ဟိုတ်နူကျာလဗိုတ် မိုဝ်ခါတုဲ ညးဍုၚ်ကွာန်ရခေၚ်ဂမၠိုၚ် ပရေၚ်ဒှ်ဓဝိၚ်သၠုၚ်တိုန်ဒၟံၚ်

လ္ဂုၚ်၊ မေ (၁၂)

ကၠုၚ်စိုပ်ဂိတုမေ (၁၄) ဏံ ဟိုတ်နူကျာလဗိုတ်ဇြိုၚ်ကလုၚ် မိုဝ်ခါ ဇြဟတ်သ္ကာတ် မလုပ်စိုပ်ကၠုၚ် ပ္ဍဲရေၚ်ၜဳရခေၚ်ဂှ်ရ ညးဍုၚ်ကွာန်ရခေၚ်ဂမၠိုၚ်ဝွံ ပရေၚ်ဒှ်ဓဝိၚ် သွက်အန္တရာယ်ကျာလဗိုတ်ဏံ သၠုၚ်တိုန်ဒၟံၚ်ရောၚ်ဂှ် ညးဒေသတံ ဟီုကဵု ဌာန်ပရိုၚ်သြၚ်လောန်တိုၚ်(မ်) ရ။

ကျာလဗိုတ်မိုဝ်ခါဝွံ ပ္ဍဲဂိတုမေ (၁၄) ဏံ နူကဵုဍုၚ်ကအ်ဗဇြာ ဗွဲဒိုဟ်အဂၞဲ ဍုၚ်ဗေန်ဂလာန်ဒေတ်ဂှ်ကဵု နူကဵုဍုၚ်ကျံက်ဖျူ ပြၚ်ၜဳသ္ကုတ်သၟဝ်ကျာ ရေၚ်ၜဳရခေၚ် ဍုၚ်ဗၟာတံဂှ်မွဲကဆံၚ် တတ်ကၠောံလုပ်စိုပ်ကၠုၚ်မာန်ရောၚ် တၠပညာဗြဲကျာတံ ချိၚ်ခယျလဝ်ရ။

ကျာလဗိုတ်ဇြိုၚ်ကလုၚ် မိုဝ်ခါဂှ်ဝွံ ဗွိုၚ်ကျာလဗိုတ်ဂှ် သၠဲလးကၠုၚ်ဗက် နူကဵုတ္ကအ်ယာန်ဗျေဝ် တွဵုရးရခေၚ်ဂှ်မွဲကဆံၚ် ဒဵုကဵုဍုၚ်ဗေန်ဂလာဒေတ် ဍုၚ်သေတ်တကံၚ်ဂှ် အန္တရာယ်ကျာလဗိုတ်နွံဒၟံၚ်တုဲ တွဵုရးရခေၚ်သ္ကုတ်သၟဝ်ကျာအလုံမွဲ ပရေၚ်လီုလာ်ဆောံလေၚ် ဇၞော်မာန်ရောၚ်ဂှ် တၠပညာဗြဲကျာ ဒဝ်သုသုဇြာန်ဂှ်လေဝ် ကဵုလဝ်သတိရ။

စပ်ကဵုအကာဲအရာဗြဲကျာတုဲ ဒေသသ္ကုတ်သၟဝ်ကျာတွဵုရးရခေၚ် သွက်ဂွံဒစးဒုၚ်ဝေၚ်ပါဲ နူကဵုဘဲအန္တရာယ်သဘာဝမာန် ပပ္တံနူဂိတုမေ သတ္တာဟဒုတိယပြဟ်ဟ်တေံတုဲ နူကဵုမုက်လိက်မဆေၚ်စပ်ကဵုဗြဲကျာတံဂှ်မွဲကဆံၚ် လလောၚ်ပ္တိတ်လဝ် တၚ်ဒစးဒုၚ်ကဵုသတိတံရ။

