သွက်အ္စာပရိုၚ်အဝ်သတြေလျမွဲတၠ မဒးဒုၚ်ရပ်လဝ် အပ္ဍဲဍုၚ်ကြုက်ဂှ် ဝန်ဇၞော်ကာဍုၚ်သ္အာၚ် ဂွိၚ်ဒၟံၚ်ဗွဲတၟေၚ်

သေဒ္ဒနဳ၊ မေ (၁၀)

အ္စာပရိုၚ်၊ မၞိဟ်ပ္တိုန်ထ္ၜးပရိုၚ် ကောန်ဍုၚ်အဝ်သတြေလျဂှ် ဟိုတ်နူရပ်ထိၚ်လဝ် ပ္ဍဲကဵုဍုၚ်ကြုက် (၁၀၀၀) တ္ၚဲပြၚ်ဂှ်ရ ကလေၚ်ဗလးကဵုတုဲ သွက်ဂွံကဵုအခေါၚ်ဆဵုဂဗ ကုသ္ၚိကၟိန်တံဂှ် ကာဗာရာ အာတ်မိက်လဝ်ရ။

ချာန်လေဝ် ညးပ္တိုန်ထ္ၜးပရိုၚ်ကဆံၚ်လ္တူ ဌာန်ပရိုၚ်အလဵုအသဳကြုက်ပိုၚ် CGTN ဂှ်ဝွံ ပ္ဍဲသၞာံ ၂၀၂၀ ဂိတုအဝ်ဂါတ် (၁၃) တေံ ကၠေံအာလဝ်တုဲ ကြဴနူဂှ်တုဲ ဒဒှ်ရဒးဒုၚ်စောတ်စောဲလဝ် နကဵုပရေၚ်ထံက်ပၚ် တၚ်ပၞုက်ဓလုက်ကၟိန်ဍုၚ်ဂှ် ဂွံတီကေတ်ရ။

ဝန်ဇၞော်ကာဍုၚ်သ္အာၚ်အဝ်သတြေလျ ပါန်နဳဝန်ဂှ် ဒဒှ်ရဒှ်ဓဝိၚ် စပ်ကဵုဒုဟ်ဒဏ် ညးပ္တိုန်ထ္ၜးပရိုၚ် မဒးထိၚ်ဒဝ်လဝ် နကဵုအမှု လေပ်ဒှ်တဴလ္ဂောံကဵုပရေၚ်ဍုၚ်ကွာန်တံဂှ်တုဲ ထ္မံက်ပ္တိတ်ဟီုဂးလဝ်ရ။

မေဿဝန်ဂှ် “ၜိုန်ရဒးသာဲခြာဒၟံၚ် နူကဵုသ္ၚိကၟိန်တံ အခိၚ်ဗွဲမလအ်လကီုလေဝ် ဒဒှ်ရသတ္တိဒုၚ်အဍေဝ်အဍာနွံဂှ် ဂွံတီကေတ်ရ။ အိုဿီုကဵုကောန်ဍုၚ်အဝ်သတြေလျတံဂှ်လေဝ် မိက်ဂွံကဵုဆဵုဂဗဒၟံၚ် ကုဂြောဝ်ဂတာညးကီုရောၚ်” သာ်ဝွံ ဟီုဂးလဝ်ရ။

လေဝ် မဒှ်မိယာဲကောန်ၜါဂှ်ဝွံ ပၞောဝ်ကဵုကောန်ဍုၚ်သ္အာၚ် အလဵုအသဳကြုက် မရပ်ဒက်လဝ်ဂှ် ဒှ်မွဲတၠကီုရ။

သွက်ဂွံပလေဝ်ပလေတ် တၚ်တုပ်စိုတ် အကြာကြုက် ကေုာံ အဝ်သတြေလျၜါဍုၚ် အခိၚ်မဂ္စါန်ဒၟံၚ်ဂှ် ကမ်ကုသိုလ် ကောန်ဍုၚ်အဝ်သတြေလျ မဒးဒၟံၚ်ထံၚ်စာတ် ပ္ဍဲကဵုဍုၚ်ကြုက်တံဂှ်လေဝ် ပွတာဒၞါတံ ဂၠိုၚ်ကၠုၚ်ဒၟံၚ်ရ။

စပ်ကဵုရပ်ထိၚ်လဝ် ချာန်လေဝ်ဂှ်တုဲ ဝန်ဇၞော်ကာဍုၚ်သ္အာၚ်ဍုၚ်ကြုက်ဂှ် “အခေါၚ်သ္ဂောံဂွံဗွဲမဂၠိုၚ်ဂၠေၚ်တံဂှ် ဒုၚ်လဝ်လျိုၚ် ဗွဲမသၟဟ်တးကဵုသၞောဝ်ရဏောၚ်” သာ်ဝွံ ဟီုဂးလဝ်ရ။

သ္အာၚ်နူဂှ်ပၠန် ဝန်ဇၞော်ကာဍုၚ်သ္အာၚ်ဍုၚ်ကြုက် ဝန်ဝဳဗေန်ဂှ် “ ဒုဟ်ဒဏ်သ္ဇက်ဒးဒှ်သံသယ ချာန်လဳဂှ် သၞာဲဒဴနူကဵုမဆေၚ်စပ်တံ ကေတ်လဝ်ဒုဟ် ဗွဲမကိတ်ညဳကဵုသၞောဝ်ဥပဒေရောၚ်” သာ်ဝွံ ထပ်ဟီုဂးလဝ်ရ။

“အကြာတ္ၚဲအပံၚ် (၁၀၀၀) ပြၚ်ဂှ် မူဟိုတ်ကော်ဏာ ညးဂှ်ရော၊ မူဟိုတ် ညးဒးဒုၚ်စောဲလဝ်ဒုဟ် နကဵုအမှုဖံက်ပ္ကဝ် ပရေၚ်ဂီုကၠီုကောန်ဂကူ မဟွံချိုတ်ပၠိုတ်ဂှ်ရော ဟွံသေၚ်မ္ဂး အခိၚ်လဵု ညးဂွံအခေါၚ်ဆဵုဂဗ ကုပိုယ်ရောဟီုဂှ် ပိုယ်တံ ဟွံဂွံတီကေတ်ဏီပုဟ်” သာ်ဝွံ ချူပ္တိုန်လဝ် ပ္ဍဲလိက်ပရေၚ် လိက်ပရိုၚ် The Australian တြးပ္တိတ် တ္ၚဲစန်တေံဂှ်ရ။

နူစအခိၚ်ရပ်ထိၚ်လဝ်ညးတေံရ ချာန်လေဝ်ဝွံ ဒးဒုၚ်ကၟာတ်လဒဵုလဝ် အခေါၚ်ဆက်စၠောံ ကုမ္ၚးဏံတုဲ ဆၜိုတ်အခေါၚ်ဆဵုဂဗ ကုဝန်ကဵုအရီုဗၚ်​ လၟေၚ်ဂိတုတံဂှ်ရ ကလိဂွံလဝ်ရောၚ် မဒှ်ရ။

Ref: Straits Times