၚ်ကီု၊ ၚုဟ်ဝါဲဓာတ်၊ ၚုဟ်ကောန်ကလောန်ပိုယ်တံ က္ဍၚ်အာတုဲ သၠုၚ်အာဏောၚ်ဂှ် ညာတ်ရ” သာ်ဝွံ သ္ဂးရ။
ပ္ဍဲကဵုဗွဝ်ဖျာသတ်ဆုဂှ် ဟိုတ်နူသတ်ဆုတိတ်အောန်ဂှ်ရ ဇြဟတ်သွံအောန်ဒၟံၚ်တုဲ ဒၟါနူဒှ်သတ်ဆုတိတ် ဗက်အလိုက်ရာသဳတံဂှ်ရ မၞိဟ်ရာန်စသုၚ် အပ္ဍဲဒေသဂှ်လေဝ် သၠုၚ်တိုန်ဒၟံၚ်တုဲ ဇြဟတ်ရာန်ဂၠိုၚ်တုဲ သတ်ဆုစဵုကဵုဟွံမွဲ အောန်စှ်ေကၠုၚ်ဂှ် ဂွံတီကေတ်ရ။
သ္အာၚ်နူဂှ်ပၠန် သတ်ဒူရေန် တိတ်နူဒေသမတ်မလီုတံ ပိုတ်အိုတ်အာဂှ်ရ ဒးဗ္ကန်ကေတ်သတ်ဒူရေန် နူကဵုရေဝ် ကေုာံ ကျာ်ပိတံတုဲ ဒးသွံတြးဒၟံၚ်တုဲ သတ်ဒူရေန် တိတ်နူဍုၚ်သေံတံဂှ်လေဝ် ဟိုတ်နူရာန်ဗ္ကန်ခက်ခုဲကၠုၚ်ဂှ်ရ တၚ်နွံပၟိက် အပ္ဍဲဗွဝ်ဖျာတံ က္တဵုဒှ်ဒၟံၚ်ရောၚ် တၠကမၠောန်သွံရာန်သတ်ဆုတံ သ္ဂးလဝ်အိုတ်ရ။
တၠကၠအ်မွဲတၠဂှ်လေဝ် သတ်ဆုတိတ် ဗက်ကဵုရာသဳတံ ၚုဟ်တိုန်ဒၟံၚ်ကီုလေဝ် ကပေါတ်ဗၞိက်တၞဟ်သ္အာၚ်တံဂှ်လေဝ် ၚုဟ်တိုန်ဒၟံၚ်ကီုဂှ်ရ ၜိုတ်ထေၚ်လဝ် ပရဲပရာဟွံဂွံတုဲ ဗ္ၜတ်ဂမ္တဴသၠုၚ်တိုန်ဗက် ဝါဲဓာတ်မသုၚ်စောဲဒၟံၚ်လၟိုန်ဂှ် ရာန်ဟွံဂွံရတုဲ သတ်ဆုဂမၠိုၚ် ဟွံဇၞော်ရတုဲ ဒးဂဗဒၟံၚ် ကုအရာဟွံပြေပြံၚ်တံရောၚ်ဂှ် ဟီုကဵု ဌာန်ပရိုၚ်သြၚ်လောန်တိုၚ်(မ်) ရ။
“ အရိုဟ်ဟ်သၞာံဂှ်တှ်ေ ကဝက်ၚုဟ်ရဏောၚ်။ သၞာံဏံဂှ် ၚုဟ်တိုန်ကီုလေဝ် အရာရာအိုဿီု ၚုဟ်ဍေံ ပြံၚ်လှာဲအိုတ်ယျလေဝ်။ ဝါဲဟီုမ္ဂးလေဝ် ၚုဟ်ဍေံဂှ် ဒးကဵုၜါဆတုဲ ဒးရာန်ဒၟံၚ်။ တုဲတှ်ေ ကောန်ကလောန်ဟီုဂှ်လေဝ် ဗီုမိက်ဂွံကော်ဂှ် ကော်ဟွံဂွံပုဟ်။ ပ္ဍဲကောန်ကမၠောန်တံဂှ်လေဝ် ဒှ်အခက်အခုဲ။ ၚုဟ်ဂှ်လေဝ် ဒးကဵုဂၠိုၚ်တုဲ လ္ပာ်စိုန်သ္ကီုဂှ်လေဝ် နွံပၟိက်တၟာဂလိုၚ်ဏောၚ်။ တုဲပၠန် ရာသဳဥတုဂှ်လေဝ် သၞာံဏံဂှ်က္တဴက္တာန်ကွေံကွေံတုဲ သတ်ဆုသတ်ဒုန်တံဂှ် ဟွံဇၞော်စကွေံပုဟ်။ သၞာံတုဲတုဲကၠုၚ်တေံဂှ်တှ်ေ အတိုၚ်မွဲကသီု ဗြဲဂှ်မွဲဂိတုမွဲဝါ ဂူကဵုဒၟံၚ်တုဲ သတ်ဆုဂှ်ပြေပြံၚ်မံၚ်။ ရာသဳဥတုဂှ်က္တဴကွေံကွေံတုဲ သတ်ဆုသၞာံဏံဂှ် သတ်ဍေံဍောတ်ဒၟံၚ်၊ အခက်အခုဲဂှ်တှ်ေ တၟာဂလိုၚ်ရ။ သၞာံတုဲတုဲကၠုၚ်တေံဂှ်တှ်ေ ဂဥုဲကၠုၚ်နူသေံတံမုတံဂှ် ပိုယ်တံကစတ်ကဵုဒၟံၚ်။ လၟုဟ်ဂှ်တှ်ေ ကဵုပရေၚ်ဆက်စၠောံဂၠံၚ်ဍာန်တံဏံကဵု ဂဥုဲတံဏံလေဝ် ဟွံစိုပ်တုဲ ဂဥုဲတၞဟ်ဟ်တံဂှ်လေဝ် ဟွံပြေပြံၚ်ပုဟ်။ ဂဥုဲမသုၚ်စောဲဒၟံၚ်အရိုဟ်တွဵုတံဂှ်လေဝ် ဟွံဂွံတုဲ ပ္ဍဲကဵုဒၞါဲဏံဂှ် တၞဟ်ခြာအာမာန်ဏောၚ်။ ပိုယ်တံရဂှ် ဟွံပြေပြံၚ်ပုဟ်၊ ကဵုအခိၚ်ဒးစၟဏံဂှ် ကၠောန်မတေံမဏံ မွဲတဲဓဝ် ဒးကလေၚ်တော်ကဵု ခရိတ်အိုတ်တံဂှ်မ္ဂး ယဝ်ရဇကုပ္တိတ်လဝ်ဇြဟတ်အိုတ်အစောံ ယဝ်ရအံၚ်ဇၞးမှဟေၚ် သွက်ဇကုဂှ် ကလိဂွံပရဲမာန်ဏောၚ်။ ၜိုတ်ဓမ္မတာရတှ်ေ ဟွံပြေပြံၚ်ရပုဟ်” သာ်ဝွံ သ္ဂးရ။
မွဲလ္ပာ်ပၠန်ဂှ် ညးတဵုဂူယာလ္ၚဵုတံဂှ်လေဝ် သၞာံတုဲတုဲကၠုၚ်တံဂှ် ခရိတ်အရပ်စပ်တံ ဇၞော်သၠုၚ်တုဲ ဒးကျဗြံလဝ်ဂှ်ရ ပရေၚ်တဵုလွဳသၞာံဏံဂှ် ဖအောန်ဖျေံလဝ်ဗ္ဒါဲကဝက်တုဲ ဟိုတ်ဒၟါနူပလေဝ်ကဵုကၠအ်တဵုလွဳတံဟွံမာန်တုဲလေဝ် သတ်ဆုသတ်ဒုန်တိတ်တံ အောန်စှ်ေကၠုၚ်ရ။
ပ္ဍဲတွဵုရးဍုၚ်မန်ဂှ် သတ်ဆုသၞာံဇမၠိၚ်ဂမၠိုၚ် မပ္တံကဵုသတ်ဒူရေန်၊ သတ်သဳဠော၊ သတ်ခဗုၚ် ကေုာံ သတ်မၚ်ဂုတ်တံဂှ် အဓိကတဵုလွဳဒၟံၚ်တုဲ သၞေဝ်ကေဝ်တိတ် ဗက်ကဵုရာသဳတံဂှ် တဵုလွဳဒၟံၚ် နဒဒှ်သတ်အကြာတံနွံရောၚ် ဂွံတီကေတ်ရ။
ပရိုၚ်−သြၚ်လောန်တိုၚ်(မ်)
ဗီုဓာတ်−CJ
sanlontai