ဟိုတ်နူ PDF (၅)တၠ လုပ်ကၠုၚ်ဖျေံလွဟ်တုဲ ဖျေံကဵုလဝ်လာသြန်ရဂးတုဲ ကံၚ်ဇြဳပၞာန်လီဠာန်တြးဝါဒ

အၚ်ဝ – မေ (၁၂)

ကြဴနူ ကံၚ်ဇြဳပၞာန် လလောၚ်တြးကၠုၚ် ညးမကေတ်နၚ်လဝ်လွဟ် နူကဵုဂကောံပၠန်ဂတးကဵုကံၚ်ဇြဳပၞာန်တအ်ဂှ် အပ်ပြာပ်ကဵုအာလာဘ်ရောၚ်ဂှ်တုဲ PDF ၅ တၠ လုပ်ကၠုၚ်ဖျေံလဝ်လွဟ်သီုလွဟ်လက်နက်ရဂှ် တြးဝါဒတုဲ လလောၚ်တြးလဝ်ပရိုၚ်ရ။

ညးလုပ်စိုပ်ကၠုၚ်ဖျေံလဝ်လွဟ် ပ္ဍဲဂိတုမေ တုဲကၠုၚ်စၟတ်တ္ၚဲ(၁၀)တေံဂှ် ဒုၚ်တၠုၚ်ဒုၚ်တြ ပ္ဍဲၝောံခန်တန်ဗ္တောန်ရးပၞာန် ဌာန်ဂအုပ်ဒပ်ပၞာန်သ္ကုတ်လ္ဒောဝ် ပွိုၚ်ဍုၚ်အောၚ်မျတာသာန် ရးဒေသအၚ်ဝရဂှ် ဟီုသ္ဂးလဝ်ရ။

PDF ၅ တၠ လုပ်စိုပ်ကၠုၚ်ဇရေၚ်ကံၚ်ဇြဳပၞာန် (၅)တၠတအ်ဂှ် အတိုၚ်ကဵုလဝ်ကတိပါၚ်ဟေၚ် ပ္အပ်ပြာပ်ကဵုလဝ်လာဘ်သြန်တုဲ ပြံၚ်စၠောံပ္အပ်ပြာပ်လဝ်ကဵုဂကောံကၟိန်အိန်ထံၚ်ညးတအ်ရဂှ် ဓမံက်ထ္ၜးလဝ်ရ။

ညးမဒးဟီုဂးလဝ် PDF လုပ်ကၠုၚ်ဖျေံလွဟ်ဇရေၚ်ကံၚ်ဇြဳပၞာန်တအ်ဂှ် ဒှ်ကောန်ဂကောံပျူသဝ်ထဳ ကေုာံဂကောံ တွေတောက် ဍေံတအ်ဒက်ကဵုလဝ်ရဂှ် ညးဒေသမွဲတၠ ဟီုကဵုဌာန်ပရိုၚ်သြၚ်လောန်တိုၚ်(မ်)ရ။

မွဲကရောံကဵုညးကၠုၚ်စိုပ်ဖျေံလွဟ်တအ်ဂှ် ဟိုတ်နူကေတ်နၚ်လဝ် လွဟ်ဇမၠေံကၠောန် (၂)ဒကိုအ်၊ လွဟ်ဇမၠေံ မံၚ်ကလေၚ် မွဲဒကိုအ်ရ ပံၚ်သီုဖအိုတ် အပ်ပြာပ်ကဵုလဝ် သြန် (၃၀)ကိုတ် အတိုၚ်ကဵုလဝ်ကတိပါၚ်ရဂှ် ဟီုသ္ဂးလဝ်ရ။

ကံၚ်ဇြဳပၞန်ဂှ် ကြဴနူဍေံတအ် သီကေတ်အဝဵုတုဲဂှ် ဒးဒုၚ်ဆေၚ်ဒၟံၚ်မုက်ကဵုဂကောံရပ်လွဟ်ကောန်ဍုၚ်အရၚ်ကီု သီုကဵု၈ကောံရပ်လွဟ် မံက်ဂတဝ်တိတ်ကၠုၚ် ဂၠိုၚ်ကဵုကၠံ ပါလုပ်ဗတိုက်သရိုဟ်ဒၟံၚ်သၞောတ်တၠအဝဵုပၞာန် ပ္ဍဲဗလးမုက်ပေါဲဗတိုက် စဵုကဵုအခိၚ်တ္ၚဲဏံရ။

“အကြာတၚ်လလောၚ်တြးဗီုပြၚ်ဏံကဵုဂကောံဇြဟတ်ပၠန်ဂတးတအ်ဂှ် ဍေံတအ်ဂွံပရဲမမိက်ကဵုမွဲမွဲဏောၚ်ဂးတုဲ ကၠောန်သ္ပကၠုၚ်ရ။ ဗျူဟာဏံဂှ် ဒှ်ဗျူဟာအံၚ်ဇၞးမွဲဟွံသေၚ်ပုဟ် အဲညာတ်ကေတ်ရ” ဂှ်ဗိုလ်ဇၞော်လေန်ထေတ်အောၚ် ဟီုကဵုဌာန်ပရိုၚ်သြၚ်လောန်တိုၚ်(မ်)ရ။

ပ္ဍဲလက်ထက်တၠအဝဵုပၞာန်တြေံ ဥူနေဝေန် ဥူတာန်ယှိုဲကၠာတေံလေဝ် စကာကဵုဂကောံဇြဟတ်ပၠန်ဂတးတအ်လုပ်ဖျေံလွဟ်တုဲ ဖျေံကဵုအခေါၚ်ကၠောန်ပရေၚ်ပိုန်ဒြပ်တုဲ ပရေၚ်ပရောပါ်ဒကးဆီလေဝ် နွံကၠုၚ်ဒၟံၚ်ဂၠိုၚ်ဂၠေၚ်ရ။

ပရိုၚ်-သြၚ်လောန်တိုၚ်(မ်)

ဗီုရုပ် – ရုပ်ဂအုပ်ပရေၚ်စဵုဒၞာ