ပ္ဍဲမွဲကာလသီအဝဵုပွိုၚ်ၜါသၞာံဂှ် ပံၚ်လၟိဟ်ပေါဲဗတိုက် အလုံမွဲကၟိန်ဍုၚ် (၉၃၀၀)ဝါပြၚ် ဒှ်လဝ်

မတ်မလီု – မေ (၁၈)

ပ္ဍဲမွဲကာလပွိုၚ်(၂)သၞာံ ဒပ်ပၞာန်သီအဝဵုကၟိန်ဍုၚ်ဗၟာဂှ် အလုံမွဲကၟိန်ဍုၚ်ပေါဲဗတိုက်ရပ်လွဟ် ပံၚ်လၟိဟ် (၉၃၀၀)ဝါ ပြၚ်က္တဵုဒှ်လဝ်ရဂှ် ISP-Myanmar လလောၚ်တြးလဝ်ပရိုၚ်ရ။

ပ္ဍဲပေါဲဗတိုက်တအ်ဂှ် ပွိုၚ်ပန်ဂိတုသၞာံဏံသ္ကုတ်ကၠာဂှ် ပေါဲဗတိုက်အလုံမွဲကၟိန်ဍုၚ် (၁၄၀၀)ပြၚ် က္တဵုဒှ်လဝ်တုဲ ပ္ဍဲပေါဲဗတိုက် (၅၈)တၟံဂှ် က္တဵုဒှ်လဝ်အကြာ ဂကောံရပ်လွဟ်ကောန်ဍုၚ်အရၚ် (EAOs) ကေုာံ ဒပ်ပံၚ်ကောံ ဒပ်စဵုဒၞာဒေသ (PDF) ကဵု ကံၚ်ဇြဳပၞာန်ရ။

ပေါဲဗတိုက် အကြာဒပ်ပံၚ်ကောံကဵု ကံၚ်ဇြဳပၞာန်က္တဵုဒှ်လဝ်တအ်ဂှ် ကလေၚ်စိုပ်အာ လၟိဟ်ပေါဲဗတိုက်က္တဵု ဒှ်လဝ်ပ္ဍဲသ္ကုတ်လကြဴ ဂိတုဂျောန် သၞာံ ၂၀၂၂ ရဂှ် ဓမံက်ထ္ၜးလဝ် ပ္ဍဲတၚ်ဂၞၚ် ISP-Myanmar ရ။

ပေါဲဗတိုက်က္တဵုဒှ်လဝ် ပ္ဍဲပွိုၚ်ၜါသၞာံပြၚ် (၅၄)တၟံကၠံဂှ် က္တဵုဒှ်လဝ် ပ္ဍဲတွဵုရးကရေၚ်ဂၠိုၚ်အိုတ်တုဲ ပ္ဍဲရးသေတ် ဂါၚ်ဂှ်မ္ဂးနွံ က္တဵုဒှ်လဝ် (၁၂)တၟံကၠံ ဒှ်ဒၞာဲဂၠိုၚ်အိုတ် မရနုက်ကဵုဒုတိယရ။

ပ္ဍဲ ၂၀၅ ပွိုၚ်ဍုၚ် အလုံမွဲကၟိန်ဍုၚ် ပေါဲဗတိုက်က္တဵုဒှ်လဝ်တုဲ ပွိုၚ်ဍုၚ်ဘာပန် တွဵုရးကရေၚ်ဂှ် ပံၚ်လၟိဟ် ပေါဲဗတိုက် စဵုကဵု (၄၅)တၟံကၠံ ဒှ်ဒေသ ပေါဲဗတိုက်က္တဵုဒှ်လဝ် လၟိဟ်ဂၠိုၚ်အိုတ်ရဂှ် ISP-Myanmar ဟီုသ္ဂးလဝ်ရ။

ပ္ဍဲပရေၚ်ဗတိုက်ကဵုက္ၜၚ်ကျာလေဝ် ပ္ဍဲကဵုသၞာံဏံ ပွိုၚ်ပန်ဂိတု ပံၚ်လၟိဟ်ပွိုၚ်ဍုၚ် ဟွံအောန်နူ (၅၆)ပွိုၚ်ဍုၚ် ဒးဒုၚ်ဗတိုက်လဝ်တုဲ လၟိဟ်ဗတိုက် ဟွံအောန်နူ (၄၄၂)ဝါ နွံလဝ်ရဂှ် ဂွံတီကေတ်ရ။

ဟိုတ်နူပေါဲဗတိုက် ကေုာံ ပရေၚ်ဗတိုက်ကဵုက္ၜၚ်ကျာ က္တဵုဒှ်လဝ် မွဲကာလဏံတုဲ ကောန်အရာပ် (၆၉၀)ပြၚ် ဒးချိုတ်လဝ်တုဲ ပရေၚ်ဒဒှ်ကွာန်ပဇြဳဂျဳ ပ္ဍဲပွိုၚ်ဍုၚ်ကဗလူ ရးဒေသသေတ်ဂါၚ် ပြာကတ်အိုတ်ရဂှ် ISP-Myanmar ဓမံက်ထ္ၜးလဝ်ရ။

ကြဴနူဒပ်ပၞာန်သီအဝဵုကၟိန်ဍုၚ်ဗၟာတုဲ ညးဒးဒုၚ်ပ္ကီုပရာပ်ပြိုက်ဂစိုတ်လဝ် (၃၅၀၀)ပြၚ် ဒးချိုတ်လဝ်ရဂှ် ဓမံက်ထ္ၜးလဝ် ပ္ဍဲဂကောံမၚ်မွဲရံၚ်စံၚ်ကောန်ထံၚ်ပရေၚ်ဍုၚ်ကွာန် AAPP ရ။

ပရိုၚ်-သြၚ်လောန်တိုၚ်(မ်)

ဗီုရုပ်-Chin PDF