ညးကလေၚ်လုပ်ကၠုၚ် သီုလွဟ်လက်နက်တအ်ဂှ် ပ္တိတ်ကဵုလာဘ်သြန်ရောၚ် ကံၚ်ဇြဳပၞာန်လလောၚ်တြး

နေပျဳဒဝ် – မေ (၁၁)

ကံၚ်ဇြဳပၞာန်သီအဝဵုဂှ် ကေတ်နၚ်လွဟ်လက်နက်တုဲ ညးကလေၚ်ကၠုၚ် ဇရေၚ်ဍေံတအ်ဂှ် အောန်အိုတ်သြန် နူ (၂)ကိုတ်ဒကေဝ် ဂၠိုၚ်အိုတ် စဵုကဵု (၇၅)ကိုတ်ဒကေဝ် ဖျေံကဵုအာလာဘ်ရောၚ်ဂှ် လလောၚ်တြးကၠုၚ် နကဵုစၟတ်တ္ၚဲ တ္ၚဲဏံရ။

ဟိုတ်နူဟိုတ်နာနာတုဲ ညးအာစိုပ်ဒၟံၚ် ပ္ဍဲဂကောံပ္ကီုပရာပ် ပါလုပ်သီု PDF၊ ညးအာစိုပ်ဒၟံၚ် ပ္ဍဲဂကောံမ္ၚးသၞောဝ်တအ်ဂှ် သွက်ဂွံပါလုပ်ကၠုၚ် ပ္ဍဲပရေၚ်ဒက်ပ္တန်ကၟိန်ဍုၚ် ညံၚ်သ္ဂောံက္လေၚ်လုပ်စိုပ်ကၠုၚ် ပ္ဍဲဗွိုၚ်သၞောဝ် ကော်ဘိက်ဏာရဂှ် ဟီုသ္ဂးလဝ်ရ။

နကဵုညးကလေၚ်လုပ်စိုပ်ကၠုၚ်တအ်ဂှ် ယဝ်ရဒှ် ညးက္လိလောန်လဝ်ဒုဟ်ဒဏ်မမိက်ကဵုမွဲမွဲ မပ္တံကဵု ဂဗုတ်ဂစိုတ်မၞိဟ်၊ ဂဗုတ်ပလီုကောန်သမ္ဘာ၊ ဂဗုတ်ကဵုညးမွဲသ္အာၚ် ဇီုကပိုက်ဂိသ္ကေဝ်တအ်မ္ဂး ဒးဒုၚ်ဆေၚ်မုက်ကဵုဂဗုတ် ပ္ဍဲရုၚ်သၞောဝ်ဓဝ် အတိုၚ်သၞောဝ်ဥပဒေရောၚ်ဂှ် ဓမံက်ထ္ၜးလဝ် ပ္ဍဲတၚ်လလောၚ်တြးရ။

ညးမဒးဆေၚ်မုက်ကဵုဂဗုတ်ဗီုဏံဂမၠိုၚ်တအ်ဂှ် တုဲတဴကဵုဒုဟ်ဒဏ်တုဲ ကံၚ်ဇြဳပၞာန် ဖ္အောန်ယှအ်ဖျေံကဵု အတိုၚ်တၚ်နွံပၟိက် သၞောဝ်ဥပဒေရောၚ်ကီု ပရေၚ်ရီုဗၚ်နွံပၟိက်တအ်ဂှ်လေဝ် ရေၚ်တၠုၚ်ကဵုရောၚ်ဂှ် ဟီုသ္ဂးလဝ်ရ။

ကမၠောန်ပြဝကံၚ်ဇြဳပၞာန် ကၠောန်သ္ပဒၟံၚ်ဂှ် ဒှ်ကမၠောန် ကၠောန်သ္ပဗက် အတိုၚ်ကမၠောန်အလဵုအသဳ ပရေၚ်ညဳသၟဟ်ကောန်ဂကူကီု လဟီုကံၚ်ဇြဳပၞာန်ဂှ် သွက်ဂွံဒးပတှ်ေဟၟဲရဂှ် ဗိုလ်ဇၞော် CDM မွဲတၠ ဟီုကဵု ဌာန်ပရိုၚ်သြၚ်လောန်တိုၚ်(မ်)ရ။

