“ခၞံဗဒှ်ပျးဌာန်ကၠုၚ် သၞောဝ်ဥပဒေ မူဝါဒလၟုဟ်ဏံဂှ် သွက်အာယုက်သၞောတ်တၠအဝဵုပၞာန်ဍေံတအ် ဂွံဂၠိၚ်သ္ၚောဲ ညံၚ်မၞိဟ်ထံက်ဂလာန်ကဵုဍေံတအ် ဂွံဂၠိုၚ်တိုန်။ ညံၚ်မၞိဟ်ဒစဵုဒစးကဵုဍေံတအ် ဟွံဂွံမံက်တိတ်ကၠုၚ် ပ္ဍဲဘာဗ္တောန်လိက် ကၠောန်သ္ပကၠုၚ်ကဵု တၚ်ရန်တၟံၜါဏံဏောၚ် ညာတ်ကေတ်လဝ်ရ”

သၞောဝ်ဥပဒေပရေၚ်ပညာပုဂ္ဂလိက သ္ပတမ်နူ ပရေၚ်ခါန်ကၞက်အ္စာ အ္စာၝောံ ပါလုပ်သီုဇုတ်ဒရံၚ် လိက်ဗ္တောန် ဘာပုဂ္ဂလိကတအ်ဂှ် ဒးပ္တိုန်အခေါၚ်စၟတ်သမ္တီရောၚ်ဂးတုဲ က္ဍိုပ်သ္ကိုပ်ပၞာန် ဂအုပ်သ္ကိုပ် ဗိုလ်ဇၞော်မေန်အံၚ်လှာၚ် ထ္ပက်လဝ်စၟတ်တဲ နကဵုစၟတ်တ္ၚဲ ဂိတုမေ စၟတ်တ္ၚဲ (၁၂)တုဲ လလောၚ်တြးလဝ်ရ။ ပ္ဍဲသၞောဝ်ဥပဒေ အခန်မၞုံ ၁၆ အခန် ၝောံပိုဒ် ၈၂ ပိုဒ်ပါလုပ်ဒၟံၚ်ဂှ်မ္ဂး ဂကောံကောပ်ကာဲ ကံၚ်ဇြဳပၞာန် တအ်ဂှ် ပိုၚ်ခြာစၟတ်သမ္တီ အပိုၚ်အခြာဘာပုဂ္ဂလိကကီု၊ ဒးပ္တိုန်အခေါၚ်စၟတ်သမ္တီအာစာဘာကီု၊ ပရေၚ်ပ္တိတ်ကဵုအခေါၚ်စၟတ်သမ္တီ ကုအ္စာဘာကောန်ဍုၚ်သ္အာၚ်ကီု၊ ဆက်ကဵုအာယုက်ကီု၊ ပါဲတးကီု တအ်ဂှ် သ္ပကဵုအခေါၚ်မာန်တုဲ တးပါဲလေဝ်တးပါဲမာန် ပါလုပ်ဒၟံၚ်ရ။

သၞောဝ်ဥပဒေပရေၚ်ပညာပုဂ္ဂလိကဂှ် မုဟိုတ်ကံၚ်ဇြဳပၞာန်ခၞံဗဒှ်ပျးဌာန်လဝ်ရော၊ သၞောဝ်ဥပဒေဏံဂှ် ပ္ဍဲလ္တူအခေါၚ်ဗ္တောန်ပညာဗၠးၜး ၜိုတ်ဂလိုၚ်လဵု ဇီုကပိုက်ကၠုၚ်မာန်ရော။ စပ်ကဵုကအကာဲအရာဏံတုဲ ဆက်စၠောံသၟာန်သွဟ်လဝ်ကဵု အ္စာနောၚ်ဇျှော ညးလုပ်ဂကောံ သမဂ္ဂကွးဘာ ကောန်ကမၠော နပရေၚ်ပညာသ္ဇိုၚ် (BEWU) ရ။

-ကိုပ်ကၠာအိုတ်ဏံ သၞောဝ်ဥပဒေပရေၚ်ပညာပုဂ္ဂလိက ကံၚ်ဇြဳပၞာန်ဂှ် ဗီုလဵုညာတ်ကေတ်ရော။ ပ္ဍဲလ္တူဏံ သ္ၚဳဂၠိပ်ကဵုညိ။

