ပ္ဍဲပွိုၚ်ဍုၚ်ၜဳကလေၚ် ပေါဲဗ္တိုက်ဂမၠိုၚ် ကလေၚ်က္တဵုဒှ်ဒၟံၚ်

ၜဳကလေၚ်၊ မေ (၁၇)

သ္ပပ္တံနူ ဂိတုမေ (၁၅) တုဲကၠုၚ်တေံတုဲ ပ္ဍဲတွဵုရးဍုၚ်မန်၊ ပွိုၚ်ဍုၚ်ၜဳကလေၚ်၊ ဗ္ဒါဲကွာန်အသူချံၚ်ဂှ် အကြာဒပ်ကံၚ်ဇြဳပၞာန်ကဵု ဒပ်ပံၚ်ကောံ KNLA တံ ပေါဲဗ္တိုက် ကလေၚ်က္တဵုဒှ်ဒၟံၚ်ရောၚ် ဂွံတီကေတ် နူကဵုကမ္မတဳကောပ်ကာဲကေၚ်ကာမိတ်ခရိုၚ်သဓီု KNU ရ။

ကရောၚ်ပၞာန်ကံၚ်ဇြဳပၞာန် ဇြဟတ်ဒပ် (၁၀၀) ပြၚ်ပါဂှ်ဝွံ နူကဵုဒေသမေဝ်ဝိုၚ်မွဲကဆံၚ် ထ္ပက်ကၠုၚ် ကရောၚ်ပၞာန် အပ္ဍဲပွိုၚ်ဍုၚ်ၜဳကလေၚ်ဂှ်ရ အကြာဒပ်ပံၚ်ကောံ ဒပ်ပၞာန်ဗၠးၜးကောန်ဂကူကရေၚ် KNLA တံဂှ် ပေါဲဗ္တိုက်ၜါလ္ပာ် ကလေၚ်က္တဵုဒှ်ကၠုၚ်ရ။

ပ္ဍဲဂိတုမေ (၁၆) အခိၚ်နူဂယးဂှ်လေဝ် အကြာကရောၚ်ပၞာန်ကံၚ်ဇြဳပၞာန်ကဵု ဒပ်ပံၚ်ကောံ KNLA တံဂှ် ပေါဲဗ္တိုက်တံ ထပ်က္တဵုဒှ်လဝ်တုဲ အကာဲအရာဇီုကပိုက်ချိုတ်ဂျိုၚ် ဗွဲလစှ်ေဂှ် ဟွံဂွံတီကေတ်ဏီရောၚ် ဥက္ကဌကမ္မတဳကောပ်ကာဲကေၚ်ကာမိတ် ခရိုၚ်သဓီု ဟီုကဵု ဌာန်ပရိုၚ်သြၚ်လောန်တိုၚ်(မ်) ရ။

ၜိုန်ဂှ်ကီုလေဝ် အပ္ဍဲပေါဲဗ္တိုက်ဏံဂှ် ဒပ်ပံၚ်ကောံ KNLA တံ ဂတာပ်တဲဂွံလဝ်ကၠာဂှ်ရ လ္ပာ်ကံၚ်ဇြဳပၞာန် ဇီုကပိုက်ချိုတ်ဂျိုၚ်တံ နွံဒၟံၚ်ရောၚ် သ္ဂးရ။

အခိၚ်လၟုဟ်ဂှ် ဟိုတ်နူဒပ်ပံၚ်ကောံ KNLA တံ ကၟာတ်လဒဵုဗ္တိုက်ဒၟံၚ် ကရောၚ်ပၞာန်ကံၚ်ဇြဳပၞာန်တံဂှ်ရ ဒပ်ကံၚ်ဇြဳပၞာန် အာဂတဟွံဂွံတုဲ ကၟာတ်ဒးမံၚ် ပ္ဍဲပွဳပွူ ဗ္ဒါဲကွာန်အသူချံၚ်ဂှ် ဂွံတီကေတ် အတိုၚ်ဂလာန်ဂကောံဇြဟတ်ပၠန်ဂတးတံရ။

ဟိုတ်နူပေါဲဗ္တိုက်တံ က္တဵုဒှ်ဒၟံၚ်ဂှ်ရ ညးဒေသ နူကွာန်ပွဳပွူဗ္ဒါဲဗ္ဒါဲ (၃) ကွာန် ပါလုပ်သီုကဵုကွာန် အသူချံၚ်တံဂှ်ဝွံ ဒးဂြိပ်ဒဴပါဲဒလေတ်ဒၟံၚ် ဒၞါဲဗၠးဘဲတံဂှ်တုဲ အရီုဗၚ်ပရေၚ်ဗ္စာရဏာမၞိဟ်ဂမၠိုၚ်လေဝ် နွံပၟိက်ဒၟံၚ်ရောၚ်ဂှ် ဂွံတီကေတ်ရ။

ပ္ဍဲပွိုၚ်ဍုၚ်ၜဳကလေၚ် ဒပ်မဟာ (၁) ဗော်သွးကောန်ဂကူကရေၚ် KNU ဂှ် ပ္ဍဲဂိတုဨပရဴတုဲကၠုၚ် တေံဂှ်လေဝ် ဒပ်ကံၚ်ဇြဳပၞာန် ဟိုတ်နူပန်ပှော်လဝ်လွဟ်ဇၞော် အပ္ဍဲကွာန်တံဂှ်ရ ညးဒေသ (၇၀၀၀) ပြၚ် ဒးဂြိပ်ဒဴပါဲဒလေတ်လဝ်ရ။

ပရိုၚ်−သြၚ်လောန်တိုၚ်(မ်)

ဗီုဓာတ်−KNLA