အပ္ဍဲကာလသီအဝဵုဏံ မၞိဟ်မွဲတၠဂှ် ဖျေံစၟတ်ဒဏ်ဂစိုတ် စဵုကဵု (၃) ဝါနွံဒၟံၚ်

လ္ဂုၚ်၊ မေ (၂၁)

ကောန်ထံၚ်ပရေၚ်ဍုၚ်ကွာန် ဒစဵုဒစးပပရေၚ်သီအဝဵုတုဲ မဒးဒုၚ်ရပ်ထိၚ်လဝ် နကဵုဟိုတ်နာနာတံဂှ် သွက်ဒုဟ်ဒဏ် လ္ပာ်ကံၚ်ဇြဳပၞာန် မစောတ်စောဲကေတ်လဝ်ဒုဟ်တံဂှ် မ္ၚးနူဒဏ်ဂစိုတ် ကေုာံ ဒဏ်ထံၚ်တံဂှ် မၞိဟ်မွဲတၠဂှ် ဖျေံစၟတ်ဒၟံၚ်ဒုဟ်ဒဏ် ကဵုကၠုၚ်ဒၟံၚ်ဒဏ်ဂစိုတ် စဵုကဵု (၃) ဝါ နွံကၠုၚ်ရ။

အတိုၚ်စရၚ် ဂကောံရီုဗၚ်မၚ်မွဲကောန်ထံၚ်ပရေၚ်ဍုၚ်ကွာန် (AAPP) ပ္ဍဲဂိတုမေ (၁၉) တေံဂှ်မ္ဂး စပ်ကဵုပၠန်ဂတးက္ညၚ်တုဲ မၞိဟ်ဒးဒုၚ်ဖျေံဒဏ်ဂစိုတ်တုဲဂှ် ဒးဒုၚ်ရပ်ထိၚ်လဝ် ပ္ဍဲကဵုထံၚ်စာတ်တံဂှ် နွံဒၟံၚ် (၁၁၂) တၠရ။

ပ္ဍဲကဵုဏံ ယဝ်ရပံၚ်ထောံ ကုမၞိဟ်ဒးဒုၚ်ဖျေံစၟတ်ဒဏ်ဂစိုတ် လက္ကရဴမတ် (၄၂) တၠဂှ်မ္ဂး မၞိဟ်ဒးဒုၚ်ကဵုဒဏ်ဂစိုတ် အပံၚ်ဖအိုတ် (၁၅၆) တၠ နွံအာယျဂှ် ထ္မံက်ထ္ၜးလဝ် ပ္ဍဲစရၚ် AAPP ရ။

တုဲကၠုၚ် ပ္ဍဲဂိတုမေ (၁၈) တေံဂှ်လေဝ် နဒဒှ်ဒဏ်ဂစိုတ် ကေုာံ ဒဏ်ထံၚ်မွဲအာယုက်ဂှ် နူကဵုရုၚ်သၞောဝ်ဓဝ်တၟေၚ် အပ္ဍဲထံၚ်အၚ်စိၚ် ဖျေံစၟတ်လဝ်ဒုဟ်ဒဏ် ကုညးသၟတ် (၅) တၠဂှ် AAPP လလောၚ်ပ္တိတ်လဝ်ရ။

ပ္ဍဲကဵုမၞိဟ်(၅) တၠဏံ မွဲတၠဂှ်ဝွံ ဒးဒုၚ်ဖျေံစၟတ်လဝ် စဵုကဵုဒဏ်ဂစိုတ် (၂) ဝါတုဲ သှ်ေပန်တၠဂှ် ဒးဒုၚ်ဖျေံစၟတ်လဝ် ဒဏ်ဂစိုတ် ကေုာံ ဒဏ်ထံၚ်မွဲအာယုက်တံ စၟအ်အ်ရ။

ညးတံဂမၠိုၚ်ဝွံ ဒှ်ညးဒးဒုၚ်စောတ်စောဲလဝ် သွက်အမှုပန်ပှော် ကောန်ဒပ်ဗၠာဲသၟိၚ်ပရေၚ်ဂီုကၠီု လ္တူကွဳပၟတ်ဂေတ်ဍုၚ်လ္ဂုၚ် ပ္ဍဲသၞာံ ၂၀၂၁ အပ္ဍဲဂိတုအဝ်ဂါတ် တုဲကၠုၚ်တေံ မဒှ်ရ။ ညးသၟတ် မသုန်တၠဏံဂှ် ပ္ဍဲသၞာံ ၂၀၂၁ ဂိတုသေပ်တေမ်ဗာတေံဂှ် ရပ်ဒက်ဂွံလဝ်တုဲ နူကဵုကံၚ်ဇြဳပၞာန် ဖျေံစၟတ်လဝ်ဒုဟ်ဒဏ် သာ်ဏံရ။

