ထံၚ်ကၠုၚ်ပရိုၚ် ကုခရိုၚ်သဓီု KNU နကဵုက္ၜၚ်ကျာ အရိုဟ်တ္ၚဲအဆက်က်

သဓီု၊ မေ (၁၁)

ပ္ဍဲတိဍာ်ခရိုၚ်သဓီု ဒပ်မဟာ (၁) ဗော်သွးကောန်ဂကူကရေၚ် KNU ဂှ် ပပ္တံနူမွဲၜါတ္ၚဲတုဲကၠုၚ်တေံတုဲ ဒပ်ကံၚ်ဇြဳပၞာန် ကၠောန်သ္ပထံၚ်ကၠုၚ်ပရိုၚ် ကုက္ၜၚ်ကျာ အရိုဟ်ဒဒှ်တ္ၚဲရောၚ်ဂှ် ညးတာလျိုၚ် ခရိုၚ်သဓီု KNU ဂမၠိုၚ် ဟီုကဵု ဌာန်ပရိုၚ်သြၚ်လောန်တိုၚ်(မ်) ရ။

ဒပ်ကံၚ်ဇြဳပၞာန်ဝွံ တုဲကၠုၚ်ပ္ဍဲဂိတုမေ (၇) တေံ ကြဴနူဗ္တိုက်ဂြာတ်မခတိုဟ် ကုဗ္ဒိုပ် PDF မၞုံဗ္ဒါဲကွာန်(ဝါပသဲ) ကေုာံ ကွာန်(ဝါပသဲ) ပွိုၚ်ဍုၚ်ရေဝ်သၟဝ်ကျာ ပ္ဍဲတွဵုရးဍုၚ်မန် နကဵုက္ၜၚ်ကျာတုဲဂှ် ကၠောန်သ္ပထံၚ်ကၠုၚ်ပရိုၚ် ပ္ဍဲတိဍာ်ခရိုၚ်သဓီု KNU နကဵုက္ၜၚ်ကျာဂှ် ဟွံပိုတ်သ္ကုတ်ရ။

နဒဒှ်အရာတၟေၚ်တၟဟ်ဂှ်မ္ဂး ဒပ်ကံၚ်ဇြဳပၞာန်ဝွံ ပ္ဍဲဂိတုမေ (၉) မွဲတ္ၚဲဓဝ် ပ္ဍဲကဵုပွိုၚ်ဍုၚ်ကျာ်ထဝ် ကေုာံ ပွိုၚ်ဍုၚ်ၜဳကလေၚ် မဒှ်တိဍာ်ခရိုၚ်သဓီု KNU ဂှ် ကၠုၚ်စိုပ်ထံၚ်ဏာလဝ်ပရိုၚ် နကဵုက္ၜၚ်ကျာ လၟိဟ်လ္တုန် ဟွံအောန်နူကဵု (၁၀) ဝါရောၚ်ဂှ် သ္ဂးရ။

ဒပ်ကံၚ်ဇြဳပၞာန်ဝွံ ဟိုတ်နူကၠောန်သ္ပကၠုၚ် ပရေၚ်ထံၚ်ပရိုၚ် ကုက္ၜၚ်ကျာဂှ်ရ ဂွံစဵုဒၞါဘဲသၞအန္တရာယ်က္ၜၚ်ကျာ သွက်ဂွံဒစးဒုၚ်ပလေဝ်ပလေတ်လဝ်အိုတ်ဂှ်ကဵု နကဵုညးဍုၚ်ကွာန်တံ စွံသတိဗွဲတၟေၚ်တုဲ သွက်ဂွံအာကၠုၚ်အိုတ်ဂှ် ဖ္တိုက်ဖ္အောဝ်လဝ်ရ။

ပပ္တံနူဂိတုတုဲကၠုၚ်တေံတုဲ ဂကောံဒပ်ပံၚ်ကောံ ဂကောံဇြဟတ်ပၠန်ဂတးတံ မွဲဏှမွဲဏှဟီုဂွံ ဟိုတ်နူအာစိုပ်ဗ္တိုက်လဝ် ကုဗ္ဒိုပ်ဒပ်ပၞာန်ဗၟာ နူအပ္ဍဲခရိုၚ်သဓီုဂှ်ကဵု ဌာန်ဂအုပ် ၄၄ ဒပ်ကံၚ်ဇြဳပၞာန် ဖျေံသ္ဇိုၚ်ပွိုၚ်ဍုၚ်ကျာ်ထဝ်တံ နကဵုလွဟ်ဇၞော်သၟးဟွံက သီုကဵုအာစိုပ်ဗ္တိုက်ဒၟံၚ် ကဵုဒရုၚ်ဂှ်ရ လ္ပာ်ကံၚ်ဇြဳပၞာန် သွက်ဂွံကၠောန်ကၠုၚ် ပရေၚ်ဗ္တိုက်တရဴကျာတံဂှ် စဳဇန်ကၠုၚ်ရ။

ဒပ်ကံၚ်ဇြဳပၞာန်ဝွံ ပ္ဍဲသၞာံတုဲကၠုၚ်တေံလေဝ် ၜိုန်ရထောံလဝ်မခတိုဟ် ဗ္တိုက်လဝ် ဒၞါဲဒတန်ဌာန်ဂအုပ် ဒပ်မဟာ (၁) တြေံ ဗော်သွးကောန်ဂကူကရေၚ် KNU တံဂှ်ကီုလေဝ် ဒၟါနူဆုဲပြံၚ်လဝ် ဒၞါဲရုၚ်ဌာန်ဂအုပ်ဂှ်ရ မၞိဟ်ဇီုကပိုက်ဂွံဝပ်ဟွံမွဲမွဲသာ် စမြိုၚ်လ္ၚဵုတံဟေၚ် ဇီုကပိုက်လီုလာ်အာလဝ်ရ။

ပရိုၚ်−သြၚ်လောန်တိုၚ်(မ်)

ဗီုဓာတ်−KNU