လဗိုတ်ကျာဇြိုၚ်ကလုမ်မိုဝ်ခါဇြဟတ်ဇၞော်ဂှ် လုပ်စိုပ်တတ်ကၠောံ ပ္ဍဲဍုၚ်ကျောက်ဖျူ ဗ္ၜတ်မွဲနာဍဳ မိုၚ်(၉၀)ဏောၚ်

လဂုၚ်၊ မေ(၁၂)

လဗိုတ်ကျာဇြိၚ်ကလုမ်မိုဝ်ခါဂှ် တ္ၚဲဏံအခိၚ်နူဂယးဂှ် ဇြဟတ်ဇၞော်တိုန်ကၠုၚ်တုဲဒဒှ်ရလုပ်စိုပ်တတ်ကၠောံ ဍုၚ်ကျောက်ဖျူ ပ္ဍဲဂိတုမေ စၟတတ္ၚဲ (၁၄) အခိၚ်တ္ၚဲစေၚ်ရောၚ်ဂှ် သ္ကိုပ်စၞောန်ပ္ညုၚ်ဌာနက္ဍိုက်က္ဍိုပ်စမ်ၜတ်ဗြဲကျာသၟဝ်တဲကံၚ်ဇြဳပၞာန် လလောၚ်တြးလဝ်ရ။

ကဆံၚ်လဗိုတ်ကျာမၞုံဒၟံၚ်လၟုဟ်ဂှ် အေဂျေန်ဇြဳစမ်ၜတ်ဗြဲကျာကၟိန်ဍုၚ်နာနာဂမၠိုၚ် စၟတ်သမ္တီလဝ်ကဆံၚ်သာ်ဗ္ကေတ် ဇြဟတ်သ္ကာတ်အိုတ်တုဲ ဌာနစမ်ၜတ်ဗြဲကျာဆေၚ်စပ်ကဵုကၟိန်ဍုၚ်ဗၟာဂှ် အခိၚ်လၟုဟ်မ္ဂး ဒဒှ်ရစၟတ်သမ္တီလဝ်ကဆံၚ်အရံၚ်သာ်ဍာ်မိတ်ရဂှ် လလောၚ်တြးလဝ်ရ။

နူကဵုကဆံၚ်လဗိုတ်ကျာသၟတ် ဇြဟတ်ခိုဟ် က္တဵုဒှ်ဒၟံၚ်ပ္ဍဲသ္ကုတ်ဒိုဟ်အဂၞဲက္ၜဳပေန်ဘၚ်္ဂလာပေန်လေဝ်အဝ်ဂှ် ဆုဲပြံၚ်ကၠုၚ်ဒၟံၚ်လ္ပာ်ဒိုဟ်ဗာယပ် ဇြဟတ်ဇၞော်တိုန်ကၠုၚ်ဒၟံၚ်တုဲ စိုပ်ကၠုၚ်ဒဒှ် လဗိုတ်ကျာဇြိုၚ်ကလုမ်(Cyclonic Storm) “မိုဝ်ခါ(MOCHA)” ရ။

လဗိုတ်ကျာဂှ် သ္ပလဝ်ဗဟိုဝ်ကဵု ခြာဇမ္ၚောဲမိုၚ်ဍာ်(၃၆၅) လ္ပာ်ပလိုတ်-ပလိုတ်တ္ကအ်ကိုဝ်ကိုဝ် မိုၚ်ဍာ် ၜိုတ်(၄၇၅) လ္ပာ်ဒိုဟ်ပလိုတ်- ပလိုတ်တ္ကအ်ဟိုၚ်ဂျဳရ။

သ္အာၚ်နူဂှ်ပၠန် သ္ပလဝ်ဗဟိုဝ်ကဵု မိုၚ်ဍာ် လ္ပာ်ဒိုဟ်နေရတိ သၠုၚ်ကျာဍုၚ်သေတ်တွေ ၜိုတ် (၆၁၅)မိုၚ်၊ မိုၚ်ဍာ် လ္ပာ်ဒိုဟ်နေရတိ ပလိုတ်တ္ကအ်နဳကိုဝ်ဘာ၊ ဍုၚ်အိန္ဒိယ ၜိုတ်(၄၁၅)မိုၚ်၊ မိုၚ်ဍာ် လ္ပာ်ဒိုဟ်နေရတိ -ပလိုတ်ပိုဝ်ပလေဝ်ယာ ၜိုတ်(၂၈၀)ကဵု ဗလးက္ၜဳ မိုၚ်ဍာ် ဒိုဟ်နေရတိ – သၠုၚ်ကျာဍုၚ်ကအ်ဗဇြာ ခြာၜိုတ်(၆၅၅)မိုၚ်ရဂှ် ဂွံတီကေတ်ရ။

