အနာဂတ် PPST မွဲဂကောံတုဲမွဲဂကောံ မစ္ဍးတိတ်ဒၟံၚ်ဂှ် မၞုံသာ်လဵုရော

လ္ဂုၚ်၊ မေ (၁၃)

ဂကောံက္ဍိုက်ပ် လၟေၚ်ကမၠောန်ပရေၚ်ၜိုဟ်လလမ် (PPST) မပံၚ်ကောံလဝ် နကဵုဂကောံရပ်လွဟ်ကောန်ဍုၚ်အရၚ် မထ္ပက်လတ်စၟတ်တဲတံဂှ်ဝွံ အပ္ဍဲကာလဒပ်ပၞာန်သီအဝဵု ပွိုၚ် (၂) သၞာံပြၚ်ဏံ ဇြဟတ်ဍိုန်လျစှ်ေကၠုၚ်တုဲ နကဵုပရေၚ်ဍုၚ်ကွာန်မ္ဂး အကာဲအရာသ္ဂောံဒေါံသရိုဟ်အာနွံဒၟံၚ်ဂှ် ညးခါတ်အကာဲပရေၚ်ဍုၚ်ကွာန်တံ သ္ၚဳဂၠိပ်လဝ်ရ။

ဂကောံက္ဍိုက်ပ် လၟေၚ်ကမၠောန်ပရေၚ်ၜိုဟ်လလမ် (PPST) မဒက်ပ္တန်လဝ် နကဵုဂကောံရပ်လွဟ်ကောန်ဍုၚ်အရၚ် မပါလုပ်ထ္ပက်လဝ်စၟတ်တဲ ပ္ဍဲလိက်ကသုက် NCA (၁၀) ဂကောံဂှ် အခါလၟုဟ် မွဲဂကောံတုဲမွဲဂကောံ နုက်တိတ်ဒၟံၚ် နူကဵုဂကောံဂှ်အိုတ်ရ။

ပ္ဍဲကဵုဏံ ဗော်ဍုၚ်မန်တၟိ မကေတ်လဝ်တာလျိုၚ် နဒဒှ်က္ဍိုပ်သ္ကိုပ် PPST လၟုဟ်ဂှ်လေဝ် သွက်ဂွံနုက်တိတ်နူ PPST ဂှ် ပ္ဍဲဂိတုဨပရဴ သတ္တာဟလက္ကရဴအိုတ်တေံ ပ္တိုန်လဝ်လိက်နုက်တိတ်ရ။

လိက်နုက်တိတ် ဗော်ဍုၚ်မန်တၟိဂှ် ပ္ဍဲကောံဓရီုက္ဍိုပ်သ္ကိုပ်ကဆံၚ်လ္တူ ဂကောံ NCA-S-EAOs မကၠောန်ဗဒှ် ပ္ဍဲဍုၚ်ချေၚ်မာဲ၊ ဍုၚ်သေံ ပ္ဍဲဂိတုမေ သတ္တာဟတတိယတေံမှဟေၚ် သဳကၠဳသ္ဂုတ်သွာတ်အာရောၚ် ညးမၞုံအခေါၚ်ဟီုဂး PPST သ္ကိုပ်ဗိုလ်ဇၞော် သဝ်ကျဝ်ညောအ် ဟီုကဵု ဌာန်ပရိုၚ်သြၚ်လောန်တိုၚ်(မ်) ရ။

ဟိုတ်ဂှ်ရ ယဝ်ရဗော်ဍုၚ်မန်တၟိ နုက်တိတ်နူ PPST မ္ဂး ပ္ဍဲကဵု PPST ဂှ် ဗော်ဗၠးၜးရခေၚ် (ALP) ၊ ကံၚ်ဇြဳပရေၚ်ၜိုဟ်လလမ်ကရေၚ် (KNU/KNLA-PC) ၊ ဒပ်ပၞာန်ဒတုဲဖဵုဒဳမဝ်ကရေဇြဳကရေၚ် (DKBA)၊ ဗော်သွးဒဳမဝ်ကရေတ်တေတ်လာဟူ (LDU) ကေုာံ ဂအုပ်ဂကောံဗၠးၜးကောန်ဂကူပအိုဝ် (PNLO) တံ (၅) ဂကောံဟေၚ် သှ်ေအာရောၚ် မဒှ်ရ။

