ကျအာပေါဲရုဲမာဲမ္ဂး နုက်တိတ်နူပရေၚ်ဍုၚ်ကွာန်ဏောၚ် သ္ကိုပ်ဝန်ဇၞော်သေံ ပရာယုတ် ဟီုဂး

ၜၚ်ကံက်၊ မေ (၁၂)

သ္ကိုပ်ဝန်ဇၞော် ပရာယုတ်ချာန်အဵုချာဝွံ ပ္ဍဲပေါဲရုဲမာဲတ္ၚဲအဒိုတ်ဏံ သွက်ဂွံဒက်အလဵုအသဳ ယဝ်ရဟွံဂွံဇၞးကေတ် ဒၞါဲအမာတ်ကၠတ်ထဝ်သၟဝ် ရုမ်မ်ဂပ်ပ်မ္ဂး ဒဒှ်ရနုက်တိတ်နူ ဗော် United Thai Nation (UTN) ရောၚ်ဂှ် ဟီုဂးလဝ်ရ။

အပ္ဍဲပရေၚ်စန်ဒက်မာဲ ပ္ဍဲနာဃောန်သဳ တာမ္မာရာတ်ဂှ် ပရာယုတ် ဟီုဂးစုတ်လဝ် ပ္ဍဲကဵုဂလာန်ညးမဟီုဂးလဝ်ဂှ်ရ။

“ပိုယ်တံ ယဝ်ရဂွံဇၞးကေတ် ဒေသဆန္ဒမာဲညိညရမ္ဂး စဴသ္ၚိတုဲ ဇူရဏောၚ်” သာ်ဝွံ ညးသ္ဂးလဝ်တုဲ ကၠာတေံဂှ် ဂွံပံၚ်တောဲကၠောန်လဝ် ကုဗော်ဗွဲမဂၠိုၚ်ဂၠေၚ် ကေုာံ ဂကောံဗွဲမဂၠိုၚ်ရ။ လ္ၚဵုတံဂှ် ဆက်ဆောံလောဲသွာကီုလေဝ် လ္ၚဵုတံဂှ် ဟွံပြေပြံၚ်ပုဟ်” သာ်ဝွံ ပရာယုတ် ဟီုရ။

“အဲတတ်ထ္ပာ်ကၠုၚ် နဒဒှ်ကောန်ပၞာန် သၞာံဗွဲမလအ်လတုဲ တတ်ထ္ပာ်ကၠုၚ်လဝ် အကြေပ်အဂြတ်ဗွဲမဂၠိုၚ်ရ။ တ္ၚဲဏံ အဲဂှ် ဒှ်သၟာပရေၚ်ဍုၚ်ကွာန်မွဲရ။ ဟွံတုပ်ပုဟ်။ အခိၚ်ဟီုအရေဝ်တက်ကျာ ကုကောန်ပၞာန်တှ်ေ ဒးကြံၚ်မ္ၚိုဟ်ဏောၚ်၊ ၜိုန်ဂှ်ကီုလေဝ် အခိၚ်အဲတက်ကျာကဵု ညးဍုၚ်ကွာန်တံမ္ဂး တၞဟ်ခြာဒၟံၚ်ရ၊ ဣဏံဂှ် အဲသာတုဲဒးဂၞပ်ရောၚ်” သာ်ဝွံ ပရာယုတ် ဟီုလဝ်ရ။

ဗော် UTN ဝွံ ပ္ဍဲဂိတုမေ (၁၂) ဂှ် ကၠောန်သ္ပလဝ် ပရေၚ်စန်ဒက်မာဲလက္ကရဴအိုတ် ပ္ဍဲကဵု Queen Sirikit National Convention Center မၞုံဍုၚ်ၜၚ်ကံက်ရ။

ပရာယုတ်ဝွံ ပ္ဍဲဂိတုမေ (၁၃) တ္ၚဲစန်ဒက်မာဲလက္ကရဴအိုတ် ဗော်ပရေၚ်ဍုၚ်ကွာန်ဂမၠိုၚ်ဂှ် ပ္ဍဲကဵုခရိုၚ်မဒှ်အဓိကတံဂှ် ဍိုက်ဗက်လက္ကကရဴကွဳစက် (pickup truck) တုဲ က္ဍိုပ်သ္ကိုပ်ဗော်အဓိကဂမၠိုၚ် သ္ကိုပ်သ္ကတုဲ ဗက်စန်ဒက်အလုံဍုၚ်မွဲရောၚ် မဒှ်ရ။

လ္ဂောံကဵုဥပဒေမ္ဂး ဗော်ပရေၚ်ဍုၚ်ကွာန်ဂမၠိုၚ်ဝွံ ကၠာတ္ၚဲသ္ၚိသဝ် ဇိုၚ်သဝ်တ္ၚဲ ၆ နာဍဳဂွိုအ်တက်ဂှ် ဒးဒေါအ်အာ ပရေၚ်စန်ဒက်မာဲတံရောၚ် မဒှ်ရ။

Ref: Bangkok Post