ပ္ဍဲခရိုၚ်ညံၚ်လေဝ်ပေန် ဘာကျာ် ကေုာံ သ္ၚိဌာန် (၆၀) မပြၚ် ဒးဒုၚ်စံၚ်ပလီုလဝ်

ညံၚ်လေဝ်ပေန်၊ မေ (၁၂)

ပ္ဍဲပွိုၚ်ဍုၚ်မုၚ် ကေုာံ ပွိုၚ်ဍုၚ်ကျံက်ကျဳ တိဍာ်ဒပ်မဟာ (၃) ခရိုၚ်ညံၚ်လေဝ်ပေန် ဗော်သွးကောန်ဂကူကရေၚ် KNU ဂှ် ဟိုတ်နူပရေၚ်ဗ္တိုက်ပန်ပှော်လွဟ်ဇၞော် ကေုာံ ပရေၚ်စံၚ်ပလီုပလာ် နူကဵုဒပ်ကံၚ်ဇြဳပၞာန်တံဂှ်တုဲ ဘာဗ္တောန်လိက်ကီု၊ ဘာကျာ်ခရေတ်ယာန်တံကီု စမြိုၚ်သ္ၚိဌာန် အပံၚ်ဖအိုတ် (၆၀) ပြၚ် ဒးဒုၚ်ပလီုပလာ်လဝ်ရောၚ် KNU ဗဟဵု လလောၚ်ပ္တိတ်လဝ်ရ။

တုဲကၠုၚ် ပ္ဍဲဂိတုမေ (၉) တေံ ပ္ဍဲခရိုၚ်ညံၚ်လေဝ်ပေန် KNU ဒပ်မဟာ (၃) ၊ ပွိုၚ်ဍုၚ်ကျံက်ကျဳ နူကဵုကွာန် (ပိုးလိုနိုင်ဖိုး) ဂှ် သ္ၚိဒၟံၚ် (၂) မ ကေုာံ နူကဵုကွာန်လာဝိုၚ်ကျဳဂှ် သ္ၚိဒၟံၚ် ၄၂ မ၊ ဘာဗ္တောန်လိက် (၁) မ၊ ဘာကျာ်ခရေတ်ယာန် ၁ မ၊ ဘာဖောအ်ဗြေဝ်ကောန်ၚာ် ၁ မ၊ စမြိုၚ်ဒၞါဲစွံကပေါတ်ဂမၠိုၚ်သီုဖအိုတ်ဂှ် ဒပ်ကံၚ်ဇြဳပၞာန် စံၚ်ပလီုပလာ်ဏာလဝ် အလုံကွာန်မွဲရောၚ် ထ္မံက်ထ္ၜးလဝ် ပ္ဍဲတၚ်လလောၚ်တြးဂှ်ရ။

သ္အာၚ်နူဂှ်ပၠန် ပ္ဍဲဂိတုမေ (၄) တေံဂှ်လေဝ် ဒပ်ကံၚ်ဇြဳပၞာန် ဟိုတ်နူပန်ပှော်လဝ် လွဟ်ဇၞော် အပ္ဍဲကွာန်ယာန်မျဵုအံၚ်၊ ပွိုၚ်ဍုၚ်မုၚ် KNU ဂှ်ရ သ္ၚိဒၟံၚ်ညးဍုၚ်ကွာန်ဒေသ အပံၚ်ဖအိုတ် (၁၈) မ တူပၟတ်ဒှ်အာဆောံအိုတ်တုဲ ညးဍုၚ်ကွာန်တံ စဴကၠုၚ် သွက်ဂွံသိုဟ်ပၠိုတ် သ္ၚိပၟတ်တူဒၟံၚ်ဂှ်ကီုလေဝ် ဒၟါနူဒပ်ကံၚ်ဇြဳပၞာန် နွံဒၟံၚ်ဂှ်ရ ဟွံဂံၚ်စဴပုဟ်ဂှ် ထ္မံက်ထ္ၜးလဝ် ပ္ဍဲတၚ်လလောၚ်တြးဂှ်ရ။

အခိၚ်လၟုဟ် ညးဍုၚ်ကွာန်ဒေသ နူကဵုကွာန် (ပိုးလိုနိုဖိုး) ကဵု ကွာန်လာဝိုၚ်ကျဳ ပွိုၚ်ဍုၚ်ကျံက်ကျဳ KNU ဂှ် (၁၂၀၆) တၠ၊ ညးဍုၚ်ကွာန် နူကဵုကွာန်ယာန်မျဵုအံၚ် ပွိုၚ်ဍုၚ်မုၚ်ဂှ် (၁၀၂၀) တၠ နွံတုဲ ညးဍုၚ်ကွာန်ဒေသ နူကဵုကွာန်ပိကွာန်ဏံဂမၠိုၚ်ဝွံ ဟိုတ်နူဒပ်ကံၚ်ဇြဳပၞာန် ပန်ပှော်လွဟ်ဇၞော် လုပ်စိုပ်ထ္ပက်ပၞာန်အပ္ဍဲကွာန်တုဲ ရပ်ဒက်ဒၟံၚ်မၞိဟ်တံဂှ်ရ နူကဵုဂိတုဂျောန်သၞာံတုဲတေံ စဵုကဵုအခိၚ်လၟုဟ်ဂှ် အလုံကွာန်မွဲ ဒးဂြိပ်ဒဴပါဲဒလေတ်လဝ်တုဲ ဟွံဂံၚ်မံၚ် အပ္ဍဲကွာန်ဏီပုဟ်ဂှ် သ္ဂးရ။

အတိုၚ်တၚ်လလောၚ်တြး ဇာဇၞိက်အထံက်အပၚ်ပရေၚ်ၜိုဟ်လလမ်ကရေၚ် KPSN အပ္ဍဲဂိတုဖေဖဝ်ဝါရဳတုဲကၠုၚ်တေံဂှ်မ္ဂး ပ္ဍဲကဵုတိဍာ် ဒပ်မဟာ (၃) ခရိုၚ်ညံၚ်လေဝ်ပေန်ဂှ် လၟိဟ်ညးဍုၚ်ကွာန်ပါဲဒဴဘဲပၞာန် ၁၄၂၀၀၀ ပြၚ် နွံဒၟံၚ်ရောၚ် လလောၚ်ပ္တိတ်လဝ်ရ။

ပရိုၚ်−သြၚ်လောန်တိုၚ်(မ်)

ဗီုဓာတ်−KNU