မၞိဟ်ခတှ်သှ်ေဒၟံၚ်တံဂှ် ဟွံပ္တိတ်ကဵု သြန်ဓလေံသြောံကသီုဂှ်ရ သၟာဗ္ၚတံ ဒးဂဗဒၟံၚ်အခက်အခုဲ

မတ်မလီု၊ မေ (၂၁)

တိုက်သြန်ဖောအ်ဗြေဝ်ဝါဗ္ၚဍုၚ်ဗၟာ သၟဝ်တဲကံၚ်ဇြဳပၞာန်ဂှ် ခတှ်သြန်ဓလေံ ခရိတ်ရပ်စပ်ပရေၚ် တဵုလွဳကၠာတေံဟွံမွဲမှဟေၚ် ခရိတ်တဵုလွဳကသီုဏံ ပ္တိတ်ကဵုအာသြန်ဓလေံဏောၚ် ဒၟါနူအပိုၚ်အခြာသာ်ဏံဂှ်ရ သွက်ဂွံတဵုသြောံကသီုဂှ် ဒးဂဗဒၟံၚ်အခက်ရောၚ် သၟာဗ္ၚတံ ဟီုကဵု ဌာန်ပရိုၚ်သြၚ်လောန်တိုၚ်(မ်) ရ။

သၟာဗ္ၚဂမၠိုၚ်ဝွံ ကြဴနူဒပ်ပၞာန်သီအဝဵုတုဲ ကပေါတ်တမ်ပ္ဍဲဒၞါဲတဵုလွဳတံဂှ် ၚုဟ်သၠုၚ်တိုန်ကၠုၚ် ဗ္ဒါဲ (၃) ဆပြၚ်ကီု၊ ခရိတ်ဇိက်ထဲတဵုလွဳတံ ဇၞော်သၠုၚ်ဒၟံၚ်ဂှ်ကီု၊ သီုကဵုခရိတ်အိုတ်နာနာ သၠုၚ်တိုန်ဒၟံၚ် ဂၠိုၚ်ကဵုဆဂှ်ရ သွက်ဂွံတဵုသြောံကသီုဂှ် ဒးဂဗဒၟံၚ်အခက်ရ။

မွဲလ္ပာ်ပၠန်ဂှ် သၟာဗ္ၚဂမၠိုၚ်ဝွံ ပ္ဍဲရာသဳတုဲကၠုၚ်တေံဂှ် ဒၟါနူစုတ်ဝါဲဟွံမာန်ဂှ်ရ ဒမြိပ်တိတ် ယအ်စှ်ေကၠုၚ်တုဲ သ္ပဟိုတ်ကဵုရာသဳဥတု ကေုာံ အန္တရာယ်စၟစၟန်တံတုဲလေဝ် ကလိဂွံသြောံ ဟွံမွဲဂှ်ရ ဟောံဗြံတုဲ သွက်ဂွံကလေၚ်လေဲဂှ် ဒှ်ဒၟံၚ်အခက်အခုဲရ။

ညးတဵုလွဳသြောံမွဲတၠဂှ် အကြာအခက်အခုဲမက္တဵုဒှ်ဒၟံၚ်လၟုဟ်ဏံဂှ် ယဝ်ရဟွံကလိဂွံသြန် ဓလေံကံၚ်ဇြဳပၞာန်တံဂှ်မ္ဂး နကဵုသၟာဗ္ၚလ္ၚဵုတံ တဵုအာမာန်ဟွံသေၚ်ရတုဲ လ္ၚဵုတံဂှ်လေဝ် ဇက်ကေတ်လှုဲ မ္ၚးဏံတုဲ ဒးတဵုလွဳဂှ်ရ အခက်အခုဲဗွဲမဂၠိုၚ်ဂၠေၚ် က္တဵုဒှ်ကၠုၚ်မာန်ရောၚ် ဟီုရ။