အကာဲအရာမိုဝ်ခါ အခိၚ်လၟုဟ်ဏံဂှ် အကာဲအရာပ္တဝ်ကၠုၚ်က္ဍိုပ်ကဵုပြၚ်က္ၜဳဘၚ်္ဂလာဒေတ်ရှ-ဗၟာနွံဒၟံၚ်ဂှ်ရ စၟတ်သမ္တီလဝ် ကဆံၚ်အရံၚ်သာ်မိတ်ရဂှ် ဂွံတီကေတ်ရ။ ဇြိုၚ်ကလုမ်မိုဝ်ခါဂှ် ဇြဟတ်ဇၞော်တိုန်ကၠုၚ်ဒၟံၚ်တုဲ ပ္ဍဲဂိတုမေ စၟတ်တ္ၚဲ(၁၂)ဂှ် အာစိုပ်ဒဒှ်လဗိုတ်ကျာ ဇြဟတ်ဇၞော်လောန်ရောၚ်ဂှ် ဂွံတီကေတ်ရ။

လဗိုတ်ကျာမိုဝ်ခါဇြိုၚ်ကလုမ်ဂှ် ပ္ဍဲဂိတုမေ စၟတ်တ္ၚဲ (၁၄)ဂှ် လုပ်စိုပ်တတ်ကၠောံ အကြာဍုၚ်ကအ်ဘဇြာ၊ ကၟိန်ဍုၚ်ဘၚ်္ဂလာဒေတ်ရှ် ကေုာံဍုၚ်ကျောက်ဖျူ(Kyaukpyu) ကၟိန်ဍုၚ်ဗၟာ ပြၚ်က္ၜဳသ္ကုတ်သၟဝ်ကျာ မာန်ဒၟံၚ်ရောၚ်ဂှ် ချိၚ်ခယျကေတ်လဝ်ရ။

ဟိုတ်နူလဗိုတ်ကျာဇြိုၚ်ကလုမ်မိုဝ်ခါတုဲ သ္ပတမ်နူတ္ၚဲဏံ အခိၚ်နူဂယးတုဲ စဵုကဵုဂိတုမေ စၟတ်တ္ၚဲ(၁၅) ဏံ ပ္ဍဲနေပျဳဒဝ်၊ ရးဒေဇၞော်သေတ်ဂါၚ်၊ ရးဒေသဇၞော်အၚ်ဝ၊ ရးဒေဇၞော်မဂွေ၊ ရးဒေသဇၞော်ဗဂေါ၊ ရးဒေသဇၞော်လဂုၚ်၊ ရးဒေသဇၞော်ဨရာဝတဳ၊ ရးဒေသဇၞော်တၞၚ်သြဳ၊ တွဵုရးကချေၚ်၊ တွဵုရးသေံ၊ တွဵုရးချေၚ်၊ တွဵုရးရခေၚ်၊ တွဵုရးကရေၚ်ဍာဲ၊ တွဵုရးကရေၚ် ကေုာံတွဵုရးဍုၚ်မန်တအ်ဂှ် ပ္ဍဲဒၞာဲဗွဲမဂၠိုၚ်ဗြဲဂူမာန်ရ။

ရးဒေသဇၞော်သေတ်ဂါၚ်သ္ကုတ်သၟဝ်၊ ရးဒေသဇၞော်အၚ်ဝ၊ ရးဒေသဇၞော်မဂွေ၊ ရးဒေသဇၞော်လဂုၚ်၊ ရးဒေသဇၞော်ဨရာဝတဳ၊ တွဵုရးချေၚ်ကေုာံတွဵုရးသေံ၊ တွဵုရးကရေၚ် ကေုာံတွဵုရးမန်တအ်တဂှ် ပ္ဍဲဒၞာဲလ္ၚဵုဗြဲဇၞော်မာန်ရဂှ် ဂွံတီကေတ်ရ။

ပရိုၚ်-သြၚ်လောန်တိုၚ်(မ်)

ဗီုရုပ်- ဌာနစမ်ၜတ်ဗြဲကျာ