ညးဍုၚ်ကွာန်ရခေၚ် ဒးလဝ်ဘဲလဗိုတ်ကျာမေလံၚ်တအ် နွံဒၟံၚ်ပၟိက်အရီုဗၚ်ကၟဳဗ္ဒၚ် ကေုာံ ဍာ်သုၚ်ဍာ်ရပ် နဒဒှ်ကာတၟေၚ်

သေတ်တွေ၊ မေ (၁၇)

ညးဍုၚ်ကွာန် မၞုံတွဵုရးရခေၚ် ဒးဒုၚ်လဝ် ဘဲဒဏ်လဗိုတ်ကျာမေလံၚ်ဇြိုၚ်ကလုမ်မိုဝ်ခါ ဇြဟတ်ဇၞော် သ္ကာတ်မြဟ်တအ်ဂှ် နွံဒၟံၚ်ပၟိက်ကဵု အရီုဗၚ်ကၟဳဗ္ဒၚ် ကေုာံ ဍာ်သုၚ်ဍာ်ရပ် နဒဒှ်ကာတၟေၚ်ရဂှ် ဒပ်ပၞာန်ရခေၚ် (AA) ကေုာံ ညးကဵုဒၟံၚ်အရီုဗၚ်ဘဲဒဏ်လဗိုတ်ကျာတအ် ဟီုသ္ဂးလဝ်ရ။ 

ဟိုတ်နူလဗိုတ်ကျာမေလံၚ်ဇြိုၚ်ကလုမ်မိုဝ်ခါ လပိုက်လွိၚ်လဝ် ပ္ဍဲဂိတုမေ စၟတ်တ္ၚဲ (၁၄)တုဲကၠုၚ်ဏံတုဲ ပွိုၚ်ဍုၚ် မၞုံပ္ဍဲတွဵုရးရခေၚ် ဗ္ဒာဲသီုဖအိုတ် ဇီုကပိုက်ဒးလဝ်ကီု ညးဍုၚ်ကွာန်တအ်လေဝ် က္တဵုဒှ်ကၠုၚ် ညးဟၟဲသ္ၚိဌာန်ကီု သီုဒးဆဵုဂဗဒၟံၚ်ကဵုဒဒိုက် ဒၞာဲသွက်ဂွံမံၚ်ရ။ 

က္ဍိုပ်သ္ကိုပ်ဒပ်ပၞာန်ရခေၚ် (AA) သ္ကိုပ်ဂအုပ်ဗိုလ်ထောန်မျေတ်နာၚ်ဂှ်မ္ဂး ညးဍုၚ်ကွာန်ရခေၚ် ဒးလဝ်ဘဲဒဏ်လဗိုတ်ကျာတအ်ဂှ် အခိၚ်လၟုဟ်ပြဟ်ဟ်ဏံ နွံဒၟံၚ်ပၟိက်ကဵု အရီုဗၚ်ကၟဳဗ္ဒၚ်၊ ဍာ်သုၚ်ဍာ်ရပ်သ္အးဇ္ၚး ကေုာံ ဂဥုဲဇဗ ပၟိက်ဇၞော်ဒၟံၚ်ကီု သွက်ဂွံကလေၚ်က္လိဂွံပၟတ် ကေုာံလာၚ်ဖုၚ်လေဝ် နွံဒၟံၚ်ပၟိက်ရဂှ် ဟီုသ္ဂးလဝ် ပ္ဍဲဂိတုမေ စၟတ်တ္ၚဲ(၁၆)ဏံရ။ 

ဟိုတ်ဂှ်ရ သွက်ညးဍုၚ်ကွာန်ရခေၚ် ဒးဒုၚ်ဆေၚ်လဝ်မုက်ကဵု ဘဲဒဏ်သဘာဝတအ်ဂှ် နကဵုဂကောံအေန်ဂျဳအိုဝ်၊ အိုၚ်အေန်ဂျဳအိုဝ်၊ ဂကောံဒုၚ်သ္ဇိုၚ်ဒေသတအ်လေဝ် သွက်ဂွံပံၚ်တောဲရေၚ်တၠုၚ်ကဵု ဂကောံအလဵုအသဳညးဍုၚ်ကွာန်အရကာန်မွဲကရောံ မွဲစွံတုဲ ထံက်ပၚ်ရီုဗၚ်အာညိဂှ်လေဝ် အာတ်မိက်ဒုၚ်လဝ်ဂုဏ် လၟေၚ်မေတ္တာ ဗွဲတၟေၚ်ရ။ 

