နေပျဳဒဝ် – မေ (၁၉)
ပ္ဍဲအပ္ဍဲဍုၚ် မွဲဒၞာဲဓဝ် ပကောံစွံလဝ် သ္ၚုလျိုၚ် (၅၀)တာန် ကေုာံ သြောံ (၅၀၀၀) နလ္ပာ်လ္တူတုဲ ယဝ်ရဟွံပ္တိုန် အခေါၚ်စၟတ်သမ္တီမ္ဂး ကေတ်အာအရေဝ် အတိုၚ်သၞောဝ်ဥပဒေရောၚ်ဂှ် ဌာနဝန်ဇၞော်ပရေၚ်ပိုန်ဒြပ် ကေုာံပရေၚ်ကူသာန်သွံရာန် လလောၚ်တြးလဝ် ပရိုၚ်ရ။
ယဝ်ရပကောံစွံလဝ်သြောံသ္ၚု ဗ္ၜတ်အပိုၚ်အခြာ စၟတ်သမ္တီလဝ်ဂှ်မ္ဂး ဒးပ္တိုန်အခေါၚ်စၟတ်သမ္တီ နကဵုသၞောတ်အောန်လာၚ်ရောၚ်ဂှ် ဂကောံအလဵုအသဳကေုာံ ပုဂ္ဂလိက ဆေၚ်စပ်ကဵုပရေၚ်ပ္တိုန်အခေါၚ်စၟတ်သမ္တီ ကမၠောန်ပကောံစွံသြောံသ္ၚု မဒက်ပ္တန်လဝ် ပ္ဍဲဂိတုမေ စၟတ်တ္ၚဲ (၉)ဂှ် လလောၚ်တြးလဝ်ရ။
ညးတၠကမၠောန်သြောံသ္ၚုမွဲတၠဂှ်မ္ဂး ကံၚ်ဇြဳပၞာန်လလောၚ်တြးကၠုၚ်ဗီုဏံဂှ် ဟိုတ်နူၚုဟ်သြောံသ္ၚု က္ဍၚ်တိုန်ကၠုၚ်တုဲ ဟွံမိက်ကဵု ညးဂိုၚ်ဒေပ်ဍာ်ဇမၠိၚ်တအ် ဂိုၚ်စွံလဝ်ကီု ဟိုတ်နူတၚ်လလောၚ်တြးဏံတုဲ ပရေၚ်ဇီုကပိုက်ဒးၚုဟ်မးဗွဝ်ဖျာ နွံမာန်ရောၚ်ဂှ် ဟီုသ္ဂးလဝ်ရ။
“အရာဏံဂှ် ပ္ဍဲဍုၚ်တၞဟ်ဟ် နွံဒၟံၚ်ရ။ ပ္ဍဲသေံလေဝ် နွံဒၟံၚ်ရ ဗီုဏံဂှ်။ လၟုဟ်ဂှ်တှ်ေ ပျးဌာန်ကၠုၚ်အရာဏံမွဲ ယဝ်ရဒးဟီု လညာတ်အဲတှ်ေ စပ်ကဵုၚုဟ်သြောံသ္ၚု တိုန်ကၠုၚ်ညိညတုဲ ဆေၚ်ဆက်ဒၟံၚ်ဏောၚ် ထေၚ်ကေတ်ရ။ ပိုဲဂှ် စပ်ကဵုၚုဟ်သြောံသ္ၚု မိက်ဂွံဂိုၚ်စွံဍာ်ဇမၠိၚ်ဂှ် ညာတ်ကေတ်ရ။ ယဝ်ရပေၚ် (၅၀)တာန်တှ်ေ စကကာကဵုဗုတ်ဏောၚ်။ ဗီုဏံဂှ် ဟွံမိက်ကဵုထိၚ်လဝ် အခိၚ်လအ်လအ် ဂွံဆဵုကေတ်ရ။ ညံၚ်ဂွံတီလၟိဟ် သှ်ေၜက်ဒၟံၚ် ပ္ဍဲဍုၚ်ရ။ ပရေၚ်ဇီုကပိုက်ဒး ၚုဟ်မးဗွဝ်ဖျာသြောံသ္ၚု ညိညဂှ် နွံဏောၚ်။ ဆ္ဂး ဂၠိုၚ်ၚ်ဟွံသေၚ်ပုဟ်။ ညိညရ။ ဗီုဏံရလေဝ်၊ ပ္ဍဲဗွဝ်ဖျာဂှ် ပရေၚ်ဇီုကပိုက်ဒး ညိညနွံဏောၚ်” ဂှ် ဟီုသ္ဂးလဝ်ရ။
သ္အာၚ်နူဂှ်ပၠန် ဟိုတ်နူဖ္အောဝ်စကာကဵု ပ္တိုန်အခေါၚ်စၟတ်သမ္တီ ပရေၚ်ဂိုၚ်စွံသြောံသ္ၚုတုဲ နကဵုညးတၠ ကမၠောန်ဂမၠိုၚ် ပ္ဍဲအရာကၠောန်ကမၠောန် သာတုဲပရေၚ်ယှုက်ထုဲ နွံကၠုၚ်မာန်ရောၚ်ဂှ် ညးဟီုသ္ဂးလဝ်ဏီရ။
ကိစ္စဖ္အောဝ်စကာကဵု ညးဂိုၚ်ဒေပ်သြောံသ္ၚုတအ် ပ္တိုန်အခေါၚ်စၟတ်သမ္တီ ဗီုလၟုဟ်ဏံဂှ် သွက်ဂွံတီကေတ် အကာဲအရာသြောံသ္ၚု သှ်ေၜက်ဒၟံၚ် ပ္ဍဲဍုၚ်ကီု အကာဲအရာနွံပၟိက် ပ္ဍဲဍုၚ်ကဵု အကာဲအရာ ပရေၚ်ပလံၚ်ဗစိုပ် ဍုၚ်သ္အာၚ်လေဝ် ဂွံတော်ချ ချိၚ်ခယျကေတ်မာန်တုဲ ကၠောန်ရေၚ်တၠုၚ်လဝ်ရဂှ် တၠကမၠောန်သြောံသ္ၚုတအ်ဟီုသ္ဂးလဝ်ရ။
စပ်ကဵုတၚ်လလောၚ်တြးကံၚ်ဇြဳပၞာန်လၟုဟ်တုဲ နကဵုသြၚ်လောန်တိုၚ်(မ်) ၜိုန်ရဆက်စၠောံလဝ်ကဵု ဂကောံသြောံသ္ၚုကၟိန်ဍုၚ်ဗၟာ နကဵုဖုၚ် ဂၠိုၚ်ၚ်ကဵုဝါကီုလေဝ် ကလေၚ်ဟီုသွဟ်ကဵုလဝ် ဟၟဲရ။
ၚုဟ်မးသ္ၚုပ္ဍဲဍုၚ်ဂှ် ပ္ဍဲဂိတုဨဗြဴ တုဲကၠုၚ် ကၠာနူဟွံစိုပ်အတးဏီတေံ သ္ၚုမောဝ် (၁၀၈) ပံၚ် မွဲရိုက် ၜိုန်ရၚုဟ်နွံဒၟံၚ် အကြာ(၇၀၀၀၀)ကီုလေဝ် အခိၚ်လၟုဟ်ဏံ က္ဍၚ်တိုန်ကၠုၚ် စဵုကဵုဗွိုၚ် (၈၄၀၀၀) ကီု ပ္ဍဲဂကူသ္ၚုတၞဟ်တအ်လေဝ် နူကဵု (၁၀၀၀၀)ဒကေဝ် စဵုကဵု (၁၅၀၀၀) က္ဍၚ်တိုန်ကၠုၚ်ဒၟံၚ်ရ။
ပရိုၚ်-သြၚ်လောန်တိုၚ်(မ်)
ဗီုရုပ် -CJ
sanlontai