သွက်ညးဍုၚ်ကွာန်ပါဲဒဴဘဲပၞာန် ၄ ကိုဋ်ပြၚ်ဂှ် နွံဒၟံၚ်ပၟိက်အရီုဗၚ်ဂမၠိုၚ်ရောၚ် KNU ဟီု

ကဝ်တူလေဝ်၊ မေ (၁၂)

ပ္ဍဲတိဍာ်အုပ်ဓုပ်ကဝ်တူလေဝ်ဂှ် ဟိုတ်နူပဋိပက္ခပရေၚ်ပၞာန်တုဲ သွက်ညးဍုၚ်ကွာန်ပါဲဒဴဘဲပၞာန် ၄ ကိုဋ်ပြၚ်ဂှ် နွံပၟိက်ဒၟံၚ် အရီုဗၚ်ပရေၚ်ဗ္စာရဏာမၞိဟ် ဗွဲတၟေၚ်ရောၚ် ဗော်သွးကောန်ဂကူကရေၚ် KNU ဗဟဵု လလောၚ်ပ္တိတ်လဝ် နကဵုစၟတ်တ္ၚဲ မေ (၁၁) တေံရ။

အပ္ဍဲတိဍာ်အုပ်ဓုပ်ကဝ်တူလေဝ်ဂှ် ပပ္တံနူဒပ်ပၞာန်သီအဝဵုတုဲ ဒဵုကဵုတ္ၚဲဏံ ပရေၚ်ချဳဒရာၚ်ပရေၚ်ပၞာန် ကေုာံ ပွမဝးပ္ကဝ်အခေါၚ်အရာမၞိဟ် နူဒပ်ကံၚ်ဇြဳပၞာန် ကေုာံ ဒပ် BGF တံဂှ် မွဲတ္ၚဲတုဲမွဲတ္ၚဲ သာတုဲသၠုၚ်ပ္တိုန်ကၠောန်ၜိုတ်ကၠုၚ်ဂှ်ရ ညးဍုၚ်ကွာန် ၄ ကိုဋ်ပြၚ်ဝွံ ဒးမံၚ်တန်တဴဒၟံၚ် ဖေက်က်ဂၟံက်က်တုဲ ဒးဂြိပ်ဒဴပါဲဒလေတ်ဒၟံၚ် ဒၞါဲဗၠးဘဲတံရ။

ပေါဲဗ္တိုက်ဂမၠိုၚ် ဟိုတ်နူက္တဵုဒှ်ဒၟံၚ်လၟေၚ်ဒဒှ်တ္ၚဲကီု၊ သီုကဵုပွဖံက်ပ္ကဝ်အခေါၚ်အရာမၞိဟ် ဒပ်ကံၚ်ဇြဳပၞာန်တံဂှ်တုဲ ကမၠောန်ညးဍုၚ်ကွာန် မွဲကိုဋ်ပြၚ် မ္ဒးကၠောန်ၜိုတ်စသုၚ်ဒၟံၚ်တံ ဒးဆောံလေၚ်အာလဝ်တုဲ ညးဍုၚ်ကွာန်ဗွဲမဂၠိုၚ်ဂၠေၚ်ဂှ် ဒးဆေၚ်မုက်ဒးဂဗဒၟံၚ် ကုအခက်အခုဲပရေၚ်စသုၚ်မံၚ်စံၚ် ဗွဲမဂၠိုၚ်ဂၠေၚ်ရ။

သ္ပတွဵုနူသၞာံဏံ ၂၀၂၃ ဂိတုဂျာန္နဝါရဳဏံဂှ်တုဲ ဗော်သွးကောန်ဂကူကရေၚ် KNU ဂှ် လၟေၚ်ဂိတု ကဵုဒၟံၚ်ဇြဟတ်ရီုဗၚ်ဒၟံၚ် ဇွောံမစၞစ သွက်လၟိဟ်မၞိဟ် ၈၅၀၀၀ တံရောၚ်ဂှ်လေဝ် ထ္မံက်ထ္ၜးလဝ် ပ္ဍဲတၚ်လလောၚ်တြးဂှ်ရ။

ညးဍုၚ်ကွာန်ပါဲဒဴဘဲပၞာန်ဂမၠိုၚ်ဝွံ ဒးဆေၚ်မုက်ဂဗဒၟံၚ်ကဵု ပြသၞာဇွောံမစၞစဟွံရုပ်ဂပ်၊ သွက်ဒၞါဲမံၚ်စ္ၜုဲစ္ၜော်တံဂှ် ဖ္ဍာန်ဗ္ဒၚ်ဟွံရုပ်ဂပ်၊ ဆေၚ်စပ်ကဵုပရေၚ်ထတ်ယုက်တံဂှ်မ္ဂး ပြသၞာဂဥုဲဇဗ ဟွံရုပ်ဂပ်တံဂှ်တုဲ နွံပၟိက်ဒၟံၚ် အရီုဗၚ်ပရေၚ်ဗ္စာရဏာမၞိဟ်ကာတၟေၚ် သွက်ညးပါဲဒဴဘဲပၞာန်တံရောၚ်ဂှ် KNU သ္ဂးလဝ်ရ။

