မတ်မလီု၊ မေ(၃၁)
ပ္ဍဲရးဒေသဇၞော် ကေုာံတွဵုရးဍုၚ်လ္ၚဵုဂှ် ဇြဟတ်ဒဵုမတ်ဗြဲခိုဟ်က္တဵုဒှ်ဒၟံၚ်တုဲ ပ္ဍဲဒေသဒဵုမတ်ဗြဲ ဆုဲပြံၚ်အာမွဲဒမြိပ် ပ္ဍဲဂိတုမေ စၟတ်တ္ၚဲ(၃၀) ဂှ် မွဲကရောံကဵုဗြဲဂူစှ်ေ ကျာသ္ကာတ်မြဟ်လပိုက်၊ ဂဂဵုဓရိၚ်၊ က္တဵုဒှ်ဒၟံၚ်ရဂှ် ဂွံတီကေတ်ရ။
သ္ပတံနူဂိတုမေ စၟတ်တ္ၚဲ (၃၀) အခိၚ်တ္ၚဲစေၚ် (၁)နာဍဳတုဲ သီုလဂုၚ် ပ္ဍဲဗဂေါ၊ ဨရာဝတဳ၊ တၞၚ်သြဳ၊ တွဵုရးကရေၚ်၊ တွဵုရးမန်၊ နေပျဳဒဝ်၊ တွဵုရးသေံ(သၠုၚ်ကျာ)၊ တွဵုရးရခေၚ်၊ တွဵုရးကရေၚ်ဍာဲတအ်ဂှ် ပ္ဍဲဒၞာဲဗွဲမဂၠိုၚ် ဗြဲဂူစှ်ေလဝ်တုဲ ပ္ဍဲအၚ်ဝ၊ မဂွေ၊ တွဵုရးသေံ(ဗၟံက်) ကေုာံတွဵုရးချေၚ် ပ္ဍဲဒၞာဲလ္ၚဵုဂှ် ဗြဲဂူစှ်ေလဝ် ညိညိနွံရ။
သ္အာၚ်နူဂှ်ပၠန် ပ္ဍဲရးဒေသဇၞော် ကေုာံပ္ဍဲတွဵုရးသှ်ေဒၟံၚ်တအ်ဂှ်လေဝ် ပ္ဍဲဒၞာဲလ္ၚဵုဂှ် ဗြဲဇၞော်မာန်ရောၚ်ဂှ် ဌာနစမ်ၜတ်အကာဲအရာဗြဲကျာ သၟဝ်တဲကံၚ်ဇြဳပၞာန် ဟီုသ္ဂးလဝ်ရ။
သ္အာၚ်နူဂှ်ပၠန် ပ္ဍဲဒၞာဲမတ်ဗြဲဆုဲပြံၚ်ဒၟံၚ် မွဲဒမြိပ်ဂှ် မွဲကရောံကဵုဗြဲဂူစှ်ေ ကျာသ္ကာတ်၊ ဂဂဵုဓရိၚ်၊ ဂဂဵုတးပန်၊ ဖျဳလလဳပံက်ကီု သီုဗြဲပၠဳဂူ ဆက်က္တဵုဒှ်ကၠုၚ်မာန်ရောၚ်ဂှ် ဌာနစမ်ၜတ်အကာဲအရာဗြဲကျာ လလောၚ်တြးလဝ်ရ။
ပ္ဍဲမွဲဒမြိပ်ဒေသရေၚ်ၜဳ နူလဂုၚ် တၞၚ်သြဳ သ္ပတံနူ အခိၚ်တ္ၚဲစေၚ်တ္ၚဲဏံတုဲ ပ္ဍဲပွိုၚ်(၂၄)နာဍဳ ဒၞာဲဗွဲမဂၠိုၚ် ဂဵုဓရိၚ်ဗြဲဂူတုဲ လပှ်ဇၞော်မာန်ရောၚ်ဂှ်လေဝ် ဟီုသ္ဂးလဝ်ရ။
ပ္ဍဲတ္ကအ်ပါၚ်ၜဳ၊ ပ္ၚံက်မုဟ်တၟံ၊ မွဲဒမြိပ်ရေၚ်ၜဳမန်-တၞၚ်သြဳ ကေုာံ ပ္ဍဲဗလးၜဳတအ်ဂှ် ကာလလလေဆာဝ် ဗြဲဂူကျာထတ် က္တဵုဒှ်မာန်တုဲ လပှ်ဇၞော်မာန်ကီု အခိၚ်ဗြဲထတ်ကျာလပိုက် ပ္ဍဲဗလးဍာ်/ဗလးတိ မွဲနာဍဳမ္ဂး စဵုကဵု (၃၅)မိုၚ် လပိုက်လွိၚ်မာန်ရောၚ်ဂှ်လေဝ် ဟီုသ္ဂးလဝ်ရ။
ပရိုၚ်-သြၚ်လောန်တိုၚ်(မ်)
ဗီုရုပ် – CJ
sanlontai