ညးမၞုံအခေါၚ်ဟီုဂး ဒပ်ပၠတရဴကောန်ဂကူချေၚ် (CNF) သလိုၚ်ထက်နဳဂှ် ယဝ်ရရံၚ်ကဵု အကာဲအရာပကတိလၟုဟ်မ္ဂး PPST ဝွံ ဟွံစှ်ေကဵုနတဲရတုဲ ဂကောံ (၅) ဂကောံ မသှ်ေဒၟံၚ်တံဂှ်လေဝ် ညံၚ်ကံၚ်ဇြဳပၞာန် အာယုက်ဂွိုအ်ဂၠိၚ်ဂှ် ဒးစၚ်ခြၚ်ထေက်ရောၚ် ထံက်ထ္ၜးလဝ်ရ။

“ယဝ်ရရံၚ်အာ နကဵုအကာဲအရာ ပရေၚ်ပၠန်ဂတးက္ဍိုပ်က္ညၚ်လၟုဟ်မ္ဂး PPST ဂှ် ဟွံစှ်ေကဵုနတဲရပုဟ်။ မသုန်ဂကောံ သှ်ေဒၟံၚ်လၟုဟ်ဟီုဂှ် သွက်ပရေၚ်ဒတူလိုၚ်ညးတံကဵု နကဵုအကာဲအရာတိဍာ်တံတုဲ ကၠောန်လဝ်သာ်ဏံရ။ ဟိုတ်ဂှ်ရ ညးတံဂှ် ဆက်တုဲသှ်ေဒၟံၚ်ရ။ နွံမွဲဂှ်တှ်ေ နကဵုကံၚ်ဇြဳပၞာန်ဂှ် ဂကောံရပ်လွဟ်ကောန်ဍုၚ်အရၚ်တံ ဆက်ကၠောန်ဒၟံၚ်ပရေၚ်ၜိုဟ်လလမ်ဏောၚ်ဟီုဂှ် ဣဏံရ။ ဟိုတ်ဂှ်ရ နကဵုမသုန်ဂကောံဏံလေဝ် ညံၚ်ဂွိုအ်ဆက်ကၠောန်ဒး ကုယန္တယာပရေၚ်အုပ်ဓုပ်ကံၚ်ဇြဳပၞာန်ဂှ် နွံပၟိက်ရ။ ဒးစွံသတိဏောၚ်။ ဟိုတ်ဂှ်ရ နကဵုမသုန်ဂကောံဏံ ပါလုပ်ဒၟံၚ် ပ္ဍဲ PPST တုဲ အာယုက်ကံၚ်ဇြဳပၞာန်ဂၠိၚ်အာဟာဟီုဂှ် နကဵုမသုန်ဂကောံဏံ ဂပ်ဝ်ဒးစၚ်ခြၚ်ထေက်ရ” သာ်ဝွံ ညးသ္ဂးရ။

ဂကောံက္ဍိုက်ပ်လၟေၚ်ကမၠောန်ပရေၚ်ၜိုဟ်လလမ် (PPST) ဝွံ နူလက်ထက်အလဵုအသဳ NLD တေံ သွက်ဂွံသဳကၠဳပ္ညဳပ္ညပ် ပ္ဍဲပရေၚ်ၜိုဟ်လလမ်၊ ပရေၚ်ဍုၚ်ကွာန်တံဂှ်တုဲ ဒက်ပ္တန်လဝ် ပ္ဍဲသၞာံ ၂၀၁၆ တေံ နကဵုဂကောံရပ်လွဟ်ကောန်ဍုၚ်အရၚ် မထ္ပက်လဝ်စၟတ်တဲ NCA ဂမၠိုၚ်ရ။

