ညးဒေသကွာန်ပဇြဳဂျဳတအ် စဵုကဵုအခိၚ်ပေၚ်ကၠုၚ်မွဲဂိတုဏံ ဟွံဂံၚ်စဴဌာန်ဒၟံၚ်ဏီ

ကဗလူ -မေ (၁၂)

ရးဒေသသေတ်ဂါၚ်၊ ပွိုၚ်ဍုၚ်ကဗလူ ကွာန်ပဇြဳဂျဳဂှ် ၜိုန်ရပရေၚ်ဒပ်ကံၚ်ဇြဳပၞာန်ပန်ပှ်ောလဝ်ကဵုက္ၜၚ်ကျာ ပေၚ်ကၠုၚ်ပွိုၚ်(၁)ဂိတုကီုလေဝ် ညးဒေသတအ်ဟွံဂံၚ်က္လေၚ်စဴဌာန်ဒၟံၚ်ဏီတုဲ ဒှ်ဒၟံၚ်ညံၚ်ကွာန်လီုလီုရဂှ် ညးဒေသဂမၠိုၚ်ဟီုကဵုဌာန်ပရိုၚ်သြၚ်လောန်တိုၚ်(မ်)ရ။

ကြဴနူပရေၚ်ကံၚ်ဇြဳပၞာန်ဗတိုက်ပန်ပှ်ောလဝ်ကဵုက္ၜၚ်ကျာတုဲဂှ် ထ္ပက်လုပ်ကၠုၚ်ကရောၚ်ပၞာန်ပ္ဍဲပွိုၚ်တိုက်မလေဝ်တုဲ ၜိုန်ရဖျေံလဝ်ဗ္ဒပ်ကီုလေဝ် ပ္ဍဲဂိတုဨဗြဴ စၟတ်တ္ၚဲ(၃၀) တုဲကၠုၚ်တေံဂှ်ကရောၚ်ပၞာန်ကလေၚ်ဆုတ်တိတ်အာလဝ်ရ။

ၜိုန်ဂှ်ကီုလေဝ် ပ္ဍဲပွိုၚ်တိုက်လေဝ်ဂှ် ညးဍုၚ်ကွာန်နူကွာန်မပ္တံကဵု ပဇြဳဂျဳ၊ ချောၚ်တာ တအ်ဂှ် မံၚ်ဒၟံၚ်ပ္ဍဲဂြိုပ်ကေုာံပ္ဍဲဝါတအ်ဟေၚ်တုဲ ဂကောံပရေၚ်မၞိဟ်တအ်၊ ဂကောံဒပ်စဵုဒၞာတအ်ကေုာံ ၈ကောံအလဵုအသဳNUG ရီုဗၚ်ကဵုလဝ်ရဂှ် ဂွံတီကေတ်ရ။

“ကၠာတေံဂှ် မုက်မတ်ကေၚ်ဆဵုကေၚ်ညာတ်ဒၟံၚ်မွဲဂကောံမွဲစွံ၊ ကေၚ်စသုၚ်လဝ်ပုၚ်သွမွဲစွံတအ်ဂှ် ဟွံညာတ်ကေတ်ဂှ်ရ သာတုဲ ဒးဒုၚ်စသိုၚ်ရ။ ကွာန်လေဝ် ဒပ်ပၞာန် စံၚ်ထောံတှ်ေ ကလေၚ်စဴမံၚ်ဏောၚ်ဟီုလေဝ် လ္ၚဵုဂှ် သ္ၚိဒၟံၚ်ဟၟဲရပုဟ်။ ဟီုတှ်ေ သာတုဲဒှ်ဒိုက်စိုတ်ရ”ဂှ် ညးဒေသမွဲတၠ ဟီုကဵုဌာန်ပရိုၚ်သြၚ်လောန်တိုၚ်(မ်)ရ။

အခိၚ်လၟုဟ်ဏံမ္ဂး ညးဒေသ ကောန်ကွာန်ပဇြဳဂျဳတအ်ဂှ် ဟိုတ်နူဒးဒုၚ်ဗတိုက်လဝ်ကဵုက္ၜၚ်ကျာတုဲ ဃောဒှ်ဒၟံၚ်ဒဒိုက်စိုတ်ဂှ်ရ အခိၚ်ညးတၠဒါန်တအ်ကဵု ဂကောံကၠုၚ်ကဵုရီုဗၚ်တအ် ကၠုၚ်စိုပ်မ္ဂး ညးအောန်စိုတ်လရိုအ်ဒၟံၚ်လေဝ် နွံဒၟံၚ်ဖိုဟ်ဏီရ။

