လဂုၚ်-မေ(၁၃)
သွာၚ်တရဴကျာ ဒရိပ်ဒၟံၚ်အပ္ဍဲဍုၚ်တအ်ဂှ် သ္ပတမ်နူ ဂိတုမေ စၟတ်တ္ၚဲ(၉) စဵုကဵုအခိၚ်လဗိုတ်ကျာညိၚ်ဝတ် ဟိုတ်နူစၟတ်သမ္တီလဝ် နဒဒှ်ကာလလဗိုတ်ကျာဂှ်ရ သွက်ဂွံသီရုပ်လာၚ်တရဴကျာ မွဲချိုန်ခနဂှ် ဌာနက္ဍိုက်က္ဍိုပ်သ္ကိုပ်စၞောန်ပ္ညုၚ် ပရေၚ်အာတရဴကံၚ်ဇြဳပၞာန် လလောၚ်တြးလဝ်ရ။
အခိၚ်လၟုဟ်ဏံမ္ဂး ဟိုတ်နူအန္တရာယ်လဗိုတ်ကျာတုဲ ဒၟာနူဒးဒေါံဇူကၠုၚ်လာၚ်တရဴကျာ မွဲချိုန်ခနဂှ်ရ ကၟုဲ ညးအာတရဴ ပ္ဍဲပြၚ်က္ၜဳ ၚပလဳ ကလေၚ်စဴဟွံဂွံတအ်ဂှ် စဵုကဵုအခိၚ်လဗိုတ်ကျာတုဲ ကဵုလဝ်အခေါၚ် ဆက်ဇူဒီုရဂှ် ဂွံတီကေတ်ရ။
ၜိုန်ရသီရုပ်လဝ် လာၚ်တရဴကျာ ဗွဲမွဲချိုန်ခနကီုလေဝ် သွက်ဂွံထိၚ်ဒဝ်မၚ်မွဲလဝ် ညးအာတရဴတအ် ပ္ဍဲဟဝ်တေဝ် ဟီုဗ္ကန်လဝ်ရဂှ် သ္ကိုပ်စၞောန်ပ္ညုၚ် ဌာနက္ဍိုက်က္ဍိုပ်စၞောန်ပ္ညုၚ်ဟဝ်တေဝ် ကေုာံ ပရေၚ်အာတရဴ တွဵုရးရခေၚ် ဥူတေန်ထောဋ်အောၚ် ဟီုသှ်လဝ်ကဵု မဳဒဳယာတြးဝါဒကံၚ်ဇြဳပၞာန်ရ။
ဟိုတ်နူအန္တရာယ်လဗိုတ်ကျာတုဲ ညံၚ်ပရေၚ်ဇီုကပိုက်ဇီုလာ် ဂွံအောန်အိုတ်ဂှ် စၞောန်ထ္ၜးလဝ်ဂၠံၚ် ကုသ္ဇိုၚ်ဝန်ဂမၠိုၚ်ကီု ဟဝ်တေဝ် ကေုာံဗ္ဒမ်ဇူတအ်လေဝ် ဖ္အောဝ်စကာကဵု ဒစးဒုၚ် ကဵုလဝ်သမ္တီ စပ်ကဵုလဗိုတ်ကျာရဂှ် ဟီုသ္ဂးလဝ်ရ။
လဗိုတ်ကျာမေလံၚ်မိုဝ်ခါဂှ် သ္ပတမ်နူ ဂိတုမေ စၟတ်တ္ၚဲ (၁၂) တ္ၚဲဏံတုဲ ပ္ဍဲပွိုၚ် (၄၈)နာဍဳ လုပ်စိုပ် တတ်ကၠောံ ဗ္ဒာဲဍုၚ်သေတ်တွေရောၚ်ဂှ် ချိၚ်ခယျကေတ်လဝ်တုဲ အကာဲအရာလၟုဟ်ဏံမ္ဂး ဗ္ၜတ်ကျာလပိုက် မွဲနာဍဳ စဵုကဵု (၁၁၀)မိုၚ် လုပ်စိုပ်ကၠုၚ်မာန်ရောၚ် ချိၚ်ခယျကေတ်လဝ်တုဲ သမၠုၚ်လပှ်လေဝ် နူ(၁၃)ပေ စဵုကဵု(၁၆)ပေ စိုပ်မာန်ရောၚ်ဂှ် လလောၚ်တြးလဝ်ရ။
ဟိုတ်နူလဗိုတ်ကျာမေလံၚ်မိုဝ်ခါတုဲ ယာဉ်ရပ်က/ဂၠုၚ်/က္ၜၚ်ဂမၠိုၚ် အန္တရာယ်နွံဒၟံၚ်ဗွဲတၟေၚ်ဂှ်ရ သ္ပတမ်နူဂိတုမေ စၟတ်တ္ၚဲ(၁၂) အခိၚ်တ္ၚဲစေၚ် (၁၂)နာဍဳတုဲ ညံၚ်ဟွံဂွံတိတ်အာ မ္ၚးပြၚ်က္ၜဳ ပ္ဍဲမွဲဒမြိပ်သြၚ်ကၟိန်ဍုၚ်ဗၟာဂှ်လေဝ် ကဵုလဝ်သတိရ။
ယဝ်ရဟွံဒ္ဂေတ်ဗက် အတိုၚ်တၚ်ကဵုသတိစၞောန်ပ္ညုၚ်လဝ်ဂှ်မ္ဂး ညးမဆေၚ်စပ်ဂမၠိုၚ် ကေတ်အရေဝ်ရေၚ်တၠုၚ်အာ အတိုၚ်မနွံပၟိက်ရောၚ်ဂှ်လေဝ် ကံၚ်ဇြဳပၞာန် လလောၚ်တြးလဝ်ရ။
ပရိုၚ်-သြၚ်လောန်တိုၚ်(မ်)
ဗီုရုပ် -MOI
sanlontai