ၜိုန်ဂှ်ကီုလေဝ် ကြဴနူဒပ်ပၞာန်သီအဝဵုတုဲ ဂကောံရပ်လွဟ်ကောန်ဍုၚ်အရၚ် ဇြဟတ်ဇၞော်ဂမၠိုၚ် မပ္တံကဵု ဗော်သွးကောန်ဂကူကရေၚ် (KNU) ၊ ဒပ်ပၠတရဴကောန်ဂကူချေၚ် (CNF) ၊ ကံၚ်ဇြဳဒက်ပ္တန်ရးသေံ (RCSS) တံဂှ် ဒေါအ်ဇူလဝ် ပွမပါလုပ် ပ္ဍဲ PPST ဂှ်တုဲ ဒပ်ပၞာန်ကွးဘာ (ABSDF) ဂှ်လေဝ် ပါလုပ်ဒၟံၚ် ပ္ဍဲပၠန်ဂတးက္ဍိုပ်က္ညၚ်ရ။

ညးလ္ၚတ်သ္ၚဳဂၠိပ်ပရေၚ်ဍုၚ်ကွာန် ဥူတာန်သဵုနာၚ်ဂှ်လေဝ် ပ္ဍဲပၠန်ဂတးက္ဍိုပ်က္ညၚ်ဏံ ဂကောံရပ်လွဟ်ကောန်ဍုၚ်အရၚ်လ္ၚဵုတံဂှ် ပံၚ်တောဲကဵု NUG, PDF တံတုဲ အခိၚ်ချဳဒရာၚ်ဒၟံၚ်ပရေၚ်ပၞာန်ဂှ် လိက်ကသုက် NCA ဝွံ လမျီုဟွံလုပ်ရတုဲ ပ္ဍဲကဵု PPST ဂှ်လေဝ် အနာဂတ်ဟွံမွဲရပုဟ်ဂှ် သ္ၚဳဂၠိပ်လဝ်ရ။

“ ဂကောံ PPST မဒက်ပ္တန်လဝ် နကဵုဟိုတ်လိက်ကသုက် NCA ဂှ်ဝွံ ပြးထ္ကးအာပေၚ်ၚ်တုဲ နကဵုပရေၚ်ဍုၚ်ကွာန် သွက်သ္ဂောံဆက်ဒတူလိုၚ်ဟွံမွဲရပုဟ်ဂှ် မိက်ဂွံဟီုရ။ ပ္ဍဲကဵု PPST ဂှ် အတိုၚ်အကာဲအရာလၟုဟ်မ္ဂး အနာဂတ်ဟွံမွဲရပုဟ်။ လၟုဟ်ဂှ် ပ္ဍဲကဵုပၠန်ဂတးက္ညၚ်ဏံ ပံၚ်တောဲကဵု NUG, PDF တံ EROs တံတုဲ အခိၚ်မကၠောန်ဒၟံၚ်ပရေၚ်ချဳဒရာၚ်ပရေၚ်ပၞာန်ဂှ် လိက်ကသုက် NCA ဂှ်လေဝ် လမျီုဟွံလုပ်ရပုဟ်။ သ္ပဟိုတ်ကဵု လိက်ကသုက် NCA တုဲ PPST မမံက်ဂတဝ်ကၠုၚ်ဂှ်လေဝ် အနာဂတ်ဟွံမွဲရပုဟ်။ နကဵုပရေၚ်ဍုၚ်ကွာန် ပြးထ္ကးသရိုဟ်အာယျ၊ လီုလာ်အာယျဂှ် ပိုယ်တံ ဒုၚ်ဂိုၚ်ကေတ်ရ” သာ်ဝွံ ညးသ္ဂးရ။

အတိုၚ်အကာဲအရာလၟုဟ်မ္ဂး နူကဵုဂကောံ PPST ဂှ် ယဝ်ရဗော်ဍုၚ်မန်တၟိ နုက်တိတ်အာမ္ဂး ပ္ဍဲကဵု EAO မသဳကၠဳလဝ်ပရေၚ်ၜိုဟ်လလမ် ကုကံၚ်ဇြဳပၞာန် ဟွံအောန်နူကဵုပိဝါတံဂှ် (၅) ဂကောံဟေၚ် သှ်ေတဴရောၚ် မဒှ်ရ။