သၞောဝ်ဥပဒေကံၚ်ဇြဳပၞာန်ခၞံပျးဌာန်လဝ်ဂှ် ဂွံဗှ်ကေတ်လဝ်ရ။ ပရေၚ်ပညာပုဂ္ဂလိကဟီုဂှ် ဗီုပြၚ်လဵု ပိုၚ်ခြာလဝ်ရော။ ဘာပရေၚ်ပညာပုဂ္ဂလိကဟီုဂှ် ပိုၚ်ခြာလဝ် ဗီုပြၚ်လဵုရော။ ညးခၞံပ္တိုန်ဘာပုဂ္ဂလိက ဟီုဂှ် မၞိဟ်ဗီုလဵုရောဟီုဂှ် ပရေၚ်ပိုၚ်ခြာ၊ ဌာနဝန်ဇၞော်ဟီုဂှ် ဗီုပြၚ်လဵုရောဟီုဂှ် စပ်ကဵုအရာတအ်ဏံတုဲ ဂွံဗှ်ကေတ်လဝ် ဒကုတ်ပိုဒ်ကံၚ်ဇြဳပၞာန်ခၞံဗဒှ်ပျးဌာန်လဝ်ဂှ်ရ။ ဗီုအဲကၠိုဟ်ကေတ်လဝ်ဂှ်တှ်ေ အခေါၚ် ဗၠးၜးပရေၚ်ပညာပုဂ္ဂလိက၊ ပရေၚ်ပညာပုဂ္ဂလိက ကံၚ်ဇြဳပၞာန်ပျးဌာန်လဝ်ဂှ် ဒှ်ဂကူသၞောတ် ပရေၚ်ပညာ ဗဟဵုထိၚ်ဒက်တေၚ်ဂြတ်မွဲ ဗီုဏံ ညာတ်ကေတ်ရ။ အခေါၚ်ဗၠးၜးပရေၚ်ပညာသီုဖအိုတ်ဂှ် ဌာနဝန်ဇၞော်ရ ထိၚ်ဒက်အာဖအိုတ်ဏောၚ်၊ ဌာနဝန်ဇၞော်ရ ဒးကၠောန်သီုဖအိုတ်ဏောၚ်ဟီုဂှ် တၚ်ပိုၚ် ခြာလဝ်ဂှ် ဟွံဂွံညာတ်ကေတ်ရ။ မူဝါဒပရေၚ်ပညာ ဆက်အာဒၟံၚ်ကဵု လညာတ်ပညာခေတ်လဇုဲလဇ ဗီုအခိၚ်ကၠာတေံရဏောၚ် ပိုဲကၠိုဟ်ကေတ်လဝ်ရ။

-သၞောဝ်ဥပဒေပရေၚ်ပညာကံၚ်ဇြဳပၞာန်ဂှ် ပရေၚ်ဇီုကပိုက်ကၠုၚ် လ္တူကဏ္ဍပရေၚ်ပညာ ဗီုပြၚ်လဵု နွံကၠုၚ်မာန်ရော။ ပ္ဍဲဍာ်ဇမၠိၚ်ဂှ် တၠုၚ်လအာကဏ္ဍပရေၚ်ပညာ အကာဲအရာလဵု ဆက်ဒှ်ကၠုၚ်မာန်ရော။

