ဘာကျာ်ခရေတ်ယာန် နူပွိုၚ်ဍုၚ်ကအ်ကြိက် ဒးဒုၚ်ထောံမခတိုဟ် နကဵုက္ၜၚ်ကျာ

ကအ်ကြိက်၊ မေ (၂၅)

ဒပ်ကံၚ်ဇြဳပၞာန် ဟိုတ်နူကၠောန်သ္ပဗ္တိုက်ဂြာတ်လဝ်မခတိုဟ် ပ္ဍဲကွာန်ပနဲဖိုဝ်ကလိုဝ် ပွိုၚ်ဍုၚ်ကအ်ကြိက် တိဍာ်ဒပ်မဟာ (၆) ဗော်သွးကောန်ဂကူကရေၚ် KNU နကဵုက္ၜၚ်ကျာဂှ်ရ ဘာကျာ်ခရေတ်ယာန်မွဲမ ဒးမခတိုဟ် လီုလာ်အာလဝ်ရောၚ် KNU ဗဟဵု လလောၚ်ပ္တိတ်လဝ်ရ။

ပ္ဍဲဂိတုမေ (၂၃) အခိၚ်ဗ္တံ ၜိုတ် (၁၁) နာဍဳဂှ် ဒပ်ကျာနေဗျဳဒဝ် ဒပ်ကံၚ်ဇြဳပၞာန် ဂြာတ်လဝ်မခတိုဟ် (၂) မ နကဵုက္ၜၚ်ကျာဂျက်ဖိုက်တာ ပ္ဍဲကွာန်ခလာလဝ်ဂျေဝ် (ပနဲဖိုဝ်ကလိုဝ်) ၊ ဂကောံကွာန်မဝ်ခဳ တိဍာ်တမ်ဒပ် (၂၀၁) KNLA ဒပ်မဟာ (၆) ဂှ်တုဲ ဘာကျာ်ခရေတ်ယာန်မွဲမ ဒးဗုမ်လီုလာ်အာလဝ်ရောၚ် ပါလုပ် ပ္ဍဲတၚ်လလောၚ်တြးဂှ်ရ။

ဒပ်ကံၚ်ဇြဳပၞာန် ဟိုတ်နူထောံဏာလဝ်မခတိုဟ် မၞုံလျိုၚ်ပံၚ် (၅၀၀)၊ (၂) မ တဝ်ဝ်ကဵုအရှာံ ဘာကျာ်ခရေတ်ယာန် မၞုံပ္ဍဲကွာန်ပနဲဖိုဝ်ကလိုဝ်ဂှ်ရ သီုကဵုပါလုပ်ဘာကျာ်ဂှ် စမြိုၚ်သ္ၚိဒၟံၚ်တံလေဝ် ဇီုကပိုက်လီုလာ်အာလဝ်ရောၚ် ပရိုၚ်တမ်ရိုဟ်အပ္ဍဲဒေသမွဲတၠ ဟီုရ။

ပ္ဍဲဂိတုမေ (၂၃) အခိၚ်နူဂယးဂှ် ဂကောံဒပ်ပံၚ်ကောံ ဂကောံဇြဟတ်ပၠန်ဂတးတံ ကြဴနူကၠုၚ်စိုပ်ဗ္တိုက် ဗ္ဒိုပ်ဒပ်မဝ်ခဳ ဒပ်ကံၚ်ဇြဳပၞာန် မၞုံပွိုၚ်ဍုၚ်ဗြဝတဳတုဲဂှ် ပ္ဍဲအခိၚ်ဗ္တံဂှ် ဒပ်ကံၚ်ဇြဳပၞာန် ကၠုၚ်စိုပ်ဂြာတ်လဝ် မခတိုဟ် နကဵုက္ၜၚ်ကျာရောၚ် လ္ပာ်ရဲထံက်ဂလာန်ဒပ်ပၞာန်တံ ဟီုဂးဒၟံၚ်ရ။

ဟိုတ်နူပရေၚ်ဗ္တိုက်ဂှ်တုဲ ညးဍုၚ်ကွာန်ဒေသတံ ဒးဂြိပ်ဒဴပါဲဒလေတ်ဒၟံၚ်ရောၚ် ညးမၞုံအခေါၚ်ဟီုဂး ဇာဇၞိက်အထံက်ပၚ် ပရေၚ်ၜိုဟ်လလမ်ကရေၚ် KPSN သဝ်လေဝ်ကပဝ် ဟီုကဵု ဌာန်ပရိုၚ်သြၚ်လောန်တိုၚ်(မ်) ရ။

ပ္ဍဲဂိတုမေ (၂၄) တေံဂှ်လေဝ် က္ၜၚ်ကျာဒပ်ကံၚ်ဇြဳပၞာန်တံ ကၠုၚ်စိုပ်ပဝ်ယာန်လဝ် အပ္ဍဲတိဍာ်ဒပ်မဟာ (၆) KNU ဂၠိုၚ်ၚ်ကဵုဝါရောၚ်ဂှ်လေဝ် ပရိုၚ်တမ်ရိုဟ်အပ္ဍဲဒေသတံ ဟီုဂးဒၟံၚ်အိုတ်ရ။

ပ္ဍဲတိဍာ်ဒပ်မဟာ (၆) ဗော်သွးကောန်ဂကူကရေၚ် KNU ဂှ် အပ္ဍဲဂိတုဨပရဴ (၁) ဂိတုတုဲကၠုၚ်တေံ ဒပ်ကံၚ်ဇြဳပၞာန် ကၠောန်သ္ပလဝ် ပရေၚ်ဗ္တိုက်တရဴကျာ (၃၁) ဝါတုဲ သီုကဵုပါလုပ်ဘာကျာ်ခရေတ်ယာန် (၂) မဂှ် ဘာဗ္တောန်လိက်၊ ဗ္ဒမ်ကဵုဂဥုဲ၊ ဘာလကျာ် ကေုာံ စမြိုၚ်သ္ၚိဒၟံၚ် အပံၚ် (၄၀၀) ပြၚ် လီုလာ်အာလဝ်ရောၚ် ဌာနလလောၚ်ပရိုၚ် ခရိုၚ်ဒူပလာယာ လလောၚ်ပ္တိတ်လဝ်ရ။

ပရိုၚ်−သြၚ်လောန်တိုၚ်(မ်)

ဗီုဓာတ်−KNU