ကဝ်ဒူလေဝ်၊ မေ (၁၄)
ပ္ဍဲတိဍာ်ဗော်သွးကောန်ဂကူကရေၚ် KNU ဂှ် ဂိတုတုဲကၠုၚ် ပ္ဍဲပွိုၚ်မွဲဂိတုဂှ် ဟိုတ်နူပရေၚ်ဒပ်ကံၚ်ဇြဳပၞာန် ချဳဒရာၚ်ပၞာန် ကေုာံပရေၚ်ဖံက်ပ္ကဝ် အခေါၚ်အရာမၞိဟ်တုဲ ကောန်အရာပ်ညးဍုၚ်ကွာန် ၇၀ ပြၚ် ဇီုကပိုက်ဒးချိုတ် ဂွံလဝ်ဘဲဝပ်ရဂှ် KNU လလောၚ်တြးလဝ်ရ။
ပ္ဍဲတိဍာ်ထိၚ်ဒဝ်ကဝ်ဒူလေဝ် KNU ဂှ် ဒပ်ကံၚ်ဇြဳပၞာန် ဂလိုၚ်ပ္တိုန်ကၠုပ် ပရေၚ်ချဳဒရာၚ်ပၞာန်တုဲ ကလိလောန်ကၠုၚ်ဒၟံၚ် ပရေၚ်ဖံက်ပ္ကဝ်အခေါၚ်အရာမၞိဟ် ဗွဲမဂၠိုၚ်တုဲ ပ္ဍဲဂိတုဨဗြဴ ပွိုၚ်မွဲဂိတုဂှ် ပရေၚ်ဒပ်ကံၚ်ဇြဳပၞာန် ဖံက်ပ္ကဝ်လဝ်အခေါၚ်အရာမၞိဟ်ဂကူစုၚ် ၁၁ ဂကူ ဟွံအောန်နူ ၃၁၀ ဝါ ကလိလောန်လဝ်ရဂှ် ဓမံက်ထ္ၜးလဝ် ပ္ဍဲတၚ်လလောၚ်တြးရ။
ဒပ်ကံၚ်ဇြဳပၞာန် ပ္တဝ်လဝ်ကဵုညးဍုၚ်ကွာန် ပန်ပှ်ောကၠုၚ်တုဲ ပရေၚ်ဗတိုက်ပန်ကဵုက္ၜၚ်ကျာ ပ္ဍဲကွာန် ကေုာံဗွိုၚ်ကမၠောန် ကၠောန်သ္ပလဝ် (၄၄) ဝါတုဲ ပ္ဍဲပရေၚ်ဗတိုက်ပန်ပှော်ဂှ် စမြိုၚ်သ္ၚိဒၟံၚ်၊ ဘာလကျာ်၊ ဘာကျာ် ကေုာံ ဘာဗ္တောန်လိက် ၃၀၀ ပြၚ် ဇီုကပိုက်လီုလာ်လဝ်ကီု ကောန်အရာပ်မွဲတၠ ဒးချိုတ်လဝ်တုဲ ဒးလဝ်ဘဲဝပ် (၁၅) တၠရ။
သ္အာၚ်နူဂှ်ပၠန် ကံၚ်ဇြဳပၞာန်ဂှ် သီုတၚ်ရန်တၟံနွံနွံ ပရေၚ်ပန်ဖျေံ ပ္ဍဲကွာန် ကေုာံ ဗွိုၚ်ကမၠောန် ၂၄၃ ဝါနွံတုဲ သ္ၚိဒၟံၚ် ၁၅၀ မ၊ စမြိုၚ်ညးဍုၚ်ကွာန်ပိုၚ် ၅ မ၊ ဘာလကျာ် ၂ ဘာ ဒးဇီုကပိုက်လီုလာ်လဝ်တုဲ ညးဍုၚ်ကွာန် ၃၈ တၠ ဇီုကပိုက်ဒးလဝ်ဝပ်တုဲ ၇ တၠ ဒးချိုတ်လဝ်ရဂှ် ဓမံက်ထ္ၜးလဝ်ရ။
ဒပ်ကံၚ်ဇြဳပၞာန်ဂှ် ဟိုတ်နူပန်ပှ်ောဒၟံၚ် လ္တူညးဍုၚ်ကွာန် ဟိုတ်ဟၟဲမွဲသာ်တုဲ ညးဍုၚ်ကွာန် (၄) တၠ ဒးချိုတ်လဝ်တုဲ ဒးလဝ်ဘဲဝပ် (၁) တၠကီု ဒၟာနူလိုန်ဒးမာၚ်ကံၚ်ဇြဳပၞာန်ပါံစွံလဝ်တုဲ ညးဍုၚ်ကွာန် (၅) တၠ ဇီုကပိုက်ဒးလဝ်ဝပ်ဂှ် ဟီုသ္ဂးလဝ်ရ။
ဒပ်ကံၚ်ဇြဳပၞာန် ရပ်ကေတ်ဏာ ညးဍုၚ်ကွာန် (၁၆) တၠတုဲ ပ္ဍဲဂှ် ညး ၂ တၠ ဒးဒုၚ်ပြိုက်ဂစိုတ်လဝ်ကဵု ဒပ်ကံၚ်ဇြဳပၞာန်တုဲ ၂ တၠပၠန်ဂှ်လေဝ် ဒးဒုၚ်ပျဲပျာံဍဵုဍိုက်လဝ်ရဂှ် တၚ်လလောၚ်တြး KNU ဟီုသ္ဂးလဝ်ရ။
သ္အာၚ်နူဂှ်ပၠန် ဒပ်ကံၚ်ဇြဳပၞာန်ဂှ် ပွဘပဠညးဍုၚ်ကွာန်ကီု၊ အခိၚ်ထ္ပက်လုပ်ကၠုၚ်ကရောၚ်ပၞာန်ဂှ် စံၚ်ပလီုလဝ် သ္ၚိဒၟံၚ် ၇၄ မ၊ စမြိုၚ်ညးဍုၚ်ကွာန်ပိုၚ် ၅ မ၊ ဘာလကျာ် ၁ ဘာ ပ္ဍဲကွာန် ၇ ကွာန်တုဲ သ္ၚိဒၟံၚ် ၂ မဂှ်လေဝ် ပလီုပလာ်လဝ် သီုဟိုတ်ဟၟဲမွဲသာ်ကီု ကေတ်ဏာလဝ် ကပေါတ်ကညောတ် နူညးဍုၚ်ကွာန် ၅ တၠ ဟွံဗဗွဲဓဝ်လေဝ် ကၠောန်သ္ပလဝ်ရဂှ် ဂွံတီကေတ် အတိုၚ်တၚ်လလောၚ်တြး KNU ရ။
ပရိုၚ်-သြၚ်လောန်တိုၚ်(မ်)ဗီုရုပ် -KNU
sanlontai