ပရေၚ်ဒစးဒုၚ်ပလေဝ်ပလေတ်၊ ပရေၚ်ဟံၚ်ပြာ် ချိုတ်တ်ပၠိုတ်တ် မဆေၚ်စပ်ကဵုကျာလဗိုတ်တံဂှ် ဒဵုကဵုအခိၚ်လၟုဟ် အလဵုအသဳတွဵုရးကံၚ်ဇြဳပၞာန် ဟိုတ်နူဟွံဂွံဟီုဏီဂှ်ရ နကဵုညးဒေသ နူကဵုတွဵုရးရခေၚ် သ္ကုတ်သၟဝ်ကျာ ဌာန်ကျာလဗိုတ်မိုဝ်ခါ မတတ်ကၠောံအဓိကမာန်တံ ပရေၚ်ဒှ်ဓဝိၚ် သၠုၚ်တိုန်ဒၟံၚ်ရောၚ်ဂှ်လေဝ် ညးဒေသတံ သ္ဂးရ။

နကဵုအလဵုအသဳတွဵုရးရခေၚ် ကံၚ်ဇြဳပၞာန်ဂှ် ကဵုလဝ်သမ္တီ စပ်ကဵုကမၠောန်ပရေၚ်ဟံၚ်ပြာ်ရီုဗၚ်တံ ဗွဲမကၠးမှးဂှ်ဟွံမွဲတုဲ ကြဴနူကောံဓရီု ပ္ညဳပ္ညပ်ကမၠောန် ဂကောံကောပ်ကာဲဖန်ဇန်စပ်ကဵုဘဲအန္တရာယ်သဘာဝ ရးဒေသဇၞော်၊ တွဵုရးတံဂှ်ကဵု ဌာနဗဟဵုကောပ်ကာဲဖန်ဇန် စပ်ကဵုဘဲအန္တရာယ်သဘာဝ သွက်ပရေၚ်ဒစးဒုၚ်ပလေဝ်ပလေတ် သွက်သ္ဂောံကလေၚ်ပၠန်ဘဲကျာလဗိုတ် ကာတၟေၚ် မကၠောန်သ္ပလဝ်ပ္ဍဲနေဗျဳဒဝ် ပ္ဍဲဂိတုမေ (၁၁) အခိၚ်တ္ၚဲစေၚ် (၁) နာဍဳတေံတုဲအာကီုလေဝ် သွက်ပရေၚ်ကောပ်ကာဲဖန်ဇန် စပ်ကဵုဘဲအန္တရာယ်ကျာလဗိုတ် သွက်တွဵုရးရခေၚ်တံ ဗီုလဵုကၠောန်လဝ်ရောဟီုဂှ်လေဝ် လ္ပာ်ကံၚ်ဇြဳပၞာန် လလောၚ်ပ္တိတ်လဝ် ဗွဲလစှ်ေဟွံမွဲဏီရ။

ဟိုတ်နူကျာလဗိုတ်ဇြိုၚ်ကလုန်မိုဝ်ခါတုဲ လၟိဟ်မၞိဟ် နူတွဵုရးရခေၚ် (၉) ကိုဋ်ပြၚ်ကဵု ညးဍုၚ်ကွာန် အလုံမွဲကၟိန်ဍုၚ် (၁) ပြကောဋိကိုဋ်ပြၚ်ဝွံ ဟိုတ်နူဘဲဒဏ်ကျာလဗိုတ်ဇြဟတ်သ္ကာတ်ဂှ်တုဲ ဇီုကပိုက်မာန်ရောၚ် ပ္ဍဲဂိတုမေ (၁၁) တေံ နူကဵုသၞောတ်ပံၚ်တောဲရေၚ်တၠုၚ် ကေုာံ ပရေၚ်လလောၚ်ပ္တိတ်တၚ်ကဵုသတိ ဘဲအန္တရာယ်သဘာဝဂၠးကဝ် (GDACS) တံ လလောၚ်ပ္တိတ်လဝ် ပ္ဍဲဂိတုမေ (၁၁) တေံရ။

ပရိုၚ်−သြၚ်လောန်တိုၚ်(မ်)

ဗီုဓာတ်−ABN News