ကွာန်ပဇြဳဂျဳဂှ် ပ္ဍဲဂိတုဨဗြဴ စၟတ်တ္ၚဲ(၁၁) ဂှ် ကံၚ်ဇြဳပၞာန်ကၠုၚ်ဂြာတ်ထောံဖျေံလဝ်ဗုမ်ကဵုက္ၜၚ်ကျာတုဲ ညးဒေသဗွိုၚ် (၁၇၀)တၠဒးချိုတ်လဝ်တုဲ ကြဴနူဂိတုဨဗြဴ စၟတ်တ္ၚဲ(၁၉)တုဲဂှ် ကရောၚ်ပၞာန်လုပ်စိုပ်ကၠုၚ်တုဲ စံၚ်ပလီုလဝ်ကွာန် ပ္ဍဲပွိုၚ်တိုက်မလေဝ် (၃)ကွာန်ရဂှ် ဂွံတီကေတ်ရ။

ကြဴနူဂှ် ဂိတုဨဗြဴ စၟတ်တ္ၚဲ (၂၀)ဂှ်မ္ဂး စံၚ်ပလီုလဝ်ကွာန်လေဝ်တွောန်ဇြဳဂှ်ရ လၟိဟ်သ္ၚိ(၇၄)မ၊ လၟိဟ်သ္ၚိကွာန်ချောၚ်တာ (၅၄)မ တူပၟတ်လီုလာ်အာလဝ်ရတုဲ ကွာန်ပဇြဳဂျဳဂှ်မ္ဂး ညးဒေသတအ်ဟွံကလေၚ်စဴကၠုၚ်ဏီဂှ်ရ ဂွံကံက်ကေတ်စရၚ်ချိုတ်တ်ပၠိုတ်တ်ၜိုန်ရဟၟဲဏီကီုလေဝ် ချိၚ်ခယျကေတ်မ္ဂး လၟိဟ်သ္ၚိ ဗွိုၚ်(၁၀၀) ဒးဒုၚ်စံၚ်လဝ်ရဂှ် ဂွံတီကေတ်ရ။

ဗုမ်ကံၚ်ဇြဳပၞာန်သီအဝဵုဂှ် ဂြာတ်ထောံဖျေံလဝ်ပ္ဍဲကွာန်ပဇြဳဂျဳဂှ် ဒှ်ဂကူဗုမ်ပၟတ် ပါ်ခတိုဟ်ဇြဟတ်ဇၞော် ကော်ဂး “Vacuum bomb” ရဂှ် ဂကောံမၚ်ရံၚ်ခါတ်အကာဲအခေါၚ်အရာ (HRW) လလောၚ်တြးလဝ်ပ္ဍဲဂိတုမေ စၟတ်တ္ၚဲ(၉)ဂှ်ရ။

အတိုၚ်တၚ်ဂၞၚ်အလဵုအသဳပရေၚ်ညဳသၟဟ်ကောန်ဂကူ (NUG) မ္ဂး ပ္ဍဲပွိုၚ်ကာလပၞာန်သီအဝဵုပွိုၚ်(၂)သၞာံဏံ ပရေၚ်ဗတိုက်ပန်ပှ်ောကဵုက္ၜၚ်ကျာအလုံမွဲကၟိန်ဍုၚ် (၆၅၀) ဝါပြၚ်နွံကၠုၚ်ဒၟံၚ်တုဲ ကောန်အရာပ်(၂၈၀)ပြၚ်ဒးချိုတ်လဝ်ကီု ကောန်အရပ်(၃၇၀)ပြၚ်တအ်လေဝ် ဒှ်လဝ်ဝပ်ရဂှ် လလောၚ်တြးလဝ်ရ။

ပရိုၚ်-သြၚ်လောန်တိုၚ်(မ်)

ဗီုရုပ် – ကွာန်ပဇြဳဂျဳ ဒးဒုၚ်ဂြာတ်ထောံဖျေံလဝ်ဗုမ်ကဵုဒပ်ပၞာန်