ကျာ်ထဝ်- မေ(၃၁)
တွဵုရးဍုၚ်မန်၊ ပ္ဍဲပွိုၚ်ဍုၚ်ကျာထဝ် ကေုာံ ပွိုၚ်ဍုၚ်သဓီုဂှ် ဟိုတ်နူလိုန်ဒးမာၚ်တိုပ်တိကီု သီုဒးဒုၚ်တံၚ် ခတိုဟ်လဝ်မာၚ်တုဲ ကောန်အရာပ်ညးဍုၚ်ကွာန် (၂) တၠ ဒးလဝ်ဘဲဝပ်ရဂှ် ဂကောံရီုဗၚ်ဟံၚ်ပြာ်မၞိဟ်တံ ဟီုကဵု ဌာန်ပရိုၚ်သြၚ်လောန်တိုၚ်(မ်)ရ။
ဂိတုမေ တုဲကၠုၚ် ပ္ဍဲစၟတ်တ္ၚဲ (၂၉) အခိၚ်ဗ္တံ ၜိုတ် (၇)နာဍဳဂှ် ကိုဝ်ချာန်မျေအ်အံၚ် ဒၟံၚ်ဍုၚ်တုၚ်ဇြယာပ် ပွိုၚ်ဍုၚ်ကျာ်ထဝ် အဃောအာကွာန်ကာန်နဳ ကဵုကွဳလိုန်ဓာတ်ဂှ် လိုန်ဒးလဝ်မာၚ် ပ္ဍဲပါၚ်ဂၠံၚ်လုပ်ကွာန်ရ။
ဟိုတ်နူဒးလဝ်မာၚ်တိုပ်တိတုဲ ကိုဝ်ချာန်မျေအ်အံၚ် ဒးဂွံလဝ်ဘဲဝပ်ကဝေက်မာၚ် ပ္ဍဲဇိုၚ်ကဵု ပ္ဍဲတဲကီု ကွဳလိုန်ဓာတ်လေဝ် ဇီုကပိုက်လီုလာ်လဝ်ရ။
သ္အာၚ်နူဂှ်ပၠန် ပ္ဍဲဂိတုမေ စၟတ်တ္ၚဲ (၃၀) အခိၚ်နူဂယး ၇ နာဍဳဂှ်လေဝ် ကွဳစက်ဖ္ဍိုက်ဗၞိက်သၠာ (၆) ဒဳလုပ် ကၠုၚ် ပ္ဍဲပွိုၚ်ဍုၚ်သဓီုဂှ် ဒးဒုၚ်တံၚ်ခတိုဟ်လဝ်မာၚ် ပ္ဍဲဒၞာဲဗစပ်ကွာန်ယှိုဲယောၚ်ပျရ။
ဟိုတ်နူဒးဒုၚ်တံၚ်ခတိုဟ်လဝ်မာၚ်တုဲ မဂျူဂျူ ပါဗက်ကၠုၚ်ကွဳစက်ဂှ် ဂွံလဝ်ဘဲဝပ်ကဝေက်မာၚ် ပ္ဍဲက္ဍိုပ်ကဵု ပ္ဍဲတဲရ။
ကောန်အရာပ်ဒးလဝ်ဘဲဝပ်မာၚ်တအ်ဂှ် ပလံၚ်ဗစိုပ်ဏာလဝ် ရုၚ်ဂဥုဲတုၚ်ဇယာတ်ကဵု ရုၚ်ဂဥုဲ ခရိုၚ်သဓီုရဂှ် ဂွံတီကေတ်ရ။
တွဵုရးဍုၚ်မန်၊ ပ္ဍဲပွိုၚ်ဍုၚ်ၜဳကလေၚ်ကဵု ပွိုၚ်ဍုၚ်သဓီုဂှ် ပ္ဍဲဂိတုဏံ ယာဉ်ပလံၚ်ညးအာတရဴကဵု ကွဳစက်ပ္ဍိုက်ဗၞိက်ဂမၠိုၚ် ဒးဒုၚ်တံၚ်ခတိုဟ်လဝ်မာၚ်ဂှ်ရ ကောန်အရာပ်ညးဍုၚ်ကွာန် (၂)တၠ ဒးချိုတ်တုဲ ဒးလဝ်ဘဲဝပ် (၄)တၠရဂှ် ဂွံတီကေတ်နူညးဒေသတအ်ရ။
ပရိုၚ်-သြၚ်လောန်တိုၚ်(မ်)
ဗီုရုပ်-SBM
sanlontai