ပ္ဍဲဍာ်ဇမၠိၚ်ဂှ်တှ်ေ သွက်ဂွံဒှ်ကၠုၚ်မာန် နွံၜါဂကူဓဝ်ရ။ မွဲဂှ်တှ်ေ အခေါၚ်ဗၠးၜးပရေၚ်ပညာဟီုဂှ် ပရေၚ်ပညာပိုဲဂှ် မွဲဂကောံ မွဲတၠဓဝ် ဒှ်အရာထိၚ်ဒက်လဝ်ထေက် ဟွံသေၚ်ပုဟ် ပိုဲညာတ်ကေတ်ရ။ ပ္ဍဲပရေၚ်ပညာဂှ် အခေါၚ်ဗၠးၜး ဒးနွံဏောၚ်။ ပ္ဍဲပရေၚ်ပညာဂှ် ဒးကိတ်ညဳကဵု သၞောတ်ဗ္ၜတ်အခေါၚ်အရာ မၞိဟ်ဏောၚ်။ ပရေၚ်ပညာဂှ် ဒှ်အရာမွဲဂကောံ မွဲတၠဓဝ်သီဗ္ၜောဝ်ကေတ်လဝ် ဂွံဟွံသေၚ်ပုဟ်။ ပရေၚ်ပညာဏံ မၞိဟ်သိုက်လောဲ မွဲဂကောံဓဝ်သီဗ္ၜောဝ် ကေတ်လဝ်ဂွံလေဝ် ဟွံဂွံပုဟ်။ ပရေၚ်ပညာဂှ် ဒးဒှ်ပရေၚ်ပညာဗၠးၜးပေၚ်ၚ်ဏောၚ်။ ဒးဒှ်သၞောတ် ပရေၚ်ပညာ တၞီလုပ်သီုညးဖအိုတ် ကဆံၚ်တုပ်သၟဟ်ဏောၚ် ပိုဲပတှ်ေကေတ်လဝ်ရ။

ပ္ဍဲမူဝါဒပရေၚ်ပညာဖေတ်ဒရေဝ်ဒဳမဝ်ကရေဇြဳ NUCC သ္ပလဝ်ဒ္တန် တုဲကၠုၚ်ဟွံလအ်ဏီဏံဂှ် စပ်ကဵုပရေၚ်ပညာပုဂ္ဂလိကတုဲ ပျးဌာန်ခၞံလဝ် အခန်(၉)အခန်ရ။ ပိုဲဂှ်တှ်ေ ပတှ်ေစှ်ေစိုတ် အတိုၚ်မူဝါဒ ပရေၚ်ပညာပါလုပ်ဒၟံၚ်ပ္ဍဲဖေတ်ဒရေဝ်ဒဳမဝ်ကရေဇြဳဂှ်ရ။ ပရေၚ်ပညာကံၚ်ဇြဳပၞာန် ပျးဌာန်လဝ်ဂှ် လကြဴ မုဒှ်ကၠုၚ်ရောတှ်ေ အခေါၚ်ဗၠးၜးပရေၚ်ပညာ သုန်ဂြာံကၠုၚ်ဏောၚ်။ ပရေၚ်ဒဳမဝ်ကရေဇြဳ သုန်ဂြာံကၠုၚ် ဏောၚ် ပိုဲကၠိုဟ်ကေတ်လဝ်ရ။ အဓိကဂှ် ပရေၚ်ပညာဟီုဂှ် ဒးဒှ်အရာဗွိုၚ်ဒဳမဝ်ကရေဇြဳ အဇာဍောတ် မွဲဏောၚ်။ အရာဗီုဏံဂှ် ယဝ်ရဖျေံထောံတၚ်ပျးဌာန်၊ မူဝါဒပရေၚ်ဗဟဵုထိၚ်ဒက်ဇၞော်ကဵုဇြဟတ် ဏောၚ်တှ်ေသၞောတ်ပရေၚ်ပညာပိုဲဂှ် ပရေၚ်ပညာ ဍိက်ဂၠုဲပၞာန်၊ သၞောတ်ပရေၚ်ပညာဗဟိုဝ် ထိၚ်ဒက် ဇၞော်ကဵုဇြဟတ်ရ ဆက်နွံအာပၠန်ဏောၚ်ဂှ် ပိုဲညာတ်ကေတ်ရ။

-ပ္ဍဲကဵုသၞောဝ်ဥပဒေပရေၚ်ပညာပုဂ္ဂလိကကံၚ်ဇြဳပၞာန်ဂှ်တှ်ေ စတမ်နူကဵုဇုတ်ဓရံၚ်ဗ္တောန်ဒှ်တမ် ဒးဂွံအခေါၚ်နူဍေံတအ်မှ ဂွံအခေါၚ်ဗ္တောန်ပညာဏောၚ်တှ်ေ ပ္ဍဲလ္တူဏံ ဗီုလဵုညာတ်ကေတ်ရော။

