ကြဴနူဂြာတ်ထောံဖျေံဗုမ် ပ္ဍဲပွိုၚ်ဍုၚ်ရေဝ်တုဲ ကံၚ်ဇြဳပၞာန် ကၠုၚ်ထံက်ဒၟံၚ်ကၚ် ကဵုက္ၜၚ်ကျာအဆက်ဟွံပိုတ်သ္ကုတ်

ရေဝ်၊ မေ(၁၄)

ကြဴနူကံၚ်ဇြဳပၞာန် ဂြာတ်ထောံဖျေံဗုမ် ပ္ဍဲကွာန်ဝါပသဲ ကေုာံဗဒိုပ် PDF မၞုံပွိုၚ်ဍုၚ်ရေဝ်သၟဝ်ကျာ ပ္ဍဲတွဵုရးဍုၚ်မန် လလောၚ်တြးလဝ် ပရေၚ်အုပ်ဓုပ်ပၞာန်တုဲဂှ် ထပ်ကၠောန်သ္ပကၠုၚ် ပရေၚ်ထံက်ကၚ်ကဵုက္ၜၚ်ကျာ အဆက်ဟွံပိုတ်သ္ကုတ်ရဂှ် ဂွံတီကေတ် နူဂကောံဇြဟတ်ပၠန်ဂတးတအ်ရ။  

ပ္ဍဲဂိတုမေ စၟတ်တ္ၚဲ (၇)၊ စၟတ်တ္ၚဲ (၈) ကေုာံ စၟတ်တ္ၚဲ (၁၀) တအ်ဂှ် ဒပ်ကံၚ်ဇြဳပၞာန်ဂြာတ်ထောံဖျေံလဝ်ဗုမ် ပ္ဍဲဗ္ဒပ် PDF မၞုံဗ္ဒာဲကွာန်ဝါပဒေဝ်(ဝါပသဲ) ဂကောံကွာန်ဗေဝ်လမု(ဘဲလမု) ပွိုၚ်ဍုၚ်ရေဝ်သၟဝ်ကျာ ကေုာံပ္ဍဲကွာန်ဝါပဒေဝ် နကဵုက္ၜၚ်ကျာရ။ 

ကြဴနူဗတိုက်ပန်ပှ်ောတုဲ ဒပ်ကံၚ်ဇြဳပၞာန် ထပ်ကၠောန်သ္ပကၠုၚ် ပရေၚ်ထံက်ကၚ် နကဵုက္ၜၚ်ကျာ အရိုဟ်ဒဒှ်တ္ၚဲကီု မွဲတ္ၚဲမ္ဂး အောန်အိုတ် ဟွံအောန်နူ ၅ ဝါ ပရေၚ်ထံက်ကၚ် နွံဒၟံၚ်ရဂှ် ညးတာလျိုၚ် PDF ရေဝ်သၟဝ်ကျာ ဗိုလ်ယျာန်နိုၚ် ဟီုကဵု ဌာန်ပရိုၚ်သြၚ်လောန်တိုၚ်(မ်)ရ။ 

ဟိုတ်နူပရေၚ်ကံၚ်ဇြဳပၞာန် ကၠုၚ်ထံက်ဒၟံၚ်ကၚ်ကဵုက္ၜၚ်ကျာတုဲ ညးဍုၚ်ကွာန်ကောန်ညးဒေသ နူကွာန်ပွိုၚ်ဍုၚ်ရေဝ်သၟဝ်ကျာတအ် ပရေၚ်ဒှ်ဓဝိၚ် ဂၠိုၚ်တိုန်ဒၟံၚ်တုဲ ဗွဲမဂၠိုၚ် ဆုဲပြံၚ်ဒၞာဲမံၚ်တုဲ ဒးမံၚ်တန်တဴဒၟံၚ်ကီု ကောန်ဒပ်စဵုဒၞာညးဍုၚ်ကွာန်တအ်လေဝ် ထောံဗဒိုပ်တုဲ ဒးဆုဲပြံၚ် မံၚ်တန်တဴဒၟံၚ်နွံရ။

ဟိုတ်နူဒပ်ကံၚ်ဇြဳပၞာန် ဗတိုက်လဝ်ကဵုက္ၜၚ်ကျာတုဲ သ္ၚိဒၟံၚ် ကေုာံပရေၚ်ပိုၚ်ပြဳညးဒေသ မၞုံပ္ဍဲကွာန်ဝါပဒေဝ်လ္ၚဵုဂှ် တူပၟတ်ဒးလီုလာ်လဝ်ကီု ကောန်အရာပ်ပန်တၠ ဇီုကပိုက်ဒးလဝ်ဝပ်တုဲ ပ္ဍဲအခိၚ်ဂြာတ်ထောံဖျေံဗုမ် ပ္ဍဲဗဒိုပ် PDF ဂှ် ကောန်ဒပ် PDF (၃) တၠ ဒးချိုတ်လဝ်တုဲ ဒးလဝ်ဝပ် (၄) တၠရ။ 

ပွိုၚ်ဍုၚ်ရေဝ်ဂှ် ဒှ်တိဍာ်ဂကောံရပ်လွဟ် ဒစဵုဒစဵုဒၟံၚ်ကဵုသၞောတ်တၠအဝဵုပၞာန်ဗွဲမဂၠိုၚ် ချဳဒရာၚ်ဒၟံၚ်တုဲ သီုဒှ် ဒေတိဍာ်ထိၚ်ဒဝ် ဌာန်ဂအုပ်ဗဟဵု ဗော်ဍုၚ်မန်တၟိ မရုဲစှ်လဝ် ဂၠံၚ်တရဴဆဵုဂဗသဳကၠဳဂှ်ရ။ 

ပရိုၚ်-သြၚ်လောန်တိုၚ်(မ်)

ဗီုရုပ် -KNU