လဂုၚ်၊ မေ(၁၁)
ပွိုၚ်ဍုၚ်ဇြဳဇြိုၚ် တွဵုရးသေံဇၞော်သၠုၚ်ကျာ ပရေၚ်ရေၚ်ကွဳစက်ကလုတ်တမာန်အာဇြဳယာန် ဍိုက်ပါဗက်ကၠုၚ်ဂှ် ဒဒှ်ရပျုတ်ဗ္ဒေက်လဝ်ကီု ညးက္လိလောန်လဝ်တအ်ဂှ်လေဝ် ဒးကေတ်လျိုၚ်ရောၚ်ဂှ် က္ဍိုပ်သ္ကိုပ်အာဇြဳယာန်ကဆံၚ်လတူတအ် လလောၚ်တြးလဝ်ရ။
ပ္ဍဲကောံဓရီုက္ဍိုပ်သ္ကိုပ်အာဇြဳယာန်ကဆံၚ်လတူ မရနုက်ကဵု (၄၂) ဝါ ကၠောန်ဗဒှ်လဝ်ပ္ဍဲဍုၚ်အေန်ဒေါဝ်နဳယှာ ပ္ဍဲဂိတုမေ စၟတ်တ္ၚဲ ၁၀ ဂှ် လလောၚ်တြးကၠုၚ်လဝ် ရ။
ပရေၚ်ပ္ကီုပရာပ် ဆက်က္တဵုဒှ်ဒၟံၚ်ပ္ဍဲကၟိန်ဍုၚ်ဗၟာဂှ် ဒဒှ်ရဒှ်ဓဝိၚ် ဂွိၚ်ဂွာဲဗွဲမလောန်ကီု သွက်ဂွံတန်ဒေါံကဵုလွာဲဏံကီု သွက်ဂွံဖန်ဗဒှ်ကဵု တွဳဗွိုၚ်ဂွံပ္အပ်ကဵုအာ ရီုဗၚ်ဗ္စာရဏာပရေၚ်မၞိဟ် ဂီုဂီုကၠီုကၠီု ဗွဲမဂတာပ်အခိၚ်မာန် ဗတိုက်ဖ္အောဝ်ဏာရဂှ် ဓမံက်ထ္ၜးလဝ် ပ္ဍဲတၚ်လလောၚ်တြးရ။
စပ်ကဵုအကာဲအရာပရေၚ်ကၟိန်ဍုၚ်ဗၟာတုဲ ဥက္ကဋ္ဌအာဇြဳယာန် စိုပ်အလန်ဍုၚ်အေန်ဒေါနဳယှာဂှ် ပ္ဍဲလတူပရေၚ်ဆက်ဆောံ စုက်လုက်ကဵု ညးမဆေၚ်စပ်သီုဖအိုတ်ဂှ် ဒဒှ်ရထံက်ဂလာန်ကီု သွက်ဂွံဓမံက်အာရုပ်ရဴ တၚ်တုပ်စိုပ် အာဇြဳ(၅)တၚ်ဂှ်လေဝ် ဗတိုက်ဖ္အောဝ်လဝ်ရ။
ပ္ဍဲကောံဓရီုအာဇြဳယာန်ကဆံၚ်လ္တူ ကၠောန်ဗဒှ်ဒၟံၚ်လၟုဟ်ဂှ် သၠးပါဲစွံလဝ် ဒၞာဲညးသ္ပစၞးကၟိန်ဍုၚ်ဗၟာတုဲ သွက်ဂွံသဳကၠဳအာ စပ်ကဵုအကာဲအရာ ပရေၚ်ကၟိန်ဍုၚ်ဗၟာ နွံဒၟံၚ်ရဂှ် ဂွံတီကေတ်ရ။
ဒၞာဲရေၚ်ယာဉ်ကွဳစက် ကလုတ်တမာန်ဒးဒုၚ်ဗတိုက်လဝ်ဂှ် ဒဒှ်ရက္တဵုဒှ်လဝ် ပ္ဍဲတိဍာ်ဒပ်ပၞာန်ထိၚ်ဒဝ်လဝ်ကီု အကာဲအရာပြဟ်ဟ်လၟုဟ်ဏံ ၜိုန်ရယှုက်ထုဲဒၟံၚ်ကီုလေဝ် စကၠောန်ရေၚ်တၠုၚ်ဒၟံၚ် ပရေၚ်စၟဳစၟတ်ရဂှ် အလဵုအသဳပရေၚ်ညဳသၟဟ်ကောန်ဂကူ (NUG) လလောၚ်တြးလဝ် ပ္ဍဲဂိတုမေ စၟတ်တ္ၚဲ (၉)ဂှ်ရ။
ပရိုၚ်-သြၚ်လောန်တိုၚ်(မ်)
ဗီုရုပ် -EPA
sanlontai