“ဟွံဂွံသြန်ဓလေံတိုက်သြန်ဂှ်ပုဟ်ဟီုမ္ဂး ဂြောဝ်ဂတာဂမၠိုၚ်ဂှ် အခက်အခုဲနွံအာတၟာဂလိုၚ်ဏောၚ်။ ချပ်ဖန်ဗဒှ်တုဲ ဒးကၠောန်ဏောၚ်။ လ္ၚဵုတံဂှ်ပၠန်လေဝ် တဵုလွဳဟွံမာန်အိုတ်ပုဟ်။ လ္ၚဵုတံဂှ်လေဝ် ဝါဗ္ၚတံဂှ် ဒးကၠဟ်လဝ်အဂှ်ရ။ လ္ၚဵုဂှ်ပၠန် ဒးဂၠါဲကေတ် နကဵုအိက်သြန်၊ အလဵုအသဳဂှ် ကဵုဒၟံၚ်နကဵုအိက်သြန်အောန်န်။ ပိုယ်တံ ဂၠါဲမ္ၚးဏံဂှ်တှ်ေ အိက်သြန်ဂှ်ဂၠိုၚ်ဒၟံၚ်ဏောၚ်။ ဂွံသြန်ဓလေံတှ်ေ အရာမၞုံပၟိက် ဝါဲတံကဵုဒှ်၊ ဂဥုဲဂစတ်တံကဵုဒှ်၊ ဝါဲဓာတ်တံကဵုဒှ် ရာန်ဂွံရ။ လၟုဟ်ဂှ် ဒးသုၚ်စောဲစုၚ်လေၚ်တုဲ အခက်အခုဲဂှ် နွံကၠုၚ်သီုဖအိုတ်ရ၊ ပိုယ်တံ မိက်ဂွံဂွံဂှ်တှ်ေ လှုဲအလဵုအသဳဏောၚ်၊ အလဵုအသဳဂှ်လေဝ် လှုဲကေတ်လဝ်တံဂှ် ဟွံပြေမ္ဂး ညးဟွံကလေၚ်ကဵုပုဟ်၊ အရာရာအိုဿီုဂှ် အခက်အခုဲဖအိုတ်ရ” သာ်ဝွံ သ္ဂးရ။

သ္အာၚ်နူဂှ်ပၠန် ဟိုတ်နူခတှ်သှ်ေဒၟံၚ်တုဲ ဟွံဂွံသြန်ဓလေံမ္ဂး နကဵုသၟာဗ္ၚလ္ၚဵုတံ တိဨကတဵုလွဳတံဂှ် ဒးဖအောန်တဵုအာဏောၚ်တုဲ နကဵုသၟာဗ္ၚ တမ်ရိုဟ်အောန်တံ ဆၜိုတ်ဒှ် တဵုလွဳကၠုၚ်မ္ဂး ပ္ဍဲကဵုသၞာံဏံလေဝ် ဒမြိပ်သြောံတိတ် စှ်ေကၠုၚ်တီတီမာန်ဏောၚ်ဂှ် သၟာဗ္ၚတံ သ္ဂးအိုတ်ရ။

သၟာဗ္ၚတဵုသြောံမွဲတၠဂှ်လေဝ် ကလေၚ်လေဲခတှ်ကၠာတေံဟွံမာန်ဂှ်ဝွံ ပ္ဍဲအရာတဵုလွဳသြောံတံဂှ် ခရိတ်အိုတ်ဇၞော်သၠုၚ်တုဲ ဒးဖအောန်ကၠောန်ၜိုတ်ကၠုၚ်ဂှ်ရ ဒမြိပ်တိတ်အောန်တုဲ လေဲခတှ်ဟွံမာန်တုဲ နကဵုဂြောဝ်ဂတာလ္ၚဵုတံမ္ဂး ဂွံဒၟံၚ်ၜိုတ်စဓဝ်ဂှ်ရ ဒှ်အခက်အခုဲတုဲ ခတှ်ဒးသှ်ေဒၟံၚ်ရောၚ်ဂှ် ဟီုရ။

“မူဟိုတ်လေဲဟွံမာန်ရောဟီုတှ်ေ ဇကုဂှ် ဂ္စါန်ကၠောန်ဟွံမာန်တုဲ ဖအောန်ဖျေံလဝ်ရ။ မူဟိုတ်ရောဟီုတှ်ေ ကောန်ကလောန်အောန်၊ ကောန်ကလောန်က္ဍၚ်တုဲ ကပေါတ်တမ်တံဂှ် ၚုဟ်က္ဍၚ်ကၠုၚ်ဂှ်ရ လှုဲဂှ်ဗက်ဟွံမာန် ဇကုဂှ်လေဝ် ဂွံတှ်ေတုဲ ကၠောန်ကၠုၚ်ဗီုပြၚ်ဏံဂှ်ရ သြောံဒှ်ဒှ်၊ ၜဲဒှ်ဒှ် အခိၚ်ဍေံတံတိတ်ဗီုဏံဂှ် မၞိဟ်ကၠောန်ခိုဟ်ဟ်ကဵု မၞိဟ်ကၠောန်ဆဒှ်ဗီုပြၚ်ဓဝ်တံဂှ် ဒမြိပ်တိတ်ဍေံ ဟွံတုပ်ပုဟ်၊ သြန်လုပ်လေဝ် ကလေၚ်ကွာအာရ။ ခတှ်ကၠာတေံဂှ်လေဝ် ကလေၚ်လေဲဟွံမာန်ပုဟ်။ အကြာဏံ သ္ၚိကၟိန်ကောန်ဇာတ်ဂၠိုၚ်တံဂှ်မ္ဂး စအာအိုတ်အာဂှ်ရ မုမှဟွံသှ်ေရတုဲ ခတှ်တံဏံဂှ် လေဲဟွံမာန်ဒှ်အာရ” သာ်ဝွံ သ္ဂးရ။

