သွက်ဘဲဒဏ်လဗိုတ်ကျာရခေၚ် NUG ထံက်ပၚ်ကဵုဒါန်လ္ၚီကိုတ်

သေတ်တွေ- မေ (၁၈)

သွက်ပရေၚ်လီုလာ် ဟိုတ်နူလဗိုတ်ကျာမေလံၚ်ဇြိုၚ်ကလုမ်ဇြဟတ်ဇၞော် လုပ်စိုပ်လဝ် တွဵုရးရခေၚ်ဂှ် အလဵုအသဳ NUG ထံက်ပၚ်ကဵုလဝ်ဒါန် သွက်ဂွံသုၚ်စောဲ ပ္ဍဲကမၠောန်ရီုဗၚ်ဟံၚ်ပြာ် ဂကောံကောန်ဂကူ ရခေၚ် သြန်လ္ၚီကိုတ်ဒကေဝ်ရဂှ် ULA/AA လလောၚ်တြးလဝ်ရ၊

ပ္ဍဲဂိတုမေ စၟတ်တ္ၚဲ (၁၄)တုဲကၠုၚ်တေံဂှ် ဟိုတ်နူလဗိုတ်ကျာမေလံၚ် လုပ်စိုပ်လဝ် ပ္ဍဲတွဵုရးရခေၚ်တုဲ ဒေသဗွဲမဂၠိုၚ် ပါလုပ်သီုဍုၚ်သေတ်တွေ ၜိုတ် (၉၅)တၟံကၠံ ဇီုကပိုက်ဒးလီုလာ်လဝ်ရ။

သွက်ဂွံသုၚ်စောဲ ပ္ဍဲအရာကၠောန်ရေၚ်တၠုၚ်ပရေၚ်ရီုဗၚ်ဟံၚ်ပြာ် ဂကောံကောန်ဂကူရခေၚ် သွက်ပရေၚ်ဇီုကပိုက် လီုလာ်လဝ် ဗီုလၟုဟ်ဏံဂှ် ဌာန်ဂအုပ်ဗဟဵု KIO ပိလ္ၚီကိုတ် ကေုာံ MNDAA မဒှ်ဂကောံမဟာမိတ်ကောဒေံ ဒပ်ပၞာန်ရခေၚ်လေဝ် အပ်ပြာပ်ကဵုလဝ် မဒါန်သြန် လ္ၚီကိုတ်ရဂှ် ဂွံတီကေတ်ရ။

ဟိုတ်နူရီုဗၚ်ထံက်ပၚ်ကဵုလဝ် အခိၚ်ညးဍုၚ်ကွာန်ရခေၚ် အာစိုပ်ဒၟံၚ်ဒဒိုက် ဗီုလၟုဟ်ဏံဂှ် ဒဒှ်ရမိပ်စိုတ် တၚ်ဂုဏ် ဗွဲမဇြိုဟ်နက်ဂှ် ဥက္ကဋ္ဌ ဂကောံကောန်ဂကူရခေၚ် ထ္ပက်စၟတ်တဲ လလောၚ်တြးလဝ်ရ။

ညံၚ်ညးဍုၚ်ကွာန်ဒးလဝ်ဘဲဒဏ်လဗိုတ်ကျာ ဟွံဂွံစိုပ်အာ အကာဲအရာပရေံပရေံဂှ် နွံဒၟံၚ်ပၟိက်ကဵု အရီုဗၚ်တုဲ သွက်ဂွံကဵုအရီုဗၚ်ကာတၟေၚ် ကေုာံပရေၚ်ကလေၚ်ပ္တန်ပတဴဂှ် TNLA ကေုာံ MNDAA တအ်လေဝ် အာတ်မိက်လဝ် ကၟိန်ဍုၚ်နာနာရ။

သ္အာၚ်နူဂှ်ပၠန် ဟိုတ်နူလဗိုတ်ကျာတုဲ သွက်ညးဒးဒုၚ်အိုတ်လဝ်လမျီုကီု သွက်ပရေၚ်ဆောံလေၚ် လီုလာ်လဝ်ကီုတအ်ဂှ် ဒဒှ်ရစိုတ်ဟွံမိပ်ဂှ်လေဝ် ဂကောံကောဒေံမဟာမိတ်တအ် ဟီုသ္ဂးလဝ်ရ။

စဵုကဵုလၟုဟ်ဏံ ဟိုတ်နူလဗိုတ်ကျာမိုဝ်ခါဇြိုၚ်ကလုမ်တုဲ အလုံမွဲကၟိန်ဍုၚ် မၞိဟ်ဒးချိုတ်လဝ် (၄၃၅)တၠ နွံဒၟံၚ်ရဂှ် NUG လလောၚ်တြးလဝ်ကီု သွက်ပရေၚ်ကလေၚ်ပၠန်တဲကဵု အကာဲအရာကာတၟေၚ် လဗိုတ်ကျာဂှ်လေဝ် ပ္တိတ်အာသြန်တမ် ဒဝ်ဠာအမေရိကာန် မွဲပြကောဋိကိုတ်ရောၚ်ဂှ်လေဝ် ကဵုလဝ်တၚ်သမ္တီရ။

NUG ဂှ်သွက်ပရေၚ်ပလန်တဲကဵု အကာဲအရာကာတၟေၚ်လဗိုတ်ကျာ ၜိုန်ရကၠောန်ရေၚ်တၠုၚ်ဒၟံၚ် ကီုလေဝ် ကံၚ်ဇြဳပၞာန်သီအဝဵုဂှ်မ္ဂး သွက်ညးဍုၚ်ကွာန်ဒးလဝ်ဘဲဒဏ်လဗိုတ်ကျာ ပ္တိတ်သုၚ်စောဲအာ သြန်ဂအုံကာတၟေၚ်ဂလိုၚ်လဵုရောဂှ် လလောၚ်တြးလဝ်ဟၟဲဏီကီု ပ္ဍဲကမၠောန်ပရေၚ်ရီုဗၚ်ဟံၚ်ပြာ် ဗလးမုက်တိလေဝ် ရေၚ်တၠုၚ်ကၠောန်သ္ပကဵုဒၟံၚ် ညံၚ်ဂွံစိုပ်တရဴဟၟဲဏီရဂှ် ညးရီုဗၚ်ဟံၚ်ပြာ်ဂမၠိုၚ်ဟီုကဵု ဌာန်ပရိုၚ်သြၚ်လောန်တိုၚ်(မ်)ရ။

ပရိုၚ်-သြၚ်လောန်တိုၚ်(မ်)

ဗီုရုပ် – ULA/AA