ညးလ္ၚတ်သ္ၚဳဂၠိပ်ပရေၚ်ဍုၚ်ကွာန် ဥူတာန်သဵုနာၚ်ဂှ် ကံၚ်ဇြဳပၞာန် ဖျေံစၟတ်ဒုဟ်ဒဏ် ဒဏ်ဂစိုတ်တံဂှ်ဝွံ ဍဵုဍိုက် ကုညးမပါလုပ် ပ္ဍဲပၠန်ဂတးက္ညၚ်တံကဵု ညးမပါလုပ်ဆက်စပ်တံ ဗွဲမသ္ကာတ်မြဟ်တုဲ ဓဇန်ထ္ၜးဒၟံၚ်ရောၚ်ဂှ် ဟီုကဵု ဌာန်ပရိုၚ်သြၚ်လောန်တိုၚ်(မ်) ရ။

“သွက်ဂွံကွာ်လ္တူဂၠံၚ်တရဴဒဳမဝ်ကရေဇြဳဂှ် ကတိကဝတ်ကံၚ်ဇြဳပၞာန် ကၠောန်ကဵုပေါဲရုဲမာဲဏောၚ်ဂှ် ဖျေံစၟတ်လဝ်ရ။ သွက်ဂွံထ္မံက်ရုပ်ရဴ ကတိကဝတ်ဏံ ပေၚ်ၚ်ဂှ် ကြေပ်ဂြတ်ဒၟံၚ်၊ အခိၚ်ဒးဂဗ အခက်အခုဲတံဂှ် ညံၚ်ဂွိုအ်ပံၚ်တောဲကဵု ညးမပါလုပ်ဒၟံၚ် ပ္ဍဲဂကောံဇြဟတ်ပၠန်ဂတးတံ၊ ပဳဒဳအာဖ်တံဂှ် သွက်ဂွံရေၚ်တၠုၚ်ကေတ်ဒုဟ် ဗွဲမသ္ကာတ်မြဟ်ဂှ်တုဲ ကၠောန်ဒၟံၚ်သာ်ဏံ မဒှ်ရ။ ကၠောန်သာ်ဏံမှ နကဵုဍေံ ဂွံပၞော်တိတ်ဏောၚ်၊ ကၠောန်ပေါဲရုဲမာဲမာန်ဏောၚ် ဒုၚ်ဂိုၚ်ကေတ်လဝ်ဂှ်ရ နကဵုဍေံ စပ်ကဵုဂကောံဇြဟတ်ပၠန်ဂတးက္ညၚ်တံတုဲ ဖျေံစၟတ်ဒုဟ်ဒဏ် သ္ကာတ်တ်မြဟ်ဟ်ဓဇန်ဓဇန်တံဂှ်တုဲ ညံၚ်ဂွံပသောၚ်မာန်ဂှ် ဂ္စါန်ဒၟံၚ်ရ” သာ်ဝွံ ညးသ္ဂးရ။

နူကဵုသြၚ်လောန်တိုၚ်(မ်) စၟဳစၟတ်စမ်ရံၚ် စရၚ် AAPP ဂှ် မၞိဟ်ဒးဒုၚ်ဖျေံစၟတ်လဝ် ဒဏ်ထံၚ်မွဲအာယုက်ဂှ် (၁၈၆) တၠနွံတုဲ မၞိဟ်ဒးဒုၚ်ဖျေံစၟတ်လဝ် ဒဏ်ဂစိုတ် ကေုာံ ဒဏ်ထံၚ်မွဲအာယုက်တံဂှ်လေဝ် ဟွံအောန်နူကဵု (၉) တၠနွံတုဲ လ္တူဒုဟ်ဒဏ်တံဏံဂှ် ထပ်ဒးဒုၚ်ဖျေံလဝ်ဒဏ်ထံၚ်တံလေဝ် နွံဒၟံၚ်ရ။

ပ္ဍဲကဵုဏံ မၞိဟ်ဒးဒုၚ်ဖျေံလဝ်ဒဏ်ထံၚ်မွဲအာယုက်တုဲ ထပ်ဒးဒုၚ်ဖျေံလဝ် ဒဏ်ထံၚ် နူကဵုပိသၞာံ စဵုကဵုစှ်သၞာံတံဂှ် (၇) တၠနွံဒၟံၚ်တုဲ မၞိဟ်ဒးဒုၚ်ဖျေံစၟတ်လဝ်ဒဏ်ဂစိုတ်ပိဝါဟွံအောန်တံဂှ်လဝ် (၅) တၠ နွံဒၟံၚ်ရ။

သ္အာၚ်နူဂှ်ပၠန် မၞိဟ်ဒးဒုၚ်ဖျေံစၟတ်လဝ်ဒဏ်ဂစိုတ်တုဲ ထပ်ဒးဒုၚ်ဖျေံလဝ်ဒဏ်ထံၚ် နူကဵု (၃)သၞာံ စဵုကဵု (၂၀၀) သၞာံပြၚ်ဂှ်လေဝ် (၄) တၠ နွံဒၟံၚ်ရ။

