တၞၚ်သြဳ – မေ (၁၈)
ရးဒေသဇၞော်တၞၚ်သြဳ၊ ပ္ဍဲဗ္ဒာဲဒဒန် (၄၃၃) အကြာကွာန်ဗာန်လမွတ်ကဵု ညံၚ်ပေန်ကုမ် ပွိုၚ်ဍုၚ်တၞၚ်သြဳဂှ် ဒပ်ကံၚ်ဇြဳပၞာန် ထ္ပက်လုပ်ကၠုၚ်ပၞာန်တိုက်ဂှ် ဒးမာၚ်တုဲ ဒးချိုတ်လဝ် (၅)တၠ ဒးလဝ်ဘဲဝပ် (၃)တၠရဂှ် ဌာန်လလောၚ်ပရိုၚ် ပ.က.ဖ ပွိုၚ်ဍုၚ်တၞၚ်သြဳ ဟီုသ္ဂးလဝ်ရ။
ပရေၚ်ဒဒှ်ဂှ် ပ္ဍဲဂိတုမေ စၟတ်တ္ၚဲ (၁၇) အခိၚ်နူဂယးဂှ် ဒပ်ကံၚ်ဇြဳပၞာန် ထ္ပက်လုပ်ကၠုၚ်ကရောၚ်ပၞာန် ပ္ဍဲတၞၚ်သြဳ နူလ္ပာ်ဗိက် ဇြဟတ် (၈၀)ပြၚ်ၚ်ဂှ် ဂကောံပရေၚ်စဵုဒၞာဒေသပံၚ်ကောံ ဗတိုလဝ် နကဵုမာၚ် (၂)မရ။
ဒပ်ကံၚ်ဇြဳပၞာန် ဒးဒုၚ်ဗတိုက်လဝ်ကဵု ဒပ်စဵုဒၞာဒေသဂှ် ဒှ်ဒပ်စှ်ေကၠုၚ် နူဒပ်အမၠံက် ပ္ဍဲလပါ်ဗာန်လမွတ်တုဲ ကြဴနူတံၚ်ခတိုဟ်လဝ်မာၚ် ပ္ဍဲပွေက်ဂတကရောၚ်ပၞာန်တိုက်တုဲဂှ် ၜိုန်ရလ္ပာ်ကံၚ်ဇြဳပၞာန် ပန်ပှော်ကီုလေဝ် လ္ပာ်ဒပ်ပံၚ်ကောံတအ် ကလေၚ်ပန်ပှ်ောလဝ် ဟၟဲရဂှ် ညးတာလျိုၚ် ပ.က.ဖ မွဲတၠ ဟီုကဵု ဌာန်ပရိုၚ်သြၚ်လောန်တိုၚ်(မ်)ရ။
ကြဴနူဂှ် အခိၚ်ဒးဒုၚ်တံၚ်ခတိုဟ်မာၚ်တုဲ မၞိဟ်ဇီုကပိုက်ဒးချိတ်လဝ် လ္ပာ်ကံၚ်ဇြဳပၞာန်တအ်ဂှ် ပလံၚ်ဗစိုပ် ဏာလဝ်ဗိက် နကဵုကွဳစက်အရာပ်ရဂှ် ဂွံတီကေတ်လဝ်ရ။
အခိၚ်လၟုဟ်ဏံမ္ဂး ဒပ်ကံၚ်ဇြဳပၞာန် ဖျေံလဝ်ဗဒိုပ် ပ္ဍဲဒၞာဲဒးဒုၚ်တံၚ်ခတိုဟ်လဝ်မာၚ်ဂှ်တုဲ ဆက်တိုန်ကၠုၚ် ဂတတေံဟၟဲ ကလေၚ်ဆုတ်တိတ်လေဝ် ဟၟဲဏီရဂှ်ဂွံတီကေတ်ရ။
ပ္ဍဲဂိတုမေ တုဲကၠုၚ်စၟတ်တ္ၚဲ (၇)တေံလေဝ် ပ္ဍဲဂၠံၚ်ကွဳစက် ဗိက်-မဝ်တောၚ် ဗ္ဒာဲကွာန်လတာ ပွိုၚ်ဍုၚ်တၞၚ်သြဳဂှ် ကွဳစက်ကောန်ဒပ်ကံၚ်ဇြဳပၞာန် ဍိုက်ပါဗက်ကၠုၚ် ဒးဒုၚ်တံၚ်ခတိုဟ်လဝ်မာၚ်တုဲ (၅) တၠ ဇီုကပိုက်ဒးလဝ်ဏီရ။
ပရိုၚ်-သြၚ်လောန်တိုၚ်(မ်)
ဗီုရုပ်-Social Media
sanlontai