ဖံက်ပ္ကဝ်ဒၟံၚ်အခေါၚ်ဗ္တောန်ပညာဗၠးၜး မံက်က်ထေၚ်ၚ်ရဂှ် အဲညာတ်ကေတ်ရ။ တုဲမွဲတၚ်ပၠန်ဂှ် ဇုတ်ဓရံၚ်ဍေံတအ်ပျးဌာန်လဝ်တအ်၊ ဍေံတအ်ကဵုအခေါၚ်မှ ဂွံဏောၚ်တှ်ေ ဘာပရေၚ်ပညာ ကောန်ဍုၚ်အရၚ်တအ်၊ သၞောတ်ပရေၚ်ပညာကောန်ဍုၚ်အရၚ်တအ်ဂှ် ဍေံတအ်ပ္တိတ်ဒၟံၚ်ဇြဟတ် သွက်ဂွံထိၚ်ဒက်ရဏောၚ်ဂှ် အဲညာတ်ကေတ်ရ။ ဇုတ်ဓရံၚ်ဗ္တောန်တအ်ဂှ် ယဝ်ရအာအတိုၚ် မူဖေတ် ဒရေဝ်ဏောၚ်တှ်ေ ဗက်ကဵုဒေသမဆေၚ်စပ်ကဵုပိုဲတုဲ ဒုၚ်သ္ဇိုၚ်ကဵုဘာသာကောန်ဍုၚ်အရၚ်တုဲ ဒးကၠောန်ပရေၚ်ဗ္တောန်ဏောၚ်ဟီုဂှ် ပါလုပ်ဒၟံၚ်ရ။ ကံၚ်ဇြဳပၞာန်ဂှ် ဍေံတအ်ကဵုအခေါၚ်မှကၠောန် ဂွံဏောၚ်ဟီုဂှ် အရာဏံ ဒှ်အရာ ဟွံထေက်ကဵုဒှ်ရ။ အရာဏံဂှ် ပ္ဍဲဍာ်ဇမၠိၚ်တှ်ေ သာတုဲပရေံဂှ် ကောန်ဍုၚ်အရၚ်တအ်ကဵု ကံၚ်ဇြဳပၞာန်ဍေံတအ်ဂှ် အကြာဏံဂှ် စပ်ကဵုပရေၚ်ပညာတုဲ ပရေၚ်တၞဟ်ခြာ ဇၞော်ဇၞော်ဒှ်ကၠုၚ်ဏောၚ် ပတှ်ေကေတ်လဝ်ရ။ ကောန်ၚာ် နွံဒၟံၚ်သၟဝ်တဲကံၚ်ဇြဳပၞာန်တအ်ဂှ် ရုဲစှ်ဘာကံၚ်ဇြဳပၞာန်တုဲ ကောန်ၚာ်ဒးတိုန်တအ်ဂှ် အနာဂတ်ဍေံတအ် တၠုၚ်လအာဍေံဟွံခိုဟ်ပုဟ်။ အနာဂတ်ကွးဘာ ဟွံဂွံဒုၚ်ဗ္တောန်လဝ် လညာတ်ဗၠးဗၠးၜးၜးတအ်ဂှ် ဒှ်အရာဒးဇြိုၚ်စိုတ်ရ။

-မုဟိုတ်ကံၚ်ဇြဳပၞာန်ဂွံပျးဌာန်ခၞံဗဒှ်ကၠုၚ် သၞောဝ်ဥပ​ဒေပရေၚ်ပညာပုဂ္ဂလိက ညာတ်ကေတ်ရော။

ပ္ဍဲကဵုအလဵုအသဳတၠအဝဵုပၞာန်တအ်ဂှ် စပ်ကဵုပရေၚ်ပညာတုဲ တၚ်ချပ်ဗ္စာ နွံၜါဂကူရ။ သွက်ဂွံလွဳၜံၚ်ပ္တိတ်ကဵု ဘာထံက်ဂလာန် သၞောတ်တၠအဝဵုပၞာန်ဂှ် မၞိဟ်ပၠန်ဂတးဒၟံၚ်ကဵုဍေံတအ်၊ မိက်ဂွံဟီုဂှ် ဒးဂွံအခေါၚ်ဗ္တောန်ပညာ ဗၠးဗၠးၜးၜးဏောၚ်။ ယဝ်ရ ကွးဘာတအ် ဂွံအခေါၚ်ဗ္တောန် ပရေၚ်ပရောသၞောတ်ဗ္ၜတ်ဒဳမဝ်ကရေဇြဳ၊ ပရောပရာအခေါၚ်အရာမၞိဟ်၊ ယဝ်ရဂွံဗ္တောန်ပရောပရာ တအ်ဏံတှ်ေ ကွးဘာဂွံကၠုၚ်လညာတ် သွက်ဂွံပၠန်ဂတးကဵုဍေံတအ် မံက်တိတ်ကၠုၚ်မာန်ဏောၚ်လေဝ်။

