ဂျာကာတာ၊ မေ (၂၈)
ပ္ဍဲကဵုသ္ဘၚ်သ္ပဝတ်ရာဒနာမိက် ဘာကျာ် မၞုံတ္ကအ်ဗာလဳ ဍုၚ်အေန်ဒိုဝ်နဳယှာဂှ် ကၟုဲအာတရဴ ဂကူဂျာမာန် မွဲတၠ မခဠောတ်ဖျေံလဝ်ဂၠိက်ယာတ်ဂှ် သၟိၚ်တၠအဝဵုတံ ရပ်ဒက်လဝ်ရ။
ညးဗြဴ အာယုက်မၞုံ (၂၈) သၞာံဂှ်ဝွံ ပရူပရာ မက္တဵုဒှ်လဝ် ပ္ဍဲဘာကျာ်ဂှ် ကယျာန်ပါဲလဝ်တုဲ အခိၚ်မတတ် အာ ဂတးဂီုကၠီုတံဂှ် ခဠောတ်လဝ်ဂၠိက်ယာတ်တံ ဟွံမွဲပုဟ်ဂှ် ဂွံတီကေတ်ရ။
ညးဗြဴ မသ္ပလဝ်ပွ ခဠောတ်လဝ်ဂၠိက်ယာတ် ပ္ဍဲကဵုပေါဲထ္ၜးရုပ် အခန်ကၞာပရေၚ်ဘာသာဂှ် ရပ်ဒက် လဝ်တုဲ ဒဒှ်ရလှဲပြံၚ်ကဵုလဝ် ဗ္ဒိုပ်ဗၠာဲသၟိၚ် မၞုံခရိုၚ်ပါ် အူဗာတ်ဂှ်လေဝ် ဂွံတီကေတ်ရ။
ကၠာဂွိုအ်ပလံၚ်ညးဗြဴဂှ် ရုၚ်ဂဥုဲ သွက်ဂွံကၠောန်သ္ပစၟဳစၟတ် စပ်ကဵုစိုတ် စပ်ကဵုလ္ပာ်ရုပ်ဂှ် ကၠောန်သ္ပလဝ် ပရေၚ်စၟဳစၟတ်သၟာန်သၟုက် ပ္ဍဲကဵုဗ္ဒိုပ်ဗၠာဲသၟိၚ်ဂှ်ရ။
ညးဗြဴသၟတ် မခဠောတ်ဖျေံလဝ်ဂၠိက်ယာတ်ဂှ် နူကဵုဒပ်ဗၠာဲသၟိၚ်တံ စၟဳစၟတ်လဝ် ဒဒှ်ရသုၚ်စောဲလဝ် ဂဥုဲၜူမာဲ ကေုာံ အရက်သူရာ နွံ၊ ဟွံမွဲဂှ်တုဲ တၚ်စၟဳစၟတ်ဏံဂှ် လဴပူကဵုလဝ်ညးဍုၚ်ကွာန်တံ ဟွံမွဲရ။
ညးဝွံ လောန်ကၠုၚ် အပ္ဍဲပွိုၚ်ၜါသၞာံတေံဂှ်လေဝ် ဟိုတ်နူဝးပ္ကဝ်လဝ်သၞောဝ်ဍုၚ်ဂျာမနဳမွဲ မသ္ကဵုကၠိခ္ဍက်တဴ ညးဂမၠိုၚ်တံဂှ်ရ ကေၚ်ဒးဒုၚ်လဝ်ဒုဟ်ဒဏ် ပ္ဍဲကဵုထံၚ်စာတ် ပွိုၚ် (၂) သၞာံကဵု (၈) ဂိတုရ။
တ္ကအ်ဗာလဳ အေန်ဒိုဝ်နဳယှာဂှ်ဝွံ ဒှ်ဒၟံၚ်ဌာန်တ္ကအ်ပြေလၟောၚ်ဒယှ် သွက်ညးအာတရဴ ဂေတ်ဂၠးတိတံဖိုဟ်ဂှ်တုဲ ပ္ဍဲကဵုသၞာံလ္ပာ်တံဏံဂှ် ကောန်ဍုၚ်အေန်ဒိုဝ်နဳယှာဂမၠိုၚ်ဝွံ ဟီုပ္တိတ်ကၠုၚ် ပြဝညးအာတရဴ မဟွံဒးရးတံဂှ်ရ။
သ္အာၚ်နူဂှ်ပၠန် ပ္ဍဲကဵုဂိတုဨပရဴပြဟ်ဟ်တေံဂှ်လေဝ် ကောန်ဍုၚ်ရုယှာမွဲတၠ မသ္ပလဝ်ပြဝ ဟွံဂပ်ဝ် ပ္ဍဲကဵုတ္ကအ်ဗာလဳဂှ် ကလေၚ်ပလံၚ်ဖျဴလဝ် ဍုၚ်ညးတုဲ နကဵုကၟုဲအာတရဴဂမၠိုၚ် ဒၟါနူဟိုတ် ယာန်ဗကပ် ဇီုဒးတံဂှ်တုဲ က္တဵုဒှ်ဒၟံၚ် စဵုကဵုဒးချိုတ်အာတံ နွံဂှ်ရ တာဒၞါလဝ် သီုကဵုအခေါၚ်ဍိုက်ကွဳလိုန်ဓာတ်တံရ။
Ref: Straits Times
sanlontai