ညးရေၚ်တၠုၚ်ဂဗုတ်ကၠတ်ထဝ်သၞောဝ်ဓဝ်မွဲတၠဂှ် ပွမဖျေံစၟတ်ဒဏ်ဂစိုတ်တံဂှ်ဝွံ နွံပၟိက်သ္ဒးသ္ၚဳဂၠိပ် သရောပ်ထောံ အတိုၚ်လၟေၚ်ဒဒှ်မွဲ လ္ဂောံကဵုသၞောဝ်တံဂှ်တုဲ သ္ၚဳဂၠိပ်ကေတ် အတိုၚ်လၟေၚ်ဒဒှ်မွဲမှ အရာမဍာံပြဓဝ်ယာတံ နွံကၠုၚ်မာန်ရောၚ်ဂှ် သ္ၚဳဂၠိပ်လဝ်ရ။

“ ရံၚ်အာ နကဵုလညာတ်လ္ပာ်သၞောဝ်မ္ဂး လ္ၚတ်ကေတ် ဂဗုတ်မွဲတုဲမွဲ ချိုတ်တ်ပၠိုတ်တ်တုဲမှ ညအ်ဂှ် ကိတ်ညဳကဵုသၞောဝ်၊ ညအ်ဂှ် စှ်ေကဵုဗဗွဲဓဝ်။ ဟွံသေၚ်မ္ဂး ဟွံဓဝ်ယာပုဟ်၊ ဟွံကိတ်ညဳကဵု သၞောဝ်ပုဟ်ဂှ် သ္ၚဳဂၠိပ်ကေတ်မာန်ရ။ သာ်ဏံဟွံသေၚ် ယဝ်ရသရောပ်ထောံသီုဖအိုတ်တုဲ ရံၚ်ကေတ်မ္ဂး ရံၚ်ကေတ်လ္ပာ်ပရေၚ်ဍုၚ်ကွာန် မွဲလ္ပာ်ဓဝ်မ္ဂး ဒှ်လညာတ်ဗဗွဲဓဝ်၊ ဒှ်လညာတ်ကိတ်ညဳကဵုသၞောဝ်ဂှ် ဒှ်ဟွံမာန်ပုဟ်။ ဇေတ်တ်ဂှ် case by case မွဲတုဲမွဲ လးထ္ၜးတုဲ အရာမသ္ဂုတ်သွာတ်တံ၊ ပ္တိုန်ထ္ၜးတံ၊ အာတ်ပ္တိုန်တံ မတံဏံအိုဿီုဂှ် သရောပ်တုဲသ္ၚဳဂၠိပ်မှဟေၚ် ကလိဂွံလညာတ် မကိတ်ညဳကဵုသၞောဝ်၊ မဍာံပြဗဗွဲဓဝ်မာန်ဏောၚ်” သာ်ဝွံ ထံက်ထ္ၜးလဝ်ရ။

ပ္ဍဲကဵုကံၚ်ဇြဳပၞာန် ဖျေံစၟတ်လဝ်ဒဏ်ဂစိုတ်ဂမၠိုၚ်ဂှ် ပ္ဍဲကဵုဂိတုဂျူလာၚ် ၂၃ ကဵု ၂၄ သၞာံတုဲကၠုၚ်တေံဂှ် ကဵုလဝ်ဒဏ်ဂစိုတ် ကုညးချဳဒရာၚ်ကတိုၚ်ကၟဟ်ပရေၚ်ဒဳမဝ်ကရေဇြဳ ကိုဝ်ဂျေန်မဳ၊ ကိုဝ်ဖျဵုဇြေယျာဒဝ်၊ ကိုဝ်လှမျဵုအံၚ်၊ ကိုဝ်အံၚ်သူရဇြဝ်တံရ။

စပ်ကဵုကံၚ်ဇြဳပၞာန် စဳရေၚ်ဒဏ်ဂစိုတ်တံဂှ်တုဲ ကုလသမဂ္ဂကီု သီုဗွိုၚ်ကၟိန်ဍုၚ်နာနာတံ ကေုာံ အလုံညးဍုၚ်ကွာန်မွဲ ဟီုဖျေံလဝ်ကဝုတုဲ ပရေၚ်ကၟာတ်လဒဵုတပ်ဒဏ်တံလေဝ် နွံလဝ်ရ။

ၜိုန်ဂှ်ကီုလေဝ် ကံၚ်ဇြဳပၞာန်ဂှ် အပ္ဍဲကာလပၠန်ဂတးက္ညၚ် က္တဵုဒှ်ဂွံ အပ္ဍဲပွိုၚ် ၂ သၞာံဏံ ကုညးမပ္တိတ်ဇြဟတ် သွက်ဂွံဗ္တိုက်ပ္တိတ် ကံၚ်ဇြဳပၞာန်တံဂှ် မ္ၚးနူဒုဟ်ဒဏ် ဒဏ်ဂစိုတ်တံဂှ် ဖျေံစၟတ်သီုကဵုဒုဟ်ဒဏ် တၞဟ်သ္အာၚ်တံဂှ်တုဲ သွက်ဂွံဍဵုဍိုက်ဂှ် ကၠောန်ဒၟံၚ်အိုတ်ရ။

ပရိုၚ်−သြၚ်လောန်တိုၚ်(မ်)

ဗီုဓာတ်−CJ

Leave a Reply

Your email address will not be published. Required fields are marked *