အစဳဇန်လုပ်ဍုၚ် သ္ကိုပ်ဝန်ဇၞော်တြေံ တက်ဇြေန်ဂှ် သ္ကဵုပေါဲရုဲမာဲ ချဳဒရာၚ်အာမာန်ဏောၚ်

ၜၚ်ကံက်၊ မေ (၁၂)

သ္ကိုပ်ဝန်ဇၞော်တြေံ တက်ဇြေန်ယှေန်နာဝတ် မဒှ်ညးတၠဓနဗဳလျာန်နာ ပ္ဍဲမွဲအခိၚ်ဓဝ် မဂွံဒုၚ်အထိုၚ်အသး၊ ဟီုဗျိဖျေံကဝု နူကဵုမၞိဟ်ဂၠိုၚ်ကဵုပြကောဋိကိုဋ်ဂှ်ဝွံ နူစသၞာံ ၂၀၀၆ ပရေၚ်ပၞာန်သီအဝဵုက္တဵုဒှ်တုဲဂှ် ဒဵုကဵုလအ်အာၜါစှော်သၞာံပြၚ် ခါတ်ဒၟံၚ်အကာဲ ပရေၚ်ဍုၚ်ကွာန်ဍုၚ်သေံ မဒးရုန်ဂ္စါန်ဒၟံၚ်ဖိုဟ်ဂှ်ရ။

ဟိုတ်နူအစဳဇန်လုပ်ဍုၚ် သ္ကိုပ်ဝန်ဇၞော်တြေံ တက်ဇြေန် မလလောၚ်ပ္တိတ်လဝ် အပ္ဍဲဂိတုဂျူလာၚ်ဂှ်တုဲ သ္ကဵုဇီုကပိုက်တဴ လ္တူညးဍုၚ်ကွာန်မအာကဵုမာဲ ပ္ဍဲတ္ၚဲအဒိုတ်ဏံ နွံမာန်ရောၚ်ဂှ် ညးလ္ၚတ်ဂမၠိုၚ် ဟီုဂးဒၟံၚ်အိုတ်ရ။

ကောန်ဝုတ်တက်ဇြေန် အာယုက်မၞုံ (၃၆) သၞာံ ဖေဝ်တောမ်တာန်ယှေန်နာဝါထရာဝွံ ဒှ်လၟောဝ်သ္ကိုပ်ဝန်ဇၞော်ကဆံၚ်လ္တူ ဗော်ဒစဵုဒစး Phue Thai မွဲတၠရ။

ၜိုန်ဂှ်ကီုလေဝ် သွက်ဂွံဖအိုတ်ကၠေံ အရာဒပ်ပၞာန်အုပ်ဓလီုရပ်ဇုက် ပ္ဍဲဍုၚ်ဂှ်တုဲ ကတိကဝတ် သွက်ဂွံဒက်ပ္တန်အလဵုအသဳပံၚ်ကောံ ကုဗော်ဒစဵုဒစးတၞဟ်သ္အာၚ်တံဂှ် တးပါဲကၠေံတုဲ ယဝ်ရသ္ပဇြိုဟ်နက် ကုအစဳဇန်လုပ်ဍုၚ် မအံက်ညးဂှ်မ္ဂး ကြဴနူပေါဲရုဲမာဲတုဲ ဗော်ဖျူထာဲဝွံ အတိုၚ်မၞိဟ်ဂမၠိုၚ် မဒုၚ်ဂိုၚ်ကေတ်လဝ်ဂှ် ပရေၚ်ယှုက်ထုဲတံ က္တဵုဒှ်ကၠုၚ်မာန်ရောၚ်။

“ညံၚ်တက်ဇြေန် ဂွံစဴသ္ၚိမာန် ဗော်ဖျူထာဲဝွံ ဒဒှ်ရဂၠါဲဒၟံၚ် တၚ်တုပ်စိုတ် မသ္ဂောံပံၚ်ကောံ ကုဗော်ဒစဵုဒစးဍေံဂှ် ထ္ၜးကၠုၚ်ဒမြိပ်အရေဝ်တံမာန်ဏောၚ်” သာ်ဝွံ သ္ကိုပ်ဌာန သိပ္ပံပရေၚ်ဍုၚ်ကွာန် နူကဵုတက္ကသိုလ် အူဗွန်ရာတ်ချာတ်ဌာနဳ ဟီုဂးလဝ်ရ။

ပ္ဍဲသၞာံ ၂၀၁၄ ဒပ်ပၞာန်သေံ သီအဝဵုအလန်က္ကရဴအိုတ်ဂှ် ရုၚ်သၞောဝ်ဓဝ်ဂမၠိုၚ်ဝွံ ဂကောံအလဵုအသဳမၞုံပၟိက်ကဵုတက်ဇြေန်၊ မၞိဟ်ပူဂဵု မၞုံပၟိက်ကဵုတက်ဇြေန်တံဂှ် တးပါဲကၠေံတုဲ သွက်ဂွံသီပလီု ဗော်မဒုၚ်သစ္စာလ္တူညးဂှ် လုပ်ရေၚ်တၠုၚ်ကဵုလဝ်အကြာရ။

အခိၚ်လၟုဟ်ဂှ် တက်ဇြေန်ဂှ် အကာဲအရာလုပ်စိုပ်ကၠုၚ် ဒၞါဲဒတန်ပရေၚ်ဍုၚ်ကွာန် မဒှ်ဒၟံၚ်ဆီပါ်ဍာ်ဇွောဝ်ကြာန်န် သၞာံဗွဲမဂၠိုၚ်ဂၠေၚ် အကြာညးထံက်ဂလာန်ကဵု ညးပြိုၚ်ပ္ကာန်ဒစဵုဒစးတံ နွံဒၟံၚ်ရောၚ်ဂှ်လေဝ် ဂွံတီကေတ်ရ။

Ref: Straits Times