နကဵုညးကလေၚ်လုပ်ကၠုၚ် သၟဝ်တဲကံၚ်ဇြဳပၞာန်တအ်ဂှ် သွက်ဂွံဆက်စၠောံကဵုလဝ်ပရိုၚ် ကုဂကောံအုပ်ဓုပ်၊ ဗဒိုပ်ဒပ်ပၞာန် ကေုာံ ဗဒိုပ်ဗၠာဲသၟိၚ် ခရိုၚ်၊ ပွိုၚ်ဍုၚ် မကြပ်ညောန်ကဵုဇကုတအ်ညိဂှ် ကော်ဘိက်လဝ်ရ။

ပ္ဍဲမဳဒဳယာတြးဝါဒတအ်ဂှ် ပရေၚ်မၞိဟ်ကၠုၚ်စိုပ် ဇူဗ္ဒာဲဇရေၚ်ကံၚ်ဇြဳပၞာန် နွံဒၟံၚ်ရဂှ် ၜိုန်ရဓမံက်ထ္ၜးဒၟံၚ် ခြာဟွံလအ်ဟွံလအ်ကီုလေဝ် သုၚ်စောဲ ဂကောံချဳဒရာၚ်ဒၟံၚ် ပ္ဍဲဗလးမုက်တိဇေတ်တ်ဟွံသေၚ်ကဵု ဂကောံပျူသဝ်ထဳတအ်တုဲ လီၜန်ဒၟံၚ်ညးဍုၚ်ကွာန်တအ်ရဂှ် ပရေၚ်ဟီုဂးပါ်ပါဲလေဝ် နွံကၠုၚ်ဒၟံၚ်ရ။

ပ္ဍဲကဵုလွဟ်လက်နက် ဂကောံပၞာန်သီအဝဵု ဖျေံကဵုအာလာဘ်ဂှ် ယဝ်ရလွဟ်ရိုၚ်ဖေဝ် ပါကၠုၚ်(၁)ဒကိုအ်မ္ဂး သြန်(၅၀)ကိုတ်ဒ္ကေဝ်၊ ယဝ်ရ လွဟ်ဂကောံဂကူလွဟ်ဂၠေံ ပါကၠုၚ်(၁)ဒကိုအ်မ္ဂး (၃၀) ကိုတ်​ဒ္ကေဝ်၊ ယဝ်ရလွဟ် ညံၚ်ရဴပၠံၚ်စိန်၊ လံၚ်ချာ၊ အာပဳဂျဳတအ် ပါကၠုၚ်မ္ဂး (၇၅)ကိုတ်ဒ္ကေဝ်၊ လွဟ်ကၠောန် ပၠံၚ်ကလိတ်၊ လွဟ်ကၠောန် ပၠံၚ်စိန်၊ လွဟ်ကၠောန် (၁)ဒကိုအ်ပါကၠုၚ်မ္ဂး (၅)ကိုတ်၊ မာၚ်ကၠောန်၊ ဗုမ်ကၠဟ်တအ်ပါကၠုၚ်မ္ဂး (၃)ကိုတ်၊ မ္ၚးနူလွဟ်လက်/မကမ်တုဲ ကပေါတ်သုၚ်စောဲတၞဟ်သ္အာၚ်(ဥပမာ-စက်ဟီုအရေဝ်) ပါကၠုၚ်မ္ဂး (၂)ကိုတ်ဒ္ကေဝ် Drone သုၚ်စောဲသွက်ပရေၚ်ပါ်ခတိုဟ်မာန် ပါကၠုၚ်(၁)ဖ္ဍိုက်မ္ဂး ပအပ်ကဵုအာ သြန် (၅၀)ကိုတ်ဒ္ကေဝ်ရောၚ်ဂှ် ဓမံက်ထ္ၜးလဝ်ရ။

ပရိုၚ်-သြၚ်လောန်တိုၚ်(မ်)

ဗီုရုပ် – ကံၚ်ဇြဳပၞာန်