စပ်ကဵုအနာဂတ် PPST တုဲ ညးမၞုံအခေါၚ်ဟီုဂး ဂကောံ PPST သ္ကိုပ်ဗိုလ်ဇၞော်သဝ်ကျဝ်ညောအ်ဂှ် လ္ဂောံကဵုအကာဲအရာပရေၚ်ဍုၚ်ကွာန် အခိၚ်ဗွိုၚ်ပရေၚ်သဳကၠဳပရေၚ်ဍုၚ်ကွာန် ဍန်စှ်ေကၠုၚ်ဂှ် ဒဒှ်မစိုတ်လုပ်စ အပ္ဍဲဂကောံ ဍိုန်လျအာဂှ်ဝွံ ဒှ်ဓဝ်ဍာံပကတိရဂှ် ဟီုကဵု ဌာန်ပရိုၚ်သြၚ်လောန်တိုၚ်(မ်) ရ။

“အခိၚ်ဏံဂှ်တှ်ေ ဒှ်ပရေၚ်ဍုၚ်ကွာန်ဍုၚ်ပိုယ် အကာဲအရာဓမ္မတာဟွံသေၚ်မွဲရ။ ဒးဟီုသောၚ်ၚ်ကၠးကၠးမ္ဂး ပေါဲသဳကၠဳပရေၚ်ဍုၚ်ကွာန်ပိုယ်တံ အခိၚ်ဏံဂှ် ဗွိုၚ်ဍုန်ကၠုၚ်ညိညလေဝ်ဒှ်တဴရ။ ပေါဲသဳကၠဳပရေၚ်ဍုၚ်ကွာန်ဂှ် အခိၚ်ဏံ ဗွဲမဂၠိုၚ်ဂှ်တှ်ေ ဒှ်အကာဲအရာစိုတ်လုပ်စ ဍိုန်လျမွဲဂှ်လေဝ် ဒှ်ဓဝ်ဍာံပကတိရောၚ်” သာ်ဝွံ ညးသ္ဂးရ။

ၜိုန်ဂှ်ကီုလေဝ် ဂကောံမသှ်ေဒၟံၚ် ပ္ဍဲ PPST ဂမၠိုၚ်ဂှ် ရံၚ်သွက်ဒတုဲဖဵုဇကုသၟးတုဲ သဳကၠဳပရေၚ်ၜိုဟ်လလမ် ကုကံၚ်ဇြဳပၞာန်တုဲ ဆက်ဒတူလိုၚ်အာမာန်ရောၚ် သ္ၚဳဂၠိပ်ဒၟံၚ်တံလေဝ် နွံဒၟံၚ်ရ။

ညးခါတ်အကာဲပရေၚ်ဍုၚ်ကွာန်တံဂှ် လ္ဂောံကဵုအကာဲအရာပရေၚ်ဍုၚ်ကွာန်လၟုဟ်မ္ဂး နကဵု PPST အာစိုပ်သဳကၠဳပရေၚ်ၜိုဟ်လလမ် ကုကံၚ်ဇြဳပၞာန်ဂှ်ဝွံ သောၚ်ကလးပြသၞာပရေၚ်ဍုၚ်ကွာန်ဍုၚ်မာန်ဟွံသေၚ်တုဲ PPST မွဲဂကောံတုဲမွဲဂကောံ မနုက်တိတ်ကၠုၚ်ဒၟံၚ်ဂှ်လေဝ် အပ္ဍဲကာလခြာဟွံလအ်ဏံ သရိုဟ်ထ္ကးအာဏောၚ်ဂှ် သ္ၚဳဂၠိပ်လဝ်ရ။

ပရိုၚ်−သြၚ်လောန်တိုၚ်(မ်)

ဗီုဓာတ်−PPST