စပ်ကဵုအခက်အခုဲ ညးဍုၚ်ကွာန်ပါဲဒဴဘဲပၞာန်တံ ဒးဆေၚ်ဒၟံၚ်မုက်ဂှ်တုဲ ညးမၞုံအခေါၚ်ဟီုဂး KNU ပဒိုဝ်သဝ်ဂလာသေ ဂှ် ဟီုလဝ်ကဵု သြၚ်လောန်တိုၚ်(မ်) သာ်ဏံရ။

“ညးဍုၚ်ကွာန်တံ အခိၚ်လၟုဟ် ဒှ်ဒၟံၚ်ဒဒိုက်ကွေံကွေံဟီုဂှ် တီဒၟံၚ်အလုံဂၠးမွဲရ။ မွဲပၠန်ဂှ် ရေၚ်တၠုၚ်လဝ်သာ်လဵုရောဟီုမ္ဂး ပိုယ်တံဒက်ကမ္မတဳတုဲ ပအပ်ကဵုတာလျိုၚ်တုဲ ကေတ်အဆက်ကဵု ဂကောံကဵုအရီုဗၚ် ဍုၚ်သ္အာၚ်တံတုဲ ရေၚ်တၠုၚ်ဒၟံၚ်နွံရ။ ပြဟ်ဟ်ဏံ သွက်ညးဍုၚ်ကွာန်တံဂှ် လ္ၚဵုတံဂှ်တှ်ေ ဒးပါဲဒလေတ်ဒၟံၚ်နွံကီုလေဝ် ဂွံမံၚ်ဒၟံၚ်သၟဝ်ဖ္ဍာန်ဗ္ဒၚ် ခိုဟ်ဟ်ဂီုဂီုကၠီုကၠီုဏီ။ လ္ၚဵုတံဂှ်လေဝ် အကာဲအရာဒးအောပ်မာ ပ္ဍဲဒဵုပ္ဍဲဂြိုပ်တေံဂှ်နွံဒၟံၚ်။ ပြဟ်ဟ်ဏံ ဟိုတ်နူစိုပ်ကၠုၚ် ရာသဳဗြဲဂှ်ရ သွက်မၞိဟ်မံၚ်ဒၟံၚ် အပ္ဍဲဂြိုပ်တေံဂှ် ပိုယ်တံ သာတုဲဒှ်ဓဝိၚ်ရ။ ၜိုန်ဂှ်ကီုလေဝ် သွက်ညးဍုၚ်ကွာန်သှ်ေဒၟံၚ်ဂှ်လေဝ် စပ်ကဵုပရေၚ်ဇွောံမစၞစပိုယ်တံတုဲ တၚ်နွံပၟိက်ဂှ် နွံဒၟံၚ်တၟာဂလိုၚ်ဏောၚ်ဟီုတှ်ေ က္ဍိုပ်သ္ကိုပ်လ္ပာ်ပိုယ်ဂမၠိုၚ် ကေုာံ သီုကဵုက္ဍိုပ်သ္ကိုပ် မၞုံကဵုတာလျိုၚ်တံဂှ် ကၠောန်သ္ပလဝ် ပရေၚ်ချပ်ဂၞန်သဳကၠဳတံ အာတ်မိက်လဝ်တံ နွံရ” သာ်ဝွံ ပဒိုဝ်သဝ်ဂလာသေ ဟီုရ။

KNU ဂှ် ဟိုတ်နူပေါဲဗ္တိုက်ဂမၠိုၚ်တုဲ ညးဍုၚ်ကွာန်မ္ဒးဂြိပ်ဒဴပါဲဒလေတ်ဒၟံၚ်ဂမၠိုၚ် တၚ်နွံပၟိက်ညးတံဂှ်လေဝ် ဂ္စါန်ရပ်စပ်သောၚ်ကလးဒၟံၚ်ဖိုဟ်တုဲ ကုညးမဘိုၚ်ပူဗိုၚ်ထံက်ပၚ်ကဵု အရီုဗၚ်ပရေၚ်ဗ္စာရဏာမၞိဟ် မၞုံပၟိက်သွက်ညးပါဲဒဴဘဲပၞာန်တံဂှ် ဒုၚ်တၠုၚ်ဒၟံၚ်ရောၚ်ဂှ် ပါလုပ်ပ္ဍဲတၚ်လလောၚ်တြးဂှ်ရ။