သ္အာၚ်နူဂှ်ပၠန် ကံၚ်ဇြဳပၞာန်ဝွံ သြန်ဓလေံအရပ်စပ်ပရေၚ်တဵုလွဳတံဂှ် မွဲဨကမ္ဂး ပ္တိတ်ဓလေံကဵုဒၟံၚ် (၁၅၀၀၀၀) ဒ္ကေဝ်ဓဝ်ဂှ်ရ ဒၟါနူၚုဟ်ကပေါတ်တမ်က္ဍၚ် မက္တဵုဒှ်ဒၟံၚ်လၟုဟ်ဂှ်ရ ရုမ်မ်ဂပ်ပ်လေဝ်ဟွံမွဲတုဲ နကဵုသၟာဗ္ၚလ္ၚဵုတံဂှ်ပၠန်လေဝ် ဒးကလေၚ်ဂၠေံကေတ်မ္ၚးဏံပၠန်ဂှ်ရ လ္တူခတှ်ဂှ် ထပ်တုဲဒှ်ဒၟံၚ်ခတှ်ပၠန် သာ်ဝွံ ဂွံတီကေတ်ရ။

မွဲလ္ပာ်ပၠန်ဂှ် တိုက်သြန်ဖောအ်ဗြေဝ်ဝါဗ္ၚဍုၚ်ဗၟာ သၟဝ်တဲကံၚ်ဇြဳပၞာန်ဂှ် နကဵုသၟာဗ္ၚဂမၠိုၚ် ခတှ်ကၠာတေံ အိုတ်အာမှဟေၚ် သြန်ဓလေံတၟိဂှ် ပ္တိတ်ဓလေံကဵုအာဏောၚ်မဒှ်တုဲ သြန်ဓလေံသၞာံဂၠိၚ်၊ သၞာံဂၠေံတံဂှ်လေဝ် ခတှ်ဟွံမွဲမှဟေၚ် ကဵုအခေါၚ်ဂၠေံဏောၚ်ဂှ် သ္ဂးလဝ်ရ။

သ္အာၚ်နူဂှ်ပၠန် သြန်ဓလေံအရပ်စပ်ပရေၚ်တဵုလွဳတံဂှ်လေဝ် သြန်ဓလေံကေတ်လဝ်ကၠာတေံဂှ် ကလေၚ်လေဲသီုအိက်သီုတမ် တုဲမှဟေၚ် ပ္တိတ်ကဵုဏောၚ်တုဲ ပပ္တံနူဂိတုမေ (၁၈) တုဲ မွဲသၞာံမ္ဂး နှေန်အိက်သြန် (၅) တၟံကၠံ ပ္တိတ်ဓလေံကဵုအာဏောၚ်ဂှ် လလောၚ်ပ္တိတ်လဝ်ရ။

ပ္ဍဲတွဵုရးဍုၚ်မန်ဂှ် နဒဒှ်သြန်ဓလေံပရေၚ်တဵုလွဳကသီု သွက်တိဨကတဵုလွဳ အလုံမွဲတွဵုရး (၂၀၃၀၀၀) ပြၚ်ဂှ် ရန်လဝ် (၃၀ ဒဿမ ၄၅၃) ဗဳလျာန်ဒ္ကေဝ်ဏောၚ်ဂှ် ဂွံတီကေတ် နူကဵုတိုက်သြန် ဖောအ်ဗြေဝ်ဝါဗ္ၚဍုၚ်ဗၟာ သၟဝ်တဲကံၚ်ဇြဳပၞာန်ရ။

ပရိုၚ်−သြၚ်လောန်တိုၚ်(မ်)

ဗီုဓာတ်−MOI

Leave a Reply

Your email address will not be published. Required fields are marked *