ညးဒေသ ပွိုၚ်ဍုၚ်မုမ် မွဲလက်ပြၚ် ဒးဂြိပ်ဒဴဒၟံၚ် သီုအလုံမွဲကွာန်

မုမ်၊ မေ(၂၁)

ဟိုတ်နူဒပ်ကံၚ်ဇြဳပၞာန် ပန်ဖျေံဒၟံၚ်လွဟ်ဇၞော် ပ္ဍဲကွာန်မၞုံပွိုၚ်ဍုၚ်မုမ် တိဍာ်အုပ်ဓုပ်ကဝ်ဒူလေဝ် ဒပ်မဟာ(၂) အဆက်ဟွံပိုတ်သ္ကုတ်တုဲ ကောန်အရာပ်(၃)တၠ ပါလုပ် သီုကောန်ၚာ် (၁)တၠ ဇီုကပိုက်ဒးလွဟ်ဇၞော် ဒးလဝ်ဘဲဝပ်ချိုတ်လဝ်တုဲ ညးဒေသ(၁၀၀၀၀)ပြၚ် ဒးဂြိပ်ဒၟံၚ် သီုအလုံမွဲကွာန်ရဂှ် ဗဟဵု KNU လလောၚ်တြးလဝ် ပရိုၚ်ရ။

ဂိတုမေ တုဲကၠုၚ် စၟတ်တ္ၚဲ (၁၈) အခိၚ်နူဂယး (၈)နာဍဳဂှ် ဒပ်ပံၚ်တောဲ ကံၚ်ဇြဳပၞာန် ခမရ(၅၉၉)၊ ခမရ(၅၉၀)၊ ၝောံဒပ် (၄၄) ကေုာံ ခရလ (၈၄)တအ် သွက်ဂွံလုပ်ကၠုၚ် ပ္ဍဲကွာန်သဝေ၊ ကွာန်ကျောန်တဝ် မၞုံပွိုၚ်ဍုၚ်မုမ် KNU ခရိုင်ညံင်လေဝ်ပေန်ဂှ် ပန်ဖျေံလဝ်လွဟ်ဇၞောန် ပ္ဍဲကွာန် လၟိဟ်(၂၅) မ ဟွံပိုတ်သ္ကုတ်ရဂှ် ဓမံက်ထ္ၜးလဝ် ပ္ဍဲတၚ်လလောၚ်တြးရ။

သ္အာၚ်နူဂှ်ပၠန် ပ္ဍဲကွာန်ညံၚ်ပေန်တာလေဝ် ထပ်ပန်ဖျေံလဝ်လွဟ်ဇၞော် (၅)မ ပၠန်ရဂှ် တၚ်လလောၚ်တြးဂှ် ဟီုသ္ဂးလဝ်ရ။

ဟိုတ်နူကံၚ်ဇြဳပၞာန် ပန်ဖျေံလွဟ်ဇၞော်ဗီုလၟုဟ်ဏံတုဲ ညးဍုၚ်ကွာန်မံၚ်တန်တဴဒၟံၚ် ပ္ဍဲကွာန်တအ် ဖေက်လကိုတ်တုဲ ဃောဂြိပ်ဒဴဒၟံၚ် ကောန်ၚာ်အာယုက် (၁၄)သၞာံ (၁)တၠ ဇီုကပိုက်ဒးလွဟ်ဇၞော် ဒးချိုတ်အာလဝ်တုဲ ညးဗြဴမွဲတၠကဵု ညးတြုံ(၁)တၠလေဝ် ဇီုကပိုက် ဒးလဝ်ဘဲရဂှ် KNU ဟီုသ္ဂးလဝ်ရ။

