သွက်ဂွံကလေၚ်ပလန်တဲကဵု အကာဲအရာကာတၟေၚ်လဗိုတ်ကျာမေလံၚ် NUG ပ္တိတ်ကဵုတမ်ရိုဟ်ဒဝ်ဠာ မွဲပြကောဋိကိုတ်

လဂုၚ်- မေ (၁၄)

သွက်ဂွံကလေၚ်ပၠန်တဲကဵု အကာဲအရာကာတၟေၚ် လဗိုတ်ကျာမေလံၚ်ဇြိုၚ်ကလုမ်မိုဝ်ခါ ဇြဟတ်ဇၞော်ဒၟံၚ်ဂှ် ပ္တိတ်ကဵုအာတမ်ရိုဟ်ဒဝ်ဠာအမေရိကာန် မွဲပြကောဋိကိုတ်ရောၚ်ဂှ် (NUG) လလောၚ်တြးလဝ် ပ္ဍဲဂိတုမေ စၟတ်တ္ၚဲ (၁၁) ဂှ်ရ။ 

ပ္ဍဲကောံဓရီုကဝ်မယှေန်ပရေၚ်ကလေၚ်ပလန်တဲအရီုဗၚ်ပရေၚ်မၞိဟ် ကေုာံအန္တရာယ် အလဵုအသဳပရေၚ်ညဳသၟဟ်ကောန်ဂကူ NUG မကၠောန်ဗဒှ်လဝ် ပ္ဍဲတ္ၚဲဂှ် ကြဴနူသဳကၠဳလၟေၚ်ကမၠောန် ပရေၚ်ကလေၚ်ပလန်တဲအကာဲအရာကာတၟေၚ်မိုဝ်ခါတုဲ ဖျေံကၠုၚ်လဝ် သ္ဂုတ်သွာတ်ရ။ 

ပ္ဍဲကောံဓရီုဂှ် သွက်သ္ဂောံကလေၚ်ပလန်တဲကဵု အကာဲအရာကာတၟေၚ်လဗိုတ်ကျာမေလံၚ်ဂှ် သွက်သ္ဂောံပ္တိတ်ကဵုတမ်ရိုဟ်ဒဝ်ဠာအမေရိကာန် မွဲပြကောဋိကိုတ်၊ ပ္ဍဲရးသေတ်ဂါၚ်ကဵုမဂွေတအ်ဂှ် သွက်ဂွံကလေၚ်ပလန်တဲကဵု ကဵုလဗိုတ်ကျာ နဒဒှ်သြန်ဂအုမ်ကာတၟေၚ် သုၚ်စောဲအာ သြန်ကံက်ဂွံလဝ် အကံၚ်အခေါန် (၁၀) တၟံကၠံရောၚ်ဂှ် ဖျေံလဝ်သ္ဂုတ်သွာတ်ရ။ 

သွက်ရေၚ်ကလေၚ်ပလန်တဲကဵုလဗိုတ်ကျာ မပါလုပ် သီုပရိုၚ်အကာဲအရာဗြဲကျာဂှ် ပရိုၚ် နူဌာနဝန်ဇၞော်မဆေၚ်စပ်တအ် လလောၚ်တြးဂှ် စၟဳစၟတ်သ္ပဒတန်တုဲ ညံၚ်ဂွံလလောၚ်တြးအာ ကုညးဍုၚ်ကွာန် ဗွဲမဂတာပ်အခိၚ် သဳကၠဳလဝ်ရဂှ် ဂွံတီကေတ်ရ။ 

သ္အာၚ်နူဂှ်ပၠန်သွက်သ္ဂောံက္လိဂွံ အရီုဗၚ်ဍုၚ်သ္အာၚ် ကေုာံသွက်ပရေၚ်လလောၚ်တြး တၚ်လလောၚ်တြးမူဝါဒ NUG ဂှ် ဂကောံသုတေသန ကေုာံပရေၚ်ဖောအ်ဗြေဝ်တဴတက် ကဝ်မတဳပံၚ်ဗ္စပ်ပ္ညဳပ္ညပ် ဆေၚ်စပ်ကဵုပရေၚ်ဖန်ဇန်အကာဲအရာကာတၟေၚ် EOCC ကေတ်တာလျိုၚ်တုဲ ဒးရေၚ်တၠုၚ်အာရောၚ်ဂှ် ပါလုပ်ဒၟံၚ်ရ။ 

ပ္ဍဲမွဲကာလကာတၟေၚ်လဗိုတ်ကျာဏံ နကဵုဂကောံ ပ.အ.ဖ၊ ပ.က.ဖတအ်လေဝ် ပ္ဍဲကမၠောန်ကာတၟေၚ်တအ်ဂှ် ညံၚ်ပရေၚ်ဆက်စၠောံ ဟွံဂွံပိုတ်သ္ကုတ်အာ သွက်သ္ဂောံရေၚ်တၠုၚ် ပရေၚ်ဒစးဒုၚ်ပလေဝ်ပလေတ် သွက်ဂွံကဵုတၚ်စၞောန် ဗွဲမဂတာပ်အခိၚ်ဂှ် ဖျေံလဝ်သ္ဂုတ်သွာတ်ရ။ 

ကောံဓရီုဂှ် ဥက္ကဋ္ဌကဝ်မယှေန် ပရေၚ်အရီုဗၚ်ဗ္စာရဏာပရေၚ်မၞိဟ် ကေုာံပရေၚ်လေၚ်ပလန်တဲ ဘဲအန္တရာယ် NUG သမ္မတကၟိန်ဍုၚ်ယာယဳ ဒူဝါလယှဳလ၊ ဒုဥက္ကဋ္ဌကဝ်မယှေန် ဝန်ဇၞော်မာန်ဝေန်ခိုၚ်တာန် ကေုာံ ဂကောံအလဵုအသဳကီု သီုညးတာလျိုၚ်ဂမၠိုၚ် တိုန်စိုပ်လဝ်ရဂှ် ဂွံတီကေတ်လဝ်ရ။ 

ပရိုၚ်-သြၚ်လောန်တိုၚ်(မ်)

ဗီုရုပ် -NUG