တၠအဝဵုပၞာန်တအ်ဂှ် ပရေၚ်ပညာဍေံဆိုက်လုပ်ဂှ် နွံဒၟံၚ်ဗီုပြၚ်ၜါဂကူရ။ မွဲဂကူဂှ်တှ်ေ ညံၚ်မၞိဟ်ထံက် ဂလာန်ကဵု သၞောတ်တၠအဝဵုပၞာန်ဍေံတအ် ဘာထံက်ဂလာန်ကဵုဍေံတအ် ဂွံမံက်တိုန်ကၠုၚ်၊ ညံၚ်မၞိဟ်ဒစဵု ဒစးကဵုဍေံတအ် ဘာဒစဵုဒစးကဵုဍေံတအ် ဟွံဂွံမံက်တိတ်ကၠုၚ်ကီု ဍေံတအ်ရေၚ်တၠုၚ်ကၠောန်ဒၟံၚ်ကဵု မူဝါဒ ၜါဂကူဏံရ။ ခၞံဗဒှ်ပျးဌာန်ကၠုၚ် သၞောဝ်ဥပဒေ မူဝါဒလၟုဟ်ဏံဂှ် သွက်အာယုက်သၞောတ် တၠအဝဵုပၞာန်ဍေံတအ် ဂွံဂၠိၚ်သ္ၚောဲ ညံၚ်မၞိဟ်ထံက်ဂလာန်ကဵုဍေံတအ် ဂွံဂၠိုၚ်တိုန်။ ညံၚ်မၞိဟ်ဒစဵုဒစးကဵု ဍေံတအ် ဟွံဂွံမံက်တိတ်ကၠုၚ် ပ္ဍဲဘာဗ္တောန်လိက် ကၠောန်သ္ပကၠုၚ်ကဵု တၚ်ရန်တၟံၜါဏံဏောၚ် ညာတ်ကေတ်လဝ်ရ။

-အလန်လကြဴအိုတ်ဏံစပ်ကဵသၞောဝ်ဥပဒေပရေၚ်ပညာပုဂ္ဂလိတုဲ မုမိက်ဂွံထပ်ဟီုဗပေၚ်နွံရော။

သၞောဝ်ဥပဒပရေၚ်ပညာပုဂ္ဂလိက ကံၚ်ဇြဳပၞာန်ခၞံဗဒှ်ပျးဌာန်လဝ်ဂှ် ဒှ်သၞောဝ်ဥပဒေပရေၚ်ပညာ ဒုၚ်လဝ်သ္ဇိုၚ်ကဵု လညာတ်တြေံတြဟ် ပတေၚ်ဂြတ်လဝ် ပရေၚ်ဗဟဵုထိၚ်ဒဝ်ရဂှ် ညာတ်ကေတ်ရ။ သွက်ဂွံက္လိဂွံသၞောတ်ပရေၚ်ပရေၚ်ပညာဖေတ်ဒရေဝ်ဒဳမဝ်ကရေဇြဳဂှ် ဘာပုဂ္ဂလိကသၟဝ်တဲ ကံၚ်ဇြဳပၞာန်ကဵုဒှ် ဘာအလဵုအသဳကဵုဒှ် ဘာလဵုလေဝ် ဂွံက္လိဂွံ ပရောပရာဒဳမဝ်ကရေဇြဳကဵု ဖေတ်ဒရေဝ် မာန်ဟွံသေၚ်ပုဟ်။ ဒဳမဝ်ကရေဇြဳကဵုဖေတ်ဒရေဝ်ဂှ် စသုန်ဂြာံကၠုၚ် ပ္ဍဲဘာဗ္တောန်လိက်တအ်တုဲ ညံၚ်ဂွံသုန်ဂြာံလေဝ် စကၠောန်ကၠုၚ်ဒၟံၚ်ယျဂှ် ပိုဲညာတ်ကေတ်ရ။