ဂဂဝ် – မေ (၁၃)
ရးဒေသမဂွေ၊ ပွိုၚ်ဍုၚ်ဂဂဝ် ဒုအရန်ဗိုလ် နူဗဒိုပ်ဗၠာဲသၟိၚ်တိဍာ်တောၚ်ခေန်ယာမ်မွဲတၠဂှ် ပ.က.ဖ တိဍာ်ပံၚ်တောဲတအ် ပန်ပသောၚ်လဝ်ရဂှ် ဟီုကဵု ဌာန်ပရိုၚ်သြၚ်လောန်တိုၚ်(မ်)ရ။
ဂိတုမေ စၟတ်တ္ၚဲ(၁၂) အခိၚ်နူဂယး ၜိုတ်(၈)နာဍဳဂှ် ဒုအရန်ဗိုလ်ဗၠာဲသၟိၚ် နွံယၟုတုၚ်ဇြဝ် သုၚ်ဍာ်လက်ဖက်တုဲ ဃောကလေၚ်စဴကၠုၚ်ဂှ် ပန်ပသောၚ်လဝ်ရ။
“တ္ၚဲတုဲကၠုၚ်တေံ အခိၚ်ကၠုၚ်သုၚ်ဍာ်လက်ဖက် ပန်ပသောၚ်လဝ်ကဵုလွဟ် ထပှ်လစုတ်ရ။ မၞိဟ်ဏံဂှ် ဟိုတ်နူပါ်ပန်၊ အာတ်မိက်သြန် ကြဴကြာန်ဒၟံၚ်ပ္ဍဲကွာန်ကီု၊ ပဋိပက္ခ နွံဒၟံၚ်ညးသ္ကအ်ကီု ဟိုတ်နူသတ်ပညောန်တအ် ကဵုနၚ်ပရိုၚ်တုဲ ပန်လဝ်ရ”ဂှ် ညးတာလျိုၚ် ပ.က.ဖ ပွိုၚ်ဍုၚ်ဂဂဝ်မွဲတၠ ဟီုသ္ဂးလဝ်ရ။
ဆေၚ်ဍာ်လက်ဖက် ဒုအရန်ဗိုလ်ဗၠာဲသၟိၚ်ကံၚ်ဇြဳပၞာန် ဒးဒုၚ်ပန်ဂစိုတ်လဝ်ဂှ် သ္ၚောဲခြာနူကဵု ဗဒိုပ်ဗၠာဲသၟိၚ်တောၚ်ခေန်ယာမ် ၜိုတ်(၂၀၀)မဳတာဟေၚ်တုဲ ကွဳလိုန်ဓာတ် ပါကၠုၚ်ကရောံညးမွဲဖ္ဍိုက်ဂှ်လေဝ် သီဂွံလဝ်ရဂှ် ဂွံတီကေတ်ရ။
ကြဴနူပရေၚ်ပန်ပှ်ော က္တဵုဒှ်တုဲဂှ် ဗဒိုပ်ဗၠာဲသၟိၚ်တိဍာ် တောၚ်ခေန်ယာမ် ရပ်ကေတ်ဏာလဝ် ညးဒေသၜါတၠတုဲ စဵုကဵုအခိၚ်လၟုဟ်ဏံ ဟွံဂွံကလေၚ်ဗလးကဵုလဝ်ဏီရဂှ် ဂွံတီကေတ်ရ။
ဒုအရန်ဗိုလ်တုၚ်ဇြဝ် ဂကောံပ.က.ဖတိဍာ်ပံၚ်တောဲပန်ဂစိုတ်လဝ်ဂှ် အခိၚ်သဝ်တ္ၚဲ ၜိုတ်(၃)နာဍဳဂှ် ဗဒိုပ်ဗၠာဲသၟိၚ်တောၚ်ခေန်ယာမ် စံၚ်လဝ်ဇွရဂှ် ဂွံတီကေတ်ရ။
ပရိုၚ်-သြၚ်လောန်တိုၚ်(မ်)
ဗီုရုပ် – CJ
sanlontai