ပဠဝ်၊ မေ (၂၅)
ပ္ဍဲရးဒေသဇၞော်တၞၚ်သဳ၊ ပွိုၚ်ဍုၚ်ပဠဝ်၊ ဗ္ဒါဲကွာန်နာန်ပယုက် (နန်းပရုပ်) ပ္ဍဲဂိတုမေ (၂၄) အခိၚ်နူဂယးဂှ် ရေၚ်ကွဳစက်ကံၚ်ဇြဳပၞာန် ဒးဒုၚ်ဗ္တိုက်ဗ္တိုဟ်မာၚ်တုဲ (၁၀) တၠဟွံအောန် ဇီုကပိုက်ကလိဂွံလဝ်ဝပ်ရောၚ် ညးတာလျိုၚ် လလောၚ်ပရိုၚ် တမ်ဒပ်လၟိဟ် (၁) ခရိုၚ်ဗိက် ဟီုကဵု ဌာန်ပရိုၚ်သြၚ်လောန်တိုၚ်(မ်) ရ။
ပ္ဍဲကဵုတ္ၚဲဂှ် အခိၚ်နူဂယး ၜိုတ် (၆) နာဍဳဂှ် ဂကောံဒပ်ပံၚ်ကောံစဵုဒၞါဒေသတံ ဖံက်ဗ္တိုဟ်လဝ်မာၚ် (၆) မ ကုကွဳစက်ပၞာန် (၂) ဖ္ဍိုက် မတိတ်ကၠုၚ် နူကဵုဘာသ္ဇိုၚ်ပ္ကတ်ပ္ကေၚ်ကွတ်ပၞာန်၊ ဍုၚ်ပဠဝ် ဇြဟတ်ၜိုတ် (၅၀) ပြၚ်ဂှ်ရ။
ညးတာလျိုၚ်လလောၚ်ပရိုၚ် တမ်ဒပ်လၟိဟ် (၁) ခရိုၚ်ဗိက်ဂှ် ပရေၚ်ဗ္တိုက်ဗ္တိုဟ်မာၚ်ဂှ်ဝွံ ဟိုတ်နူဒစးဒုၚ်ဂွံလဝ်ပရိုၚ် ကောန်ဒပ်ကံၚ်ဇြဳပၞာန်တံ အာလ္ပာ်ပဠဝ်ဏောၚ်ဂှ်ရ ဂွံတဲကၠာတုဲ ဗ္တိုဟ်လဝ်မာၚ်ရောၚ်ဂှ် သ္ဂးရ။
ကြဴနူဒးဒုၚ်ဖံက်ဗ္တိုဟ်မာၚ်တုဲဂှ် နူကဵုလ္ပာ်ရေၚ်ကွဳစက်ကံၚ်ဇြဳပၞာန်တံ ဒၞါဲဂကောံဒပ်စဵုဒၞါဒေသတံ နွံမာန်ဂှ် ပန်ပှော်လဝ် နကဵု (၄၀) မမ သီုကဵုလွဟ်ဍောတ်တံဂှ်ကီုလေဝ် ဇီုကပိုက်ဒးလဝ် ဟွံမွဲမွဲသာ် ဆုတ်ကလေၚ်မာန်လဝ်ရ။
တုဲကၠုၚ် ပ္ဍဲဂိတုမေ (၁၁) ဂှ်လေဝ် ပ္ဍဲပွိုၚ်ဍုၚ်ပဠဝ် အကြာကွာန်ထမေန်မသာ ကဵု ကွာန်နာန်ပယုက်ဂှ် ကွဳစက်ကံၚ်ဇြဳပၞာန် ဒးအာမာၚ်တုဲ သၞာဲဒဴမွဲတၠပါလုပ်ဂှ် (၅) တၠ ကလိဂွံလဝ်ဝပ်ရ။
ပ္ဍဲကဵုပွိုၚ်ဍုၚ်ပဠဝ် မလလောၚ်တြးလဝ် ပရေၚ်အုပ်ဓုပ်ပၞာန်ဂှ် အပ္ဍဲကာလဒပ်ပၞာန်သီအဝဵု ပွိုၚ် (၂) သၞာံဏံ ရေၚ်ကွဳစက်ကံၚ်ဇြဳပၞာန်တံ ဒးဒုၚ်ဗ္တိုက်ဗ္တိုဟ်လဝ်မာၚ် မွဲဏှမွဲဏှတုဲ လ္ပာ်ကံၚ်ဇြဳပၞာန် ဒးဂိဒၟံၚ်ရ။
ပရိုၚ်−သြၚ်လောန်တိုၚ်(မ်)
ဗီုဓာတ်−Social Media
sanlontai