သ္ၚိဒၟံၚ်ညးဍုၚ်ကွာန်ကျာ်ထဝ်(၂) တၠ ဒးဒုၚ်ကၟာတ်ဒၞာလဝ်

ကျာ်ထဝ်၊ မေ(၁၂)

တွဵုရးဍုၚ်မန်၊ ပွိုၚ်ဍုၚ်ကျာ်ထဝ်၊ ညးဍုၚ်ကွာန် ဒၟံၚ်ကွာန်သေတ်တောၚ်ကေုာံ အရာပ်အုပ် ပလိုတ်တအ်(၂)တၠ ဒပ်ကံၚ်ဇြဳပၞာန် ရပ်ကော်ဏာတုဲဂှ် ကၠုၚ်စိုပ်ကၟာတ်ဒၞာလဝ် သ္ၚိဒၟံၚ်ကေုာံပရေၚ်ပိုၚ်ပြဳညးတအ်ရဂှ် ညးဒေသဂမၠိုၚ်ဟီုကဵုဌာန်ပရိုၚ်သြၚ်လောန်တိုၚ်(မ်)ရ။

ဒပ်ကံၚ်ဇြဳပၞာန်ကဵုဂကောံပံၚ်တောဲတအ်ဂှ် ပ္ဍဲဂိတုမေ စၟတ်တ္ၚဲ ၁၀ အခိၚ်နူဂယးဂှ် ကၠုၚ်စိုပ်ကၟာတ်ဒၞာလဝ်သ္ၚိဒၟံၚ် ကေုာံဆေၚ်ဖျာ ကိုဝ်နေလေန်ထိုက် ဒၟံၚ်ကွာန်သေတ်တောၚ် ကဵုဆေၚ်သွံတြးကပေါတ်ကွဳလိုန်ဓာတ် ကိုဝ်ထေတ်ဥက္ကာလေန် ဒၟံၚ်အရာပ်အုမ်ပလိုတ်တအ်ရ။

ဒပ်ကံၚ်ဇြဳပၞာန်ဂှ် ကၠုၚ်စိုပ်ရပ်ကေတ်ဏာလဝ် ညးဒေသညးၜါတၠဏံ နကဵုတၚ်စောတ်စောဲ ဒှ်ညးထံက်ပၚ်ကဵုလဝ် သြန်ကုဂကောံ ဒပ်စဵုဒၞာညးဍုၚ်ကွာန် PDF တုဲ ကၟာတ်ဒၞာလဝ်သ္ၚိဒၟံၚ်ကေုာံပရေၚ်ပိုၚ်ပြဳတအ်ရ။

ညးဒေသဒးဒုၚ်ရပ်လဝ်ညးၜါတၠဂှ်မ္ဂး နူကဵုကံၚ်ဇြဳပၞာန် ပံက်လဝ်ဂဗုတ် နကဵုသၞောဝ်ဥပဒဗတိုက်သရိုဟ်ပွပ္ကီုပရာပ် ၝောံပိုဒ် ၅၀(ည)၊ ၅၀(ဇျှ) ၅၂(က) မဖျေံထံၚ်စဵုကဵုမွဲတတ္ကအ်မွဲအာယုက်မာန်ရဂှ် ဂွံတီကေတ်လဝ်ရ။

ပ္ဍဲပွိုၚ်ဍုၚ်ကျာ်ထဝ်ဂှ် ကြဴနူဒပ်ပၞာန်သီအဝဵုတုဲဂှ် ကၟာတ်ဒၞာကၠုၚ်လဝ် သ္ၚိဒၟံၚ်ကေုာံပရေၚ်ပိုၚ်ပြဳ ညးဒေသ ဟွံအောန်နူစှ်တၠ မပါလုပ်သီု ညးစၞးကၠတ်ထဝ် ဗော် NLD ကေုာံ ညးချဳဒရာၚ်ကတိုၚ်ကၟဟ်တအ်ရ။

အတိုၚ်တၚ်ဂၞၚ်ဂကောံမၚ်မွဲရံၚ်စံၚ်ကောန်ထံၚ်ပရေၚ်ဍုၚ်ကွာန် (AAPP) လလောၚ်တြးလဝ်မ္ဂး ကြဴနူဒပ်ပၞာန်သီအဝဵုတုဲပွိုၚ် ၂ သၞာံဂှ် သ္ၚိဒၟံၚ်စမြိုၚ်အဇာဇၞော်ကေုာံပရေၚ်ပိုၚ်ပြဳညးဍုၚ်ကွာန်တအ် ဗ္ဒာဲ ၈၀၀ ဒးဒုၚ်ကၟာတ်ဒၞာလဝ်ရဂှ် လလောၚ်တြးလဝ်ရ။

ပရိုၚ်-သြၚ်လောန်တိုၚ်(မ်)

ဗီုရုပ်-SBM