ညးဒုၚ်တာလျိုၚ်ပရေၚ်ဆဝ်မ္ၚုဟ်စန်ဒက် ဂကောံအခေါၚ်အရာမၞိဟ်ကရေၚ် KHRG သဝ်နန္ဒသူဂှ်လေဝ် ပ္ဍဲတိဍာ်အုပ်ဓုပ်ကဝ်တူလေဝ်ဂှ် သွက်ညးပါဲဒဴဘဲပၞာန်တံဂှ် ဆက်နွံပၟိက်ဒၟံၚ် အရီုဗၚ်ပရေၚ်ဗ္စာရဏာမၞိဟ်တံတုဲ အကာဲအရာရီုဗၚ်ထံက်ပၚ် နူကဵုဗလးတိဏံဂှ်လေဝ် ဇြဟတ်အောန်ဒၟံၚ်ဏီရောၚ်ဂှ် ဟီုတဴရ။

“အရီုဗၚ်ပရေၚ်ဗ္စာရဏာမၞိဟ်တံဂှ်တှ်ေ ဇၟာပ်ပ်ခရိုၚ်ဂှ် ဗွဲတၟေၚ် သွက်ညးဍုၚ်ကွာန်မ္ဒးဂြိပ်ဒဴပါဲဒလေတ်ဒၟံၚ်ဂမၠိုၚ် နူကဵုဇၟာပ်ပ်လ္ပာ် သွက်ဂွံဘိုၚ်ဗပေၚ်ကဵုဇြဟတ် သွက်ဂွံရီုဗၚ်ထံက်ပၚ်ကဵုအိုတ်ဂှ် နွံပၟိက်ဒၟံၚ်ဖိုဟ်ရ။ အခက်အခုဲဂမၠိုၚ်ဂှ်တှ်ေ ဟိုတ်နူပေါဲဗ္တိုက် မဆက်က္တဵုဒှ်ဒၟံၚ်ဂမၠိုၚ်ဂှ်ကဵု ပရေၚ်ဟွံဂီုကၠီုတံဂှ်တုဲ အရီုဗၚ်ပရေၚ်ဗ္စာရဏာမၞိဟ်တံဂှ်တှ်ေ ညံၚ်ဂွံစိုပ်ဇရေၚ်ညးပါဲဒဴဘဲပၞာန်တံ မွဲဒမြိပ်အခိၚ် အစောံရီုဗၚ်ထံက်ပၚ်မာန်တံဂှ် ဇြဟတ်အောန်ဒၟံၚ်ဏီရောၚ် ဟီုစဂွံရ” သာ်ဝွံ သဝ်နန္ဒသူ ဟီုရ။

ပ္ဍဲတိဍာ် KNU ပေါဲဗ္တိုက်တံ မဆက်က္တဵုဒှ်ဒၟံၚ်ဂှ် သၞာံဏံ နူဂိတုဂျာန္နဝါရဳ စဵုကဵုဂိတုဨပရဴ အကြာဒပ်ကံၚ်ဇြဳပၞာန်၊ BGF ကေုာံ ဒပ်ပၞာန်ဗၠးၜးကောန်ဂကူကရေၚ် KNLA, ဒပ်စဵုဒၞါကောန်ဂကူကရေၚ် (KNDO) တံ ပေါဲဗ္တိုက်ဍောတ်ဇၞော် (၁၆၀၀) ပြၚ် က္တဵုဒှ်လဝ်ရ။

အပ္ဍဲပေါဲဗ္တိုက်ဏံဂှ် လ္ပာ်ကံၚ်ဇြဳပၞာန်၊ BGF တံဂှ် သ္ကိုပ်တမ်ဒပ် ၄ တၠ၊ ဒုသ္ကိုပ်တမ်ဒပ် ၅ တၠတံပါလုပ်တုဲ ကောန်ဒပ် (၁၇၀၀) ပြၚ် ချိုတ်အာလဝ်တုဲ လ္ပာ် KNU ဂှ် သၠးဏာလမျီု သွက်ဍုၚ်သွက်ဂကူဂှ် ၅၉ တၠ နွံတုဲ ဒဵုကဵု (၁၉၆) တၠ ကလိဂွံလဝ်ဝပ်ဇီုကပိုက်ဒးလဝ်ရောၚ် လလောၚ်ပ္တိတ်လဝ်ရ။

ပရိုၚ်−သြၚ်လောန်တိုၚ်(မ်)

ဗီုဓာတ်−KNU