ပေါဲဗ္တိုက်ဟွံမွဲမွဲသာ် ဟိုတ်နူကံၚ်ဇြဳပၞာန် ဂြာတ်လဝ်မခတိုဟ် အပ္ဍဲပွိုၚ်ဍုၚ်ဗဝ်လခေဝ်ဂှ်ရ ညးဗြဴမွဲတၠ ဒးချိုတ်အာတုဲ မၞိဟ်အာယုက်ဇၞော်ဇၞော်ပန်တၠ ကလိဂွံလဝ်ဝပ်

ဗဝ်လခေဝ်၊ မေ (၁၉)

ကံၚ်ဇြဳပၞာန် ဟိုတ်နူဗ္တိုက်ဂြာတ်လဝ်မခတိုဟ် အပ္ဍဲဝၚ်ကမၠောန် ကေုာံ ပ္ဍဲကွာန်ရးကောန်အရာပ် မၞုံပွိုၚ်ဍုၚ်ဗဝ်လခေဝ်၊ တွဵုရးကရေၚ်ဍာဲတံဂှ်ရ ညးဗြဴမွဲတၠ ချိုတ်အာတုဲ မၞိဟ်အာယုက်ဇၞော်ဇၞော်ပန်တၠ ဇီုကပိုက်ကလိဂွံလဝ်ဝပ်ရောၚ် ညးဒေသတံ ဟီုကဵု ဌာန်ပရိုၚ်သြၚ်လောန်တိုၚ်(မ်) ရ။

ပ္ဍဲဂိတုမေ (၁၇) အခိၚ်နူဂယးပွဳပွူ (၄) နာဍဳဂှ် က္တဵုဒှ်ပေါဲဗ္တိုက်ဟွံမွဲမွဲသာ် ဒပ်ကံၚ်ဇြဳပၞာန် ထောံဗုမ် ဗ္တိုက်လဝ် ကွာန်သဝ်လုမ် ပွိုၚ်ဍုၚ်ဗဝ်လခေဝ် နကဵုက္ၜၚ်ကျာဂျက်ဖိုက်တာရ။ ပေါဲဗ္တိုက် ဟွံမွဲမွဲသာ် ပွကံၚ်ဇြဳပၞာန် မကၠောန်သ္ပဗ္တိုက်ဂြာတ်ဏာလဝ်မခတိုဟ် နကဵုက္ၜၚ်ကျာဂှ်ဝွံ အပ္ဍဲသၞာံဏံဒှ်အလန် တတိယရောၚ်ဂှ်လေဝ် ဂွံတီကေတ်ရ။

ဟိုတ်နူပရေၚ်ဗ္တိုက်ဂြာတ်ဗုမ် နကဵုက္ၜၚ်ကျာဂှ်ရ စမြိုၚ်ဗ္ဒမ်ဂဥုဲကွာန်သဝ်လုမ် ၜါမ ကေုာံ သ္ၚိဒၟံၚ် ၆ မ၊ ဘာလကျာ် ကေုာံ ကၟာဍာ်သုၚ်တံ ဒးလီုလာ်အာလဝ်ရောၚ် PDF ဗဝ်လခေဝ် လလောၚ်ပ္တိတ်လဝ်ရ။

ပ္ဍဲဂိတုမာတ် ၂၃ တုဲကၠုၚ်တေံဂှ်လေဝ် ပ္ဍဲကဵုဒၞါဲကမၠောန် ညးဒေသ နူဗ္ဒါဲကွာန်ဝါန်ဗလ ပွိုၚ်ဍုၚ်ဗဝ်လခေဝ် ဒၞါဲဒှ်ပေါဲဗ္တိုက်ဟွံမွဲတံဂှ် ကံၚ်ဇြဳပၞာန် ကၠုၚ်စိုပ်ပန်ပှော်လဝ် ကဵုဂျက်ဖိုက်တာရ။

ပ္ဍဲပရေၚ်ပန်ပှော်ဏံဂှ် ကောန်အရာပ်မကၠောန်ၜိုတ်ဒၟံၚ်ကမၠောန်ဆု (၅) တၠ ဇီုကပိုက်ကလိဂွံလဝ်ဝပ်တုဲ (၃) တၠ ဒးချိုတ်အာလဝ်ရ။

အပ္ဍဲပွိုၚ်ဍုၚ်ဗဝ်လခေဝ်ဂှ် နူကဵုဒပ်ကံၚ်ဇြဳပၞာန်တံ ထောံကၠုၚ်မခတိုဟ်နူကဵုတရဴကျာဂှ် (၃) ဝါနွံဒၟံၚ်တုဲ နကဵုညးဍုၚ်ကွာန်တံ သွက်ဂွံစဵုဒၞါသၞတရဴကျာဂှ် ပလေဝ်ပလေတ်စထေက်ယျရောၚ် PDF ဗဝ်လခေဝ် ကဵုလဝ်သတိရ။

ပပ္တံနူဂိတုမာတ်ချ် (၁၆) တုဲ ပ္ဍဲဍုၚ်ဗဝ်လခေဝ် ကေုာံ ပွဳပွူဗ္ဒါဲဗ္ဒါဲဂှ် အကြာကံၚ်ဇြဳပၞာန်ကဵု ဒပ်ပံၚ်ကောံ KNDF, KA တံ ပေါဲဗ္တိုက်သ္ကာတ်မြဟ်ကၠုၚ်လဝ်တုဲ ကံၚ်ဇြဳပၞာန်ဂှ် စသုၚ်စောဲကၠုၚ် ပရေၚ်ဗ္တိုက် တရဴကျာတံရ။

အတိုၚ်တၚ်လလောၚ်တြး ဂကောံဇြဟတ်ညးဍုၚ်ကွာန်ကရေၚ်ဍာဲတောတက်ဂှ်မ္ဂး အပ္ဍဲကာလဒပ် ပၞာန်သီအဝဵု ပွိုၚ် (၂) သၞာံဂှ် ကံၚ်ဇြဳပၞာန် ကၠောန်ကၠုၚ်လဝ် ပရေၚ်ဗ္တိုက်တရဴကျာ ပ္ဍဲတွဵုရးကရေၚ်ဍာဲဂှ် နွံကၠုၚ် (၃၆၃) ဝါရ။

ပရိုၚ်−သြၚ်လောန်တိုၚ်(မ်)

ဗီုဓာတ်−Bawlakhe PDF