သလေန် – မေ(၁၇)
ရးဒေသမဂွေ၊ ပွိုၚ်ဍုၚ်သလေန် ပ္ဍဲတ္ကအ်ဇြေန်ဖျူဂှ် ဟိုတ်နူဍာ်ကြုၚ်ဟးတိုန်ကၠုၚ်တုဲ မၞိဟ်ချိုတ် ဟဳဗက်ကၠုၚ်ဇၟောဝ်ဍာ် နွံကၠုၚ် (၃)တၠရဂှ် ညးဒေသဂမၠိုၚ် ဟီုကဵု ဌာန်ပရိုၚ်သြၚ်လောန်တိုၚ်(မ်)ရ။
ဟိုတ်နူအသိၚ်လဗိုတ်ကျာမေလံၚ် ဍာ်ကြုၚ်သလေန်တိုန်တုဲ ကွာန်မွဲဒမြိပ်ကြုၚ်ဂှ် ဗၠိုက်အာဍာ် ၜိုတ် (၂၀)ကွာန်တုဲ တိဗ္ၚသၟာဗ္ၚတအ် (၈၅)တၟံကၠံ ဒးလီုလာ်လဝ်ရ။
“ဍာ်ကြုၚ်သလေန်နွယ်တမေဝ် စှ်ေကၠုၚ်ဂှ်ရ ကွာန်ဇိုၚ်ၚ်ဂှ်ကီု သီုကဵုကွာန်နွယ်တမေဝ် ဗၠိုက်အာဍာ်ရ။ ဟဳဗက်အာဍာ်တုဲ ကောန်ကဵုယာဲၜါတၠ ဒးချိုတ်လဝ်ဂှ် ဂွံမိၚ်လဝ်ရ။ ပ္ဍဲဒၞာဲတၞဟ်လေဝ် ၜိုန်ရမိၚ်ဒၟံၚ် ပရိုၚ်မၞိဟ်ချိုတ်ကီုလေဝ် ညးဂှ်ရောဟီုဂှ် ဟွံဂွံတီကေတ်ဏီရ” ဂှ် ညးဒေသမွဲတၠ ဟီုကဵု ဌာန်ပရိုၚ်သြၚ်လောန်တိုၚ်(မ်)ရ။
ပ္ဍဲကဵုညးဟဳအာဍာ်တအ်ဂှ် ဒဝ်အေတာန် အာယုက် (၇၀)သၞာံ ပ္ဍဲဂိတုမေ စၟတ်တ္ၚဲ (၁၅) အခိၚ်နူဂယးဂှ် ကလေၚ်ဆဵုလဝ်ဇွတုဲ ဇွကောန်ဝုတ်ညး မယေန်မေန်သိုဝ်ဂှ်မ္ဂး ကလေၚ်ဆဵုလဝ် ပ္ဍဲတ္ၚဲဂှ် အခိၚ်ဇိုၚ် သဝ်တ္ၚဲရဂှ် ဂွံတီကေတ်ရ။
သ္အာၚ်နူဂှ်ပၠန် ညးမၞုံယၟုကိုဝ်ယှိုၚ် ကောန်ကွာန်နွယ်တမေဝ်ဂှ်လေဝ် အဃောပ္ဍိုက်ဒၟံၚ်ကပေါတ်ဗၞိက်မိယာဲညး ပ္ဍဲဖျာသၟဝ်တ္ကအ်ဇြေန်ဖျူဂှ် ဟဳဗက်ဍာ် ဒးချိုတ်လဝ်ရဂှ် ဓမံက်ထ္ၜးလဝ် ပ္ဍဲပရိုၚ်ဒေသဂှ်ရ။
ပ္ဍဲဂိတုမေ စၟတ်တ္ၚဲ(၁၄)တုဲကၠုၚ်တေံ ဍာ်ကြုၚ်သလေန်ဂှ် နူကဵုအခိၚ်ၜိုတ်(၄)နာဍဳဇိုၚ်သဝ်တ္ၚဲ စဵုကဵုအခိၚ်ဗ္တံ ၜိုတ်(၉)နာဍဳ ပ္ဍဲကွာန်ဇိုၚ်ကြုၚ်တအ်ဂှ် ဍာ်ဂၠိုၚ်တိုန်ကၠုၚ်လဝ်ရ။
ဌာနဝန်ဇၞော်စဳဇန်ဖန်ဖက် ဆေၚ်စပ်ကဵုအရီုဗၚ်ဗ္စာရဏာပရေၚ်မၞိဟ် ကေုာံဘဲအန္တရာယ် အလဵုအသဳ ပရေၚ်ညဳသၟဟ်ကောန်ဂကူဂှ် ဟိုတ်နူလဗိုတ်ကျာမေလံၚ်တုဲ ညးဒးချိုတ်လဝ် စဵုကဵု (၁၈)တၠ နွံကၠုၚ်ရဂှ် လလောၚ်ပ္တိတ်လဝ်ပရိုၚ်ရ။
ပရိုၚ်-သြၚ်လောန်တိုၚ်(မ်)
ဗီုရုပ် – CJ
sanlontai