ညးဇီုကပိုက်ဒးလဝ်ဘဲဝပ်တအ်ဂှ် ဒးပလံၚ်ဗစိုတ်ကဵုလဝ် ပ္ဍဲရုၚ်ဂဥုဲ ၊ ဗ္ဒမ်ဂဥုဲကြပ်ညောန် ဒးလွဳလွတ်ကဵုဒၟံၚ်တုဲ ပ္ဍဲပရေၚ်ပန်ပှ်ေဏံ ဘာလကျာ် ဒေသဂှ် (၁)ဘာ ကေုာံ သ္ၚိဒၟံၚ် (၁)မ ဇီုကပိုက်ဒးလဝ်လွဟ်ဇၞော်တုဲ ဒးလီုလာ်အာလဝ်ကီု ဂၠဴမွဲလေဝ် ဒးချိုတ်အာလဝ်ရဂှ် လလောၚ်တြးလဝ်ရ။

ဟိုတ်နူပရေၚ်ပန်ပှော်လွဟ်ဇၞော်တုဲ ညးဍုၚ်ကွာန် နူကွာန်သဝေ၊ ကွာန်ကျောန်တဝ်တအ် ဖေက်လကိုတ်တုဲ ဒးဂြိပ်ပါဲဓလေတ်ဒၟံၚ် သီုအလုံမွဲကွာန်တုဲ ပ္ဍဲအခိၚ်ဇိုၚ်သဝ်တ္ၚဲ ဒပ်ပံၚ်တောဲကံၚ်ဇြဳပၞာန် လုပ်ကေတ်လဝ်ဒၞာဲ ပ္ဍဲကွာန်တုဲ စဵုကဵုအခိၚ်လၟုဟ် ဖျေံလဝ်သ္ဇိုၚ် မံၚ်ဒၟံၚ်ရဂှ် ဓမံက်ထ္ၜးလဝ်ရ။

ဟိုတ်နူဒပ်ပံၚ်တောဲကံၚ်ဇြဳပၞာန် ပန်ဖျေံလဝ်လွဟ်ဇၞော်တုဲ ညးဒေသကောန်ဍုၚ်ကွာန် နူမပ္တံကဵုကွာန်သဝေ၊ နှောၚ်ကုမ်၊ တောၚ်သု၊ ကျောန်တဝ်၊ ညံၚ်ပေန်ဇြုက်၊ မျောၚ်ရိုဝ်ဂျဳ၊ ယွာဟောၚ်၊ တာပ်ကုမ် ကေုာံ ညံၚ်ပေန်တာ မၞုံပွိုၚ်ဍုၚ်မုမ် KNU (၉)ကွာန် (၁၃၉၉၁) တၠတအ် ဒးဂြိပ်ဒဴပါဲဓလေတ်ဒၟံၚ် ပ္ဍဲဒၞာဲဗၠးဘဲရဂှ် KNU လလောၚ်တြးလဝ်ရ။

ပ္ဍဲဂိတုမေ စၟတ်တ္ၚဲ (၁၀)တုဲကၠုၚ်တေံလေဝ် အကြာဒပ်ပံၚ်တောဲကံၚ်ဇြဳပၞာန် ထ္ပက်လုပ်ကၠုၚ်ပၞာန် ပ္ဍဲပွိုၚ်ဍုၚ်မုမ်ကဵု ဒပ်ပံၚ်ကောံ KNLA တအ် ပေါဲဗတိုက်က္တဵုဒှ်လဝ် ပ္ဍဲကွာန်ညံၚ်ပေန်တာတုဲ ဒပ်ကံၚ်ဇြဳပၞာန်စံၚ်ဂစိုတ်လဝ် ကောန်အရာပ်ညးဍုၚ်ကွာန် (၂၀)တၠ ပါလုပ်သီုကောန်ၚာ် ကွာန်ညံၚ်ပေန်တာ (၄)တၠ၊ ညးဗြဴ(၁၁)တၠ ရဂှ် ဂွံတီကေတ် အတိုၚ်တၚ်လလောၚ်တြး KNU ရ။

ပရိုၚ်-သြၚ်လောန်တိုၚ်(မ်)

ဗီုရုပ် – KNU