ပၞောဝ်ကဵုဒးလဝ်ဘဲဒဏ်လဗိုတ်ကျာ ဍုၚ်သေတ်တွေဂှ် ဒှ်အကာဲအရာပရေံအိုတ်တုဲ (၉၀)တၟံကၠံဍုၚ် ဒးလီုလာ်လဝ်ကီု သၟာဒဒိုက်ဂၠိုၚ်ကဵုကၠံ ပါလုပ်သီုကောန်ၚာ်၊ ညးဗြဴ၊ ညးမၞုံဒၟုၚ်ဒၠေၚ်အလံၚ်မိယာဲ ကေုာံ ညးအာယုက်ဇၞော်ဂမၠိုၚ် ဗွဲမဂၠိုၚ် ဒးချိုတ်လဝ်ရဂှ် ၜိုန်ရပရိုၚ်တိတ်ဒၟံၚ်ကီုလေဝ် နကဵုသြၚ်လောန်တိုၚ်(မ်) သ္ပဒ္တန်ဟွံမာန်ဏီရ။ 

ညးရီုဗၚ်ဟံၚ်ပြာ်ဒၟံၚ် ပ္ဍဲဗလးမုက်တိတအ်ဂှ် ပရေၚ်မၞိဟ်ချိုတ်ဂျိုၚ် ၜိုန်ရနွံဂၠိုၚ်ကီုလေဝ် စရၚ်ချိုတ်တ်ပၠိုတ်တ်ဂှ် ကံက်ကေတ်ဟွံဂွံဏီကီု လ္ပာ်အလဵုအသဳတွဵုရးရခေၚ်လေဝ် လလောၚ်တြးလဝ် ပရိုၚ်ဟၟဲဏီရဂှ် ဟီုသ္ဂးလဝ်ရ။ 

ညးဍုၚ်ကွာန် ဒးလဝ်ဘဲဒဏ်လဗိုတ်ကျာတအ်ဂှ် ဒးဇူဒီုဒၟံၚ် ပ္ဍဲဗဒိုပ်ယာယဳတုဲ ဗဒိုပ်ဗွဲမဂၠိုၚ်ဂှ် ဟိုတ်နူနွံဒၟံၚ် ပ္ဍဲဒၞာဲကြပ်ညောန်ကဵုၜဳတုဲ ပရေၚ်ဂီုကၠီုဂွံဖျေံစိုတ် ဟၟဲရဂှ် ညးဒေသတအ် ဟီုသ္ဂးလဝ်ရ။ 

ကြဴနူလဗိုတ်ကျာမေလံၚ်လုပ်တုဲ ပ္ဍဲဂိတုမေ စၟတ်တ္ၚဲ (၁၅) တ္ၚဲယးဂှ် က္ဍိုပ်သ္ကိုပ်ပၞာန် ဂအုပ်သ္ကိုပ်ဗိုလ်ဇၞော်မေန်အံၚ်လှာၚ် စိုပ်ကၠုၚ်ဍုၚ်သေတ်တွေတုဲ သွက်ဂွံရီုဗၚ်ဟံၚ်ပြာ်ညးဍုၚ်ကွာန် ဒးလဝ်ဘဲဒဏ်လဗိုတ်ကျာ ကဵုလဝ်တၚ်စၞောန်ရဂှ် ဓမံက်ထ္ၜးလဝ် ပ္ဍဲပရိုၚ် လ္ပာ်ကံၚ်ဇြဳပၞာန်ရ။ 

ကံၚ်ဇြဳပၞာန်ဂှ်မ္ဂး ပွိုၚ်ဍုၚ်တွဵုရးရခေၚ် ၁၇ ပွိုၚ်ဍုၚ် မပါလုပ်သီုသေတ်တွေ၊ ကျောက်ဖျူ၊ အာမ်၊ မာန်အောၚ် ဒးဒုၚ်လဝ် ဘဲဒဏ်လဗိုတ်ကျာဂှ် လလောၚ်တြးလဝ် နဒဒှ်ဒေသအာစိုပ်ဘဲအန္တရာယ်သဘာဝ အတိုၚ်သၞောဝ်ဥပဒေ စဳဇန်ဖန်ဖက် အန္တရာယ်သဘာဝ ၝောံပိုဒ် (၁၁) ပ္ဍဲဂိတုမေ စၟတ်တ္ၚဲ ၁၅ ဏံရ။ 

ပရိုၚ်-သြၚ်လောန်တိုၚ်(မ်